išaɛyah 43 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑sfiḍġ ddnub‑nun

¹⁸ [yini sidi rbbi:] «a‑ur‑tlhum s‑ma‑izrin ula da‑tswingimm ġ‑tġawsiwin n‑zman.

¹⁹ ha‑yyi ġilad skrġ‑awn ma‑igan ljdid. hati ibda. is‑ur‑ti‑tẓrim? rad‑skrġ yan‑uġaras ġ‑lh̬la, skrġ isaffn ġ‑lbur.

²⁰ ra‑yyi‑tuqqarn luḥuš, gn‑iyt uššann nġd anɛimn. ašku ar‑akkaġ aman i‑lh̬la, zzriġ isaffn ġ‑lbur, baš ad‑ssuġ mddn‑inu imẓlayn.

²¹ gan willi skrġ i‑ih̬f‑inu ad‑tbrraḥn s‑ufulki‑nu.

²² «imma kunni ay‑ayt‑yaɛqub ur‑a‑sri‑tsiggilm, iban giwn ay‑ayt‑israyil is‑iyi‑tḥašam.

²³ ur‑sul‑a‑yyi‑di‑ttawim ulli‑nun i‑tġrṣiw jdrnin, ula da‑yyi‑ttuqqarm s‑isakmurn‑nun. nkki ur‑fllawn‑frḍġ tiwafkiw mqqurnin, ula ḍalbġ zġ‑giwn lbh̬ur iggutn.

²⁴ ur‑iyi‑tsġim aġanim imimn ula tššbaɛm‑iyi s‑tadunt n‑tġrṣiw, walaynni tssigtm flla ddnub‑nun, tssrmim‑iyi s‑lh̬ʷšanat‑nun.

²⁵ imma nkki giġ walli ra‑isfiḍ ddnub‑nun, ašku nkki a‑iran mayan, d‑ur‑sar‑rad‑ktiġ mamnk a‑tjlam.

²⁶ «inyat‑iyi kullu ma‑ijran ġ‑griyi didun a‑fllas‑nsawl, tmlm‑iyi aṣraḍ‑nun f‑a‑nẓr is‑darun lḥqq.

²⁷ han babatun amzwaru ijla, ɛṣun‑iyi ula willi‑n‑llanin s‑wawal ġ‑griyi didun.

²⁸ ġayan a‑f‑ssdulliġ inmġurn n‑tgmmi‑nun tamẓlayt, flġ ayt‑yaɛqub i‑lfna, flġ israyil i‑trggam.»