išaɛyah 50 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lliġ‑n‑ġriġ ur‑iyi‑d‑ijawb yan

¹ ha ma‑inna sidi rbbi: «is‑tġalm is‑friġ i‑mddn‑inu ġmklli ifrru‑urgaz i‑tmġart‑ns? manza tabrat‑nun n‑lfra? is‑tġalm is‑kʷn‑zznziġ a‑tgm ismgan, ġmklli izznza‑urgaz tarwa‑ns i‑tsmugit? walaynni f‑ssibt n‑ddnub‑nun a‑f‑udjiġ wiyyaḍ a‑kʷn‑amẓn awin‑kʷn. ttyattaym f‑ssibt n‑lh̬ʷšanat‑nun.

² mad‑darun‑illan? lliġ‑n‑uškiġ ur‑n‑ufiġ yan. lliġ‑n‑ġriġ ur‑iyi‑d‑ijawb yan. inyat‑iyi, is‑igzzul‑ufus‑inu aylliġ ur‑iẓḍar a‑kʷn‑ifukku? is‑ḍɛfġ aylliġ ur‑ẓḍarġ a‑kʷn‑jjnjmġ? hati umrġ amda s‑iqqur, rarġ asif ig lbur, d‑islman bla aman da‑tȷ̈̇ȷ̈̇un, mmtn s‑irifi.

³ hati da‑dalġ ignwan s‑tillas, sslsġ‑asn lh̬iš iḍlan.»

sidi rbbi irẓm imzgan‑inu

⁴ ifka‑yyi‑d sidi rbbi‑nu ils n‑yan itlmadn, f‑ad‑issanġ man iwaliwn s‑rad‑ssdusġ wanna irmin. ass f‑wass ar‑iyi‑d‑issfaq zikk zikk, ad‑sfldġ i‑ma‑yyi‑d‑isslmad.

⁵ sidi rbbi‑nu irẓm imzgan‑inu. ur‑t‑ɛṣiġ ula gllbġ tiġurdin.

⁶ ha‑yyi giġ‑n tadawt‑inu i‑willi‑yyi‑ikkatn, gġ‑n imudal i‑willi‑yyi‑ibjjrn tamart. ur‑dilġ udm‑inu f‑willi‑yyi‑irggmn ar‑d‑flla‑ssufusn.

⁷ sidi rbbi da‑illan a‑igan amɛwan‑inu, ur‑jji‑nḥaššamġ. zzgaġ udm‑inu zund aẓru iqqurn. ssnġ is‑ur‑rad‑nḥaššamġ.

⁸ hati illa didi walli‑yyi‑issbrran. wanna iran a‑didi‑iẓi, inyat‑as a‑didi‑imnaggar udm s‑uwdm. d‑wanna sri yaštkkan, inyat‑as a‑d‑inkr iṣrḍ‑iyi.

⁹ ha sidi rbbi da‑illan, nttan a‑yyi‑itɛawann. manwa iẓḍarn a‑flla‑izzga aṣraḍ‑ns? hatni rad‑kullu‑balan zund aqššab, tšš‑tn tunya.