išaɛyah 55 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ġrayt srs maḥdd‑d‑srun‑yakmur

¹ [yini sidi rbbi:] «aškat‑d a‑kullu willi yaġ irifi, aškat‑d s‑dar‑waman, yašk‑id ula wanna ur‑dar aqarid, yašk‑id a‑isġ išš. aškat‑d tsġm agʷfay d‑waman n‑waḍil bla iqaridn wala atig.

² mah̬ a‑takkam iqaridn‑nun f‑ma‑ur‑igin aġrum, ar‑ttnhatafm f‑ma‑ur‑iššbaɛn? sfldat‑iyi. sfldat tššm ma‑ifulkin, s‑ifrḥ‑uwl‑nun s‑umššu imimn.

³ rẓmat imzgan‑nun taškim‑d sri. sfldat‑iyi baš a‑twrri rruḥ‑nun tddr. rad‑didun‑skrġ lɛhd idumn s‑tayri‑nu izgan lli‑s‑qawlġ i‑dawd.

⁴ ġmklli‑t‑giġ d‑inigi i‑ayt‑tmizar, d‑ih̬f d‑unmġur i‑iqbiln n‑ddunit.

⁵ s‑ṣṣaḥt ra‑n‑taqram i‑ayt‑tmizar lli‑ur‑tssinm, azzln‑d darun iqbiln lli‑ur‑kʷn‑issinn, ašku iban‑d giwn lmajd n‑rbbi siditun da‑bdda‑illan, ig amẓlay n‑israyil.»

⁶ sigglat sidi rbbi maḥdd illa ġ‑gratun, tġrm srs maḥdd‑d‑srun‑yakmur.

⁷ wanna yʷh̬šnn, illa fllas a‑ingara d‑uġaras‑ns, ula bu‑lbaḍl a‑ibddl iswingimn‑ns. ih̬ṣṣa‑tn ad‑grawln s‑sidi rbbi baš a‑tn‑irḥm, wrrin‑d s‑rbbi‑nġ, ašku yujad ad‑asn‑iṣamḥ f‑kullu ġaylli skrn.

⁸ inna sidi rbbi: «ur‑a‑swingimġ ġmklli tswingimm, ula da‑skarġ ġmklli tskarm.

⁹ ašku ġunšk lli‑attuyn ignwan f‑wakal a‑s‑attuyn iskkirn‑inu f‑winun, attuyn ula iswingimn‑inu f‑winun.

¹⁰ ġmklli‑d‑itgguz‑unẓar d‑udfl, ur‑sul‑a‑twrrin s‑ignwan, walaynni ar‑sswan akal ard issmġi, yut s‑ujddig, ifk amud i‑umkraz ula aġrum n‑umššu,

¹¹ ġmkan a‑iga‑wawal lli‑n‑iffuġn zġ‑imi‑nu. ur‑ra‑d‑sri‑iwrri bla lfaytt, walaynni ra‑iskr maylli qṣadġ, iqḍu lġarad lli‑s‑t‑in‑uznġ.

¹² ašku ra‑tffuġm s‑lfrḥ, zwurġ‑awn s‑sslamt. idrarn d‑iwrar ġ‑umnid‑nun rad‑alln awal‑nsn ar‑ttirirn. ula iṣġarn n‑lh̬la rad‑alln ifassn‑nsn ar‑kkatn rršš.

¹³ illiġ llan isnnann, ra‑d‑gis‑tmġi tayda, ula illiġ tlla‑tskra, ra‑d‑gis‑imġi rriḥan. ġin a‑ġ‑ra‑itmjjd ism n‑‹rbbi da‑bdda‑illan›, ig tamatart idumn lli‑ur‑ra‑sar‑ifnu.»