išaɛyah 42 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ah̬ddam n‑sidi rbbi

¹ [yini sidi rbbi:] «hay‑ah̬ddam‑inu lli‑usiġ, ig ġwalli ẓliġ nkki, ifrḥ‑srs‑uwl‑inu. giġ gis rruḥ‑inu, d‑nttan a‑ra‑isslkm lḥqq i‑tmizar n‑ddunit.

² ur‑ra‑itġuwwat ula da‑ittall awal‑ns ula da‑itbrraḥ ġ‑tsukt.

³ aġanim nna‑ikʷnan ur‑ra‑t‑irẓ, d‑tftilt nna‑iqrrbn a‑th̬si ur‑ra‑stt‑issns. ra‑izzga lḥqq ġ‑kraygatt mani.

⁴ ur‑ra‑irmi ula ra‑iqnḍ ard issrṣu lḥqq ġ‑ddunit. han ayt‑tmizar ġ‑tamiw n‑imdwan ar‑tqln s‑ulmmud‑ns.»

⁵ ha ma‑inna rbbi siditnġ da‑bdda‑illan, ig ġwalli iskrn ignwan ifsr