išaɛyah 52 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑kʷn‑d‑fruġ bla aqarid

¹ nkr‑d ġilad a‑ṣiyun, tnkrt‑d a‑trart lquwwa i‑ufus‑nm, tlst timlsa‑nm šwanin a‑urušalim tamdint tamẓlayt. ašku ur‑sul‑ra‑srm‑kššmn willi ḥrmnin ula willi ndsnin.

² sus ih̬f‑nm zġ‑ugdrur, tġlit tgawrt a‑urušalim, tfsit izakarn zġ‑umggrḍ‑nm a‑illis n‑ṣiyun lli‑illan ġ‑iskraf.

³ ašku ha ma‑inna sidi rbbi: «tnzam bla atig, ra‑kʷn‑d‑fruġ bla aqarid.»

⁴ ha ma‑inna rbbi siditnġ: «ġ‑isizwur skrn mddn‑inu f‑ad‑huwwdn s‑miṣr gawrn gis, tɛddan ilmma fllasn ayt‑aššur.

⁵ imma ġilad ma‑iga ġayd ijran?» yini sidi rbbi: «han kksn mddn‑inu awin‑tn bla atig. ar‑gisn‑teṭnaẓn willi fllasn iḥkamn, ar‑tḥgarn ism‑inu ass kullut.

⁶ f‑mayan a‑f‑rad‑awn‑iniġ, mddn‑inu rad‑issann ism‑inu. ġassan a‑rad‑issann izd nkki a‑t‑innan ur‑ta‑ijri. s‑ṣṣaḥt ha nkki didun.»

⁷ mnšk a‑s‑tfulki‑twada n‑walli‑d‑iftan f‑idrarn, yasi‑d lh̬bar ifulkin, ar‑itbrraḥ f‑sslamt, yawi‑d awal isshnnan, ar‑itbrraḥ f‑ujnjm, ar‑ittini i‑ṣiyun: «rbbi‑nm a‑iḥkamn.»

⁸ sfld i‑ingabaln‑nm, ulln awal‑nsn s‑lfrḥ ar‑kullu‑ttirirn, ašku ẓrant‑walln‑nsn sidi rbbi iwrri‑d s‑ṣiyun.

⁹ munat‑d ay‑ayt‑ih̬rubba n‑urušalim ar‑ttirirm, ašku sidi rbbi isshnna mddn‑ns, hati ifra urušalim.

¹⁰ imdi‑d sidi rbbi afus‑ns amẓlay ġ‑iẓri n‑kullu ayt‑tmizar. han kullu imzdġn n‑ddunit rad‑tmnadn ajnjm n‑rbbi‑nġ.

¹¹ ffuġat, ffuġat kunni zġ‑ġin, d‑ad‑ur‑tggrm i‑kra indsn. ffuġat zġ‑wammas [n‑babil], a‑willi itasin irukutn n‑rbbi, tssġusm ih̬fawn‑nun.

¹² urd s‑tizzla a‑s‑ra‑tffuġm, ula s‑trula a‑s‑rad‑di‑taškim. ašku rad‑awn‑izwur sidi rbbi, iggru‑awn rbbi n‑ayt‑israyil.

arfufn n‑uh̬ddam n‑rbbi

¹³ [yini sidi rbbi:] «hay‑ah̬ddam‑inu ra‑iḥarš. ra‑iġli ityalal yattuy bahra.

^14-15 ġunšk lli‑zġ‑gis‑ẓman mddn ggutnin, ġunškan a‑s‑ra‑gis‑tɛjjabn ayt‑tmizar ggutnin. ašku ityagas aylliġ ur‑sul‑irwas argaz, ur‑sul‑tban ṣṣurt‑ns zund tin bnadm. han igldan rad‑qqnn imi‑nsn f‑ssibt‑ns, ašku iban‑asn‑d kra ur‑jji‑asn‑t‑inni yan, issann kra lli‑mi‑ur‑jji‑sfldn ar ġilad.»