išaɛyah 45 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

grawlat‑d sri ay‑ayt‑tmizar

¹⁸ hay‑awal n‑rbbi da‑bdda‑illan. nttan a‑igan rbbi lli‑iskrn ignwan. iskr ula akal issngadda‑t issrṣu‑t. ur‑t‑iskir a‑ih̬wu, ašku iqṣad a‑gis‑izdġ bnadm. yini: «nkkin a‑igan rbbi da‑illan. ur‑illi abla nkki.

¹⁹ ur‑sawlġ ġ‑tntla ula ġ‑mani illasn. ur‑nniġ i‑wamud n‑yaɛqub: ‹siggilat‑iyi ġ‑mani ih̬wan.› nkki rbbi da‑illan ar‑sawalġ s‑lḥqq, ar‑ttiniġ maylli igan ṣṣaḥt.

²⁰ «munat‑d taškim‑d, a‑willi‑n‑sul‑iqaman ġ‑ayt‑tmizar n‑ddunit, takmurm‑d kullukʷn s‑dari. wa kunni‑an yusin laṣnam n‑ukššuḍ, ar‑ttẓallam i‑yan rbbi lli‑ur‑iẓḍarn a‑kʷn‑ijjnjm, nniġ‑awn ur‑tssinm yat.

²¹ sawlat f‑ih̬fawn‑nun, ar‑ttmšiwirm i‑ngratun. manwa iɛlmn ġ‑mayd izrin s‑mayd ijran ġilad? manwa‑yawn‑t‑id‑imlan zġ‑isizwur? is‑urd nkki lli‑igan rbbi da‑bdda‑illan? ur‑illi wayya bla nkki. giġ rbbi n‑lḥqq, gġ anjjam. ur illi abla nkki.

²² grawlat‑d sri tnjmm, ay‑ayt‑tmizar n‑ddunit kullutt. ašku nkkin a‑igan rbbi, ur‑illi wayyaḍ.

²³ ih̬f‑inu a‑s‑ggulliġ. awal n‑lḥqq ayd ikkan imi‑nu, ur‑ra‑d‑iwrri. nkki a‑mi‑ra‑d‑iknu kraygatt afud, iqrra‑yyi kraygatt ils

²⁴ ar‑ittini: ‹sidi rbbi waḥdut a‑ġ‑illa lḥqq ula lquwwa.› rad‑d‑sri‑aškin kullu ġwilli‑yyi‑ikurhan, hatni kullu tʷgraẓ‑tn.

²⁵ imma amud n‑israyil, nkki rbbi da‑illan rad‑asn‑fkġ lḥqq‑nsn, d‑ntni rad‑sri‑frḥn.»