išaɛyah 53 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ ma‑yumnn mayd‑mi‑darnġ‑sfldn? ma‑mi‑d‑iban‑ufus n‑sidi rbbi?

² hati ar‑d‑yaqlay ġ‑umnid‑ns zund lh̬lf imẓẓin, zund aẓur lli‑d‑imġin ġ‑wakal irufan. ur‑d‑gis‑ibayyn‑ufulki ula lhibt ma‑gis‑ntmnad, ur‑išwi i‑iẓri a‑t‑nttiri.

³ nḥgr‑t ngr srs, ig bu‑tguḍi imyur takrrayt. ig srnġ wad‑f‑a‑ssgrawaln mddn udmawn‑nsn. ityawḥgar, ur‑darnġ‑igi yat.

tgguz‑d fllas lɛqubit lli‑aġ‑igan

⁴ s‑ṣṣaḥt yusi nttan tikrrayin‑nġ, yall tiguḍiwin‑nġ. nġal is‑iga yan f‑illa lḥukm, yut‑t rbbi issrfufn‑t.

⁵ walaynni hati ddnub‑nġ a‑f‑ityagas, d‑lh̬ʷšanat‑nġ a‑f‑ityawbrray. tʷggz‑d fllas lɛqubit lli‑aġ‑iskrn sslamt. s‑waggasn‑ns a‑s‑njji.

⁶ ha nkkʷni zund ulli ad‑kullu‑njla, kud yan d‑illi ira. han sidi rbbi isrs‑d fllas lɛqubit lli‑aġ‑igan.

⁷ ḍlmn‑t ssrfufnn‑t, d‑ntta ur‑irẓim imi‑ns. zund alqqaġ lli‑ldin ad‑as‑ġrṣn, zund ahruy lli‑ifssan ġ‑umnid n‑willi‑t‑itlassn, ur‑irẓim imi‑ns.

⁸ ḥkamn fllas s‑lbaḍl awin‑t. ma‑ra‑yaddr tarwa‑ns? tḥudda‑yas tudrt n‑ddunit‑ad. f‑ssibt n‑lɛyub n‑mddn‑inu a‑f‑ittut.

⁹ skrn‑as amḍḍal ġ‑gr mddn ʷh̬šnnin, imun d‑bu‑wayda lliġ immut. imma ntta ur‑jji‑issyagas yan, ula kkant‑tkrkas imi‑ns.

ra‑iẓr tarwa‑ns, igatn‑uwssan‑ns

¹⁰ sidi rbbi a‑iqṣadn a‑t‑ibri, d‑nttan a‑t‑issuḍnn. walaynni lliġ ifka ih̬f‑ns a‑ih̬llṣ f‑ddnub, ra‑iẓr tarwa‑ns, igatn‑uwssan‑ns, ikmml maylli gis iqṣad rbbi da‑illan.

¹¹ ra‑iẓr ṣṣabt n‑tmmara n‑uwl‑ns iqnɛa. [yini sidi rbbi:] «ah̬ddam‑inu lli‑s‑rḍiġ, s‑twassna‑ns a‑s‑ra‑irar mddn ggutnin ad‑fllasn‑rḍuġ, yasi lɛqubit‑nsn.

¹² ra‑t‑ẓliġ a‑iḥkam, ar‑yaṭṭu timih̬ar‑ns i‑kigan. ašku ifka kullu mad‑dars ar lmut, ibidd d‑willi ffuġnin zġ‑wawal‑inu. yasi ddnub n‑mddn ggutnin, ar‑iyi‑itḍalab ad‑ṣamḥġ i‑willi ffuġnin zġ‑wawal.»