išaɛyah 58 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

uẓum lli‑s‑irḍa sidi rbbi

¹ [yini sidi rbbi:] «allayt awal‑nun s‑jjhd, tbrrḥm zund nnffar, tinim i‑mddn‑inu f‑ġaylli skrn yʷh̬šn, tẓim ayt‑yaɛqub f‑lɛyub‑nsn.

² hati kraygatt ass ar‑iyi‑di‑tẓallan, ar‑tdɛun is‑frḥn s‑uġaras‑inu, zund iġ‑gan aqbil iskarn afulki, zund iġ‑ur‑jji‑filn almmud n‑rbbi‑nsn. hati ar‑zġ‑gigi‑tḍalabn ad‑zzgaġ lḥqq, iɛjb‑tn a‑n‑takmurn s‑rbbi‑nsn. ar‑ttinin:

³ ‹mah̬ aylliġ naẓum ur‑tt‑ginġ‑tiwit, nssdullu ih̬fawn‑nġ ur‑d‑ginġ‑tgllbt?› han ass n‑uẓum‑nun ar‑ttrḍum ġir ih̬fawn‑nun, ar‑ttḍlamm ih̬ddamn‑nun.

⁴ ar‑ttaẓumm f‑a‑ttẓim tmmaġm, ar‑tkkatm i‑ngratun s‑ukkʷim n‑lbaḍl. wan uẓum‑an tskarm ġ‑uwssan‑ad, ur‑akkʷ‑ra‑isslkm awal‑nun s‑ignna.

⁵ izd wan uẓum‑an ad‑riġ? is‑ra‑yyi‑iɛjb‑wass‑an ġ‑a‑issdullu bnadm ih̬f‑ns? is‑riġ a‑yadr yan i‑ugayu‑ns zund aẓẓmay, ign f‑lh̬iš d‑iġd? is‑tġalm izd ġmkan a‑iga ‹uẓum› ula ‹ass irḍan rbbi›?

⁶ «uẓum lli‑s‑rḍiġ nkki, ġmkad a‑iga. a‑tfssim timukrisin n‑tɛddiyt, trẓmm izakarn n‑ḍḍulm, tfukkum willi‑f‑iḍr lbaḍl, tssittim iskraf lli‑illan f‑mddn.

⁷ bḍu aġrum‑nk d‑wanna inġa laẓ, tšškšmt imẓlaḍ n‑tsukt s‑tgmmi‑nk, tfkt i‑wanna yaġ‑usmmiḍ ma‑ilssa. ad‑ur‑tssntalt ih̬f‑nk f‑aytmak.

⁸ d‑ġmkan a‑s‑ra‑tisfiw tifawt‑nk zund anqaš n‑tafukt, tnkr‑d gik tudrt n‑ljdid. afulki‑nk a‑rad‑ak‑izwur, iggru‑ak lmajd n‑rbbi sidik.

⁹ ra‑n‑tġrt s‑rbbi sidik, jawbġ‑ak. tgt‑n sri taġuyit, ra‑yk‑d‑rarġ: ‹ha nkki›. «iġ‑tkkist zġ‑darun taɛddiyt ula ṭiṭṭ yʷh̬šnn ula tuggʷa n‑tkrkas,

¹⁰ iġ‑a‑takkat ih̬f‑nk f‑willi yaġ laẓ ar‑tššbaɛt ul n‑imẓlaḍ, han tifawt‑nk ra‑tisfiw ġ‑tillas, iwrri dark iḍ ig zund azal.

¹¹ ra‑k‑bdda‑iguwwd rbbi sidik, ar‑ššbaɛġ ul‑nk s‑ma‑ifulkin, ar‑ssdusġ ih̬ṣan‑nk. ra‑tgt zund urti išbɛn aman, tgt zund lɛin zġ‑bdda‑ftan‑waman.»