išaɛyah 49 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑ilkm‑ujnjm ar ttmi n‑ddunit

¹ sfldat‑iyi ay‑ayt‑tamiw n‑imdwan, tawim‑tt ġ‑wawal‑inu ay‑ayt‑tmizar aggugnin. iġra‑yyi‑d sidi rbbi ġ‑waḥlig n‑inna, iẓli ism‑inu ur‑ta‑lulġ.

² iskr ġ‑imi‑nu tuzzalt imsidn, issntal‑iyi s‑umalu n‑ufus‑ns. irar‑iyi zund iẓḍi ifrsn, iḥḍu‑iyi ġ‑uqrab‑ns.

³ yini‑yyi: «kiyi a‑igan ah̬ddam‑inu a‑israyil, ra‑gik‑ibayyn lmajd‑inu.»

⁴ imma nkki rurġ‑as: «ha‑yyi nhatafġ bla lfaytt. gġ‑n tiqqi‑nu, ur‑qḍiġ walu. ur‑sugirġ yat.» walaynni sidi rbbi a‑rad‑iyi‑izzga lḥqq. s‑ṣṣaḥt ra‑yyi‑ijaza rbbi‑nu.

⁵ ġilad isawl‑iyi‑d sidi rbbi. iga walli‑yyi‑iskrn ġ‑waḥlig n‑inna ad‑gġ ah̬ddam‑ns, skrġ sslamt ġ‑gras d‑ayt‑yaɛqub, sswrriġ‑d ayt‑israyil s‑dars. hati ɛzzaġ ġ‑iẓri n‑rbbi da‑illan. issdus‑iyi rbbi‑nu s‑lquwwa‑ns.

⁶ yini‑yyi: «s‑lḥqq tgit ah̬ddam‑inu f‑a‑tssbiddt tiqbilin n‑yaɛqub f‑iḍarn‑nsnt, tsswrrit‑d ma‑n‑sul‑iqaman ġ‑ayt‑israyil. walaynni uggʷar n‑mayan a‑ra‑tskrt. ra‑k‑gġ d‑tifawt i‑kullu timizar, f‑a‑ilkm‑ujnjm‑inu ar ttmi n‑ddunit.»

⁷ ha ma‑inna sidi rbbi lli‑d‑ifukkan ayt‑israyil, ig rbbi‑nun amẓlay. ha ma‑inna i‑yan bahra idullan, ḥgrn‑t ayt‑tmizar n‑ddunit, iwrri ig ismg dar willi ḥkamnin: «ra‑k‑akʷzn igldan nkrn, ra‑k‑ẓrn tarwa n‑igldan knun ar akal. ašku rbbi da‑illan, hati izzga awal‑ns. iẓli‑k rbbi amẓlay n‑israyil.»

rad‑d‑aškin mddn‑inu zġ‑tuggʷag

⁸ ha ma‑inna sidi rbbi: «ġ‑uzmz n‑rrḍa a‑rad‑ak‑jawbġ, ġ‑wass n‑ujnjm a‑ra‑k‑ɛawnġ. ha‑yyi gablġ‑k, ẓliġ‑k a‑tskrt lɛhd ġ‑griyi d‑bnadm, trart akal i‑mddn‑inu, tbḍut‑asn lwrt ġ‑ikalln h̬ʷlanin.

⁹ ra‑tinit i‑ayt‑lḥbs: ‹ffuġat‑d›, tinit i‑ayt‑tillas: ‹aškat‑d s‑tifawt›. rad‑ffrdn ġ‑tama n‑uġaras, ar‑tafan igʷdlan ġ‑iwrar n‑lh̬la.

¹⁰ ur‑ra‑tn‑yaġ laẓ ula fad. ur‑ra‑tn‑tḍrru‑trġi wala tut‑tn tafukt. ašku izwur‑asn ġwalli gisn iḥnnan, yawi‑tn s‑tama n‑iġbula n‑waman.

