išaɛyah 61 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tabrraḥt n‑lh̬bar ifulkin

¹ hati illa flla rruḥ n‑sidi rbbi da‑bdda‑illan, ašku iẓli‑yyi sidi rbbi ad‑tbrraḥġ i‑imẓlaḍ s‑lh̬bar ifulkin, yazn‑iyi‑d ad‑ssmunġ tiggas n‑willi mi‑ibbi‑uwl, iniġ i‑willi tyamaẓnin: «hati ttyawrẓamm», ɛlmġ willi llanin ġ‑iskraf: «hati ttyawfsaym»,

² iniġ‑asn: «ilkm‑d‑uzmz a‑d‑iban rrḍa n‑sidi rbbi f‑mddn‑ns, irar i‑inuwwašn‑ns mad‑asn‑igan.» yazn‑iyi‑d ad‑sshnnuġ kullu willi taġ‑tguḍi,

³ sslkmġ i‑willi allanin ġ‑ṣiyun ttaj n‑ufulki ġ‑udġar n‑iġd, ẓẓġurġ ayt‑imṭṭawn s‑zzit n‑lfrḥ, sslsġ i‑willi mi ttġaša rruḥ‑nsn ‹timlsit n‑ššukr›, ard a‑fllasn‑ttinin mddn: ‹aṣġar n‑lḥqq lli‑iẓẓa sidi rbbi f‑a‑d‑gis‑iban lmajd‑ns.›

⁴ rad‑bnun ih̬rubba n‑zman, ssġlin igudar ḍrnin, ṣlaḥn timdinin tyawhlaknin, ssngaddan kullu mad‑h̬ʷlant tasutin lli‑zrinin.

⁵ iġribn a‑rad‑awn‑ikssa ulli‑nun, ibrraniyn a‑rad‑awn‑ikkrz igran‑nun ar‑frrn aḍil‑nun.

⁶ imma kunni ra‑tgm ‹imsakmurn n‑sidi rbbi›, ar‑awn‑ttinin ‹ih̬ddamn n‑rbbi‑nġ›. ra‑tšttam zġ‑tmih̬ar n‑tmizar n‑ddunit, ar‑ttfjjijm s‑lmajd lli‑darsn‑illan.

⁷ hati tzri‑tdallit‑nm, yili‑am lh̬ir f‑snat‑twal. zrin‑uwssan lli‑ġ‑a‑ttnḥaššamm, tfrḥm s‑mad‑awn‑illan. s‑ṣṣaḥt rad‑ṭṭafn lh̬ir f‑snat‑twal ġ‑wakal‑nsn, yili‑asn lfrḥ idumn.

⁸ «ašku nkki rbbi siditun, giġ wad iran lḥqq. ur‑ḥmilġ lbaḍl ula tamh̬h̬art. s‑lḥnant izgan a‑s‑ra‑tn‑barkġ, fkġ‑asn lɛhd lli‑ur‑sar‑ra‑itmmu.

⁹ tarwa n‑tarwa‑nsn, ra‑yimġur ism‑nsn ġ‑dar‑tmizar n‑ddunit, ityawssan‑ula‑wamud‑nsn ġ‑gr iqbiln aggugnin. kullu wanna‑tn‑iẓran ra‑fllasn‑yakka tuggʷa, ar‑ittini: ‹ġwid, ibark gisn rbbi da‑illan.› »

¹⁰ ha‑yyi frḥġ bahra s‑sidi rbbi, iɛmmr‑uwl‑inu s‑lfrḥ n‑rbbi‑nu. hati isslsa‑yyi timlsit n‑ujnjm, idl‑iyi s‑uslham n‑ufulki‑ns, zund asli igan ttaj n‑lhibt f‑ugayu‑ns, d‑zund taslit issfulkin ih̬f‑ns s‑tġawsiwin n‑nnʷqrt.

¹¹ ašku ġmklli‑d‑issmġay‑wakal tuga, issmġi‑d ula igr maylli gis ityawkrazn, ġmkan a‑s‑ra‑d‑issmġay rbbi siditnġ lḥqq ula lḥmd ġ‑iẓri n‑kullu timizar.