išaɛyah 60 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tillas ula tifawt

¹ nkr tisfiwt [a‑urušalim], ha tifawt‑nm tuška‑d, iġli‑d fllam lmajd n‑sidi rbbi.

² han tillas dlnt akal, imdla llasnin dln iqbiln n‑ddunit, imma kmmi rad‑fllam‑tġli tifawt n‑rbbi da‑illan, iban‑d gim lmajd‑ns.

³ rad‑d‑aškin ayt‑tmizar s‑tifawt‑nm, munn‑d igldan s‑unqaš n‑lmajd‑nm.

⁴ all alln‑nm tmnadt s‑kraygatt tasga. ha tarwa‑nm munn‑d kullu zġ‑tuggugt, d‑istim, usin‑tnt‑d f‑tsgiw.

⁵ ra‑tn‑tẓrt tɛjbt bahra, ar‑ikkat‑uwl‑nm s‑lfrḥ. hati ssliɛt n‑imdwan aggugnin ra‑d‑gim‑tffi, d‑tmih̬ar n‑tmizar n‑ddunit rad‑d‑srm‑aškint.

⁶ tugtt n‑irɛman ra‑tɛmmr akal‑nm. ikabarn n‑midyan d‑ɛifa rad‑d‑munn d‑win saba, asin‑d urġ d‑lbh̬ur, ar‑kullu‑tbrraḥn s‑lh̬bar ifulkin ar‑tmjjadn sidi rbbi.

igudar n‑ujnjm d‑imawn n‑tulġa

¹⁸ [yini sidi rbbi:] «ur‑sul‑ra‑tsflidt f‑kra n‑lbaḍl ġ‑wakal‑nm, ula kra ityagasn ula kra itthlkn ġ‑gr iwtta‑nm. ra‑tgt ism i‑igudar‑nm ‹ajnjm›, tgt i‑imawn‑nm ‹tulġa›.

¹⁹ tafukt ur‑sul‑ra‑tg tifawt‑nm azal, ula da‑ttirit ayyur ad‑am‑isufu d‑iyḍ. ašku sidi rbbi a‑ra‑ig tifawt‑nm idumn, ifaw gim lmajd n‑rbbi‑nm.

²⁰ ur‑sul‑ra‑darm‑ttakʷi tafukt, ula da‑n‑fllam‑iṭar‑wayyur, ašku sidi rbbi a‑ra‑ig tifawt‑nm idumn, tmman darm ussan n‑imṭṭawn.

²¹ wid ṣlaḥnin a‑rad‑kullu‑gn mddn‑nm, wrtn akal kullu mayd iftan. gan aṣṭṭa lli‑ẓẓiġ, skrġ‑tn s‑ifassn‑inu f‑a‑d‑gisn‑ssbayynġ lmajd‑inu.

²² walli gisn idrusn a‑ra‑ig tasut iggutn, d‑walli kullu imẓẓin a‑ra‑ig aqbil imqqurn. nkkin a‑igan walli illan, ra‑t‑skrġ ġ‑uzmz‑ns, ur‑ra‑n‑imaṭl.»