¹¹ rad‑gġ aġaras ġ‑kullu idrarn‑inu, ssasstwaġ abrid yusɛan i‑mddn‑inu.

¹² ẓrat‑tn, rad‑d‑aškin zġ‑tuggʷag, kra zġ‑tsgiw lli‑iwalan asmmiḍ, kra zġ‑tsgiw n‑umṭar n‑tafukt, kra zġ‑tamiw n‑wasif n‑nnil.

¹³ «ttirirat a‑ignwan, tfrḥt ay‑akal. tallm awal‑nun a‑idrarn, ttlqm i‑llġa. hati sidi rbbi ra‑issfjjij f‑mddn‑ns, iḥnnu ġ‑wid bahra rfufnnin.

¹⁴ imma ṣiyun ar‑sul‑ttini: ‹sidi rbbi ur‑tt‑gigi‑yiwi. hati ittu‑yyi walli igan bab n‑inu.›

¹⁵ walaynni is‑tẓḍar‑tmġart issngayn a‑tettu azzan‑ns? is‑ur‑a‑ttḥnnu ġ‑warraw n‑waḥlig‑ns? iġ‑akkʷ‑ti‑tettu nttat, ur‑ra‑km‑ttuġ nkki.

¹⁶ ha‑yyi nqšġ ism‑nm ġ‑tdikal n‑ifassn‑inu, ar‑d‑bdda‑swingimġ igudar‑nm.

¹⁷ ẓr, hati ar‑di‑tḥarrawn willi ra‑km‑ibnnu, ar‑rggʷln willi‑km‑ih̬llun.

¹⁸ all alln‑nm tmnadt, hatni ar‑d‑kullu‑tmunun aškin‑d srm. inna‑yam rbbi da‑illan, izga‑wawal‑ad zund tudrt‑inu: ‹ra‑tn‑kullu‑tlst zund nnʷqrt, tbkist srsn zund taslit.›

¹⁹ wah̬h̬a thlk‑tmazirt‑nm, issikki‑wakal‑nm, h̬lunt‑tmdinin‑nm, hati rad‑ɛmmrn ard nukmun imzdġn‑nsn. s‑ṣṣaḥt ra‑n‑zġ‑gim‑ittin ġwilli‑km‑ššanin.

²⁰ ha tarwa n‑urfufn‑nm rad‑am‑inin: ‹ẓr, hatti tnukma‑yaġ‑tmazirt‑ad. fk‑aġ ġilad mani yusɛan.›

²¹ rad‑ilmma‑ttinit d‑ih̬f‑nm: ‹ma‑yyi‑d‑kullu‑yurun tarwa‑yad? tkka‑ttin th̬wa‑yyi‑tgmmi, laḥ‑iyi arraw, ssmsrn‑iyi, ssaggugn‑iyi‑n. imma ġwid, ma‑tn‑d‑issnkrn? kkiġ‑ttin waḥduyy. mani‑d‑kkan ġwid ggutnin?› »

²² ha ma‑inna rbbi siditnġ da‑bdda‑illan: «ha rad‑allġ afus‑inu i‑ayt‑tmizar n‑ddunit, sillfġ‑n i‑iqbiln aggugnin. ntni a‑rad‑am‑d‑yasi tarwa‑nm ġ‑gr ifassn‑nsn, awin‑d istim f‑iġʷraḍ‑nsn.

²³ igldan a‑ra‑ig imqasan i‑tarwa‑nm, d‑tgldin a‑ra‑tn‑issngay. rad‑adrn i‑ih̬f‑nsn ar‑knnun s‑wakal ġ‑umnid‑nm, ar‑km‑bahra‑tuqqarn. ġakudan a‑ra‑tissant izd nkkin a‑igan ġwalli bdda illan, d‑ur‑sar‑ra‑inḥaššam wanna‑n‑gigi‑irjan.»