išaɛyah 51 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tifawt i‑ayt‑tmizar n‑ddunit

¹ [yini sidi rbbi:] «sfldayt‑iyi a‑willi isiggiln s‑lḥqq, a‑willi isiggiln s‑rbbi da‑illan. iniġ‑awn: ‹aggʷat‑n s‑ujarif lli‑zġ‑di‑ttyawbbaym, taggʷm‑n s‑lmɛdn lli‑zġ‑ttyawskarm.

² taggʷm‑n s‑ibrahim babatun ula sarah lli‑kʷn‑yurun.› lliġ ġriġ i‑ibrahim, hati iga waḥdut. barkġ gis, ssigatġ‑as.

³ ašku rbbi da‑illan ra‑issfjjij f‑ayt‑ṣiyun, issfrḥ imzdġn n‑ih̬rubba‑yan, irar ikalln‑nsn h̬wanin ad‑gn zund akal n‑ɛadan, irar lbur a‑irwas talɛrṣt n‑rbbi da‑illan. ġin a‑ġ‑rad‑frḥn mddn fjjijn, alln awal‑nsn ar‑tškarn ar‑ttirirn.

⁴ «sfldayt‑iyi a‑mddn‑inu, tawim‑tt gigi ay‑aqbil‑inu. ašku ra‑n‑iffuġ‑ulmmud zġ‑dari, gġ lḥqq‑inu d‑tifawt i‑ayt‑tmizar n‑ddunit.

⁵ yan kra ra‑tn‑fukkuġ, yan imikk ra‑tn‑jjnjmġ, mdiġ‑n ifassn‑inu ad‑ḥkamġ f‑ayt‑tmizar n‑ddunit. hati ar‑d‑gigi‑trjun ayt‑tsgiw n‑imdwan aggugnin, qln sri ad‑asn‑in‑mdiġ afus.

⁶ allayt alln‑nun s‑ignwan, tmnadm ula s‑wakal. han ignwan ra‑tn‑laḥ zund awwu, iršu‑wakal zund timlsit, mmtn imzdġn‑ns zund izan. imma kunni ra‑kʷn‑fukkuġ s‑ufukku idumn, jjnjmġ‑kʷn s‑ujnjm ur‑sar‑itmmin.

⁷ «sfldayt a‑willi issnn ma‑igan lḥqq, a‑willi‑mi‑ityara‑ulmmud‑inu f‑uwlawn‑nsn. ad‑ur‑tiksaḍm tirggam n‑mddn, ula da‑kʷn‑ssiwidnt nnɛlat‑nsn.

⁸ ašku ra‑tn‑tšš‑tuwkka zund ibrdan, tšš‑tn tunya zund taḍut. imma kunni ra‑kʷn‑fukkuġ s‑ufukku idumn, jjnjmġ‑kʷn s‑ujnjm lli‑rad‑bdda‑yili i‑kullu tasutin.»

⁹ nkr‑d ġilad a‑sidi rbbi, tnkrt a‑trart lquwwa i‑ufus‑nk, ġmklli tnkrt ġ‑zman dar tasutin lli‑zrinin. is‑urd kiyin a‑irẓan ‹raḥab›, tfnut lhišt‑an imqqurn?

¹⁰ is‑urd kiyi a‑izzwan aman dranin, tskrt ġ‑wammas n‑umda aġaras ma‑ġ‑a‑zrayn mddn lli‑di‑tfukkit?

¹¹ hati rad‑d‑wrrin willi‑d‑ifra sidi rbbi, aškin‑d s‑ṣiyun ar‑ttirirn. rad‑asn‑yili lfrḥ ur‑sar‑itmmin. isaɛdiyn d‑imbarkiyn a‑rad‑gn, trwl‑zġ‑gisn‑tndra ula taguḍi.

¹² [yini sidi rbbi:] «nkkin ayad, giġ walli‑kʷn‑isshnnun. ma‑kʷn‑yaġn aylliġ a‑ttiksaḍm mddn lli‑itmmtatn ula bnadm da‑izrayn zund tuga,

¹³ tettum rbbi siditun lli‑kʷn‑ih̬lqn, ifsr ignwan izzugz llsas n‑wakal, ar‑ttrgigiym s‑tksaḍ ass kullut zġ‑lġaḍab n‑walli fllawn itɛddan yiri a‑kʷn‑ihlk? ma‑iga akkʷ nttan ula lġaḍab‑ns?

¹⁴ imikk s‑di‑tyawfsayn willi ityamaẓn. ur‑rad‑mmtn ula gguzn s‑umḍḍal ula rad‑asn‑laḥ aġrum.

¹⁵ ašku nkkin a‑igan walli bdda illan, gġ rbbi‑nun. gġ walli issduyyn amda aylliġ a‑nddrnt taḍangiwin‑ns. ism‑inu iga ‹wad bdda illan›, gġ rbbi n‑lmlayka.

¹⁶ ha‑yyi giġ‑n iwaliwn‑inu ġ‑imi‑nk, ssntalġ‑k s‑umalu n‑ufus‑inu. ha‑yyi ẓẓiġ‑n ignwan ġ‑illi‑asn‑igan, zzugzġ kullu llsas n‑wakal, iniġ i‑ayt‑ṣiyun: ‹kunni a‑igan mddn‑inu.› »