išaɛyah 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

amarg f‑igr n‑waḍil

¹ rad‑asiġ amarg f‑uḥbib‑inu, ig amarg n‑tayri f‑igr‑ns n‑waḍil. aḥbib‑inu iṭṭaf igr n‑waḍil f‑uwrir bahra ijjin.

² igllb akal‑ns, issitti iẓran, iẓẓu gis aṣġar n‑waḍil ifulkin, ibnu yan lbrj ġ‑tuẓẓunt‑ns, iġza gis ula lmɛṣṣrt. irju‑n gis a‑iskar aḍil imimn, walaynni wasmmum kad‑as‑iga.

³ ġilad a‑imzdġn n‑urušalim d‑ayt‑yahuda, ḥkamat ġ‑griyi d‑igr‑inu n‑waḍil.

⁴ ma‑sttin‑ikkan ih̬ṣṣa igr‑inu n‑waḍil ur‑as‑t‑skirġ nkki? lliġ‑n‑gis‑rjiġ a‑iskar aḍil imimn, mah̬ a‑iskar wasmmum?

⁵ ġilad rad‑awn‑mlġ ma‑rad‑skrġ i‑igr‑inu n‑waḍil. rad‑kksġ ifrig‑ns a‑t‑šttan luḥuš, h̬luġ tissgʷar‑ns a‑fllas‑ttakʷln mddn.

⁶ ra‑t‑rarġ a‑iqqar, ur‑sul‑ra‑yaf ma‑t‑itzbarn ula ma‑t‑itnqašn. taskra d‑isnnann a‑ra‑gis‑itmġay. uṣṣuġ ula timdliwin a‑ur‑d‑fllas‑tlaqnt i‑unẓar.

⁷ ašku ayt‑israyil a‑igan igr n‑waḍil n‑rbbi n‑lmlayka, gn ayt‑yahuda aṣġar lli‑iẓẓa ifrḥ srs. irju‑n gisn ad‑skarn s‑lḥqq, imil yaf‑tn‑in ar‑darsn‑tffin idammn n‑bnadm. irju‑n gisn afulki, yaf‑tn‑in ar‑fllasn‑ssġuyyun mddn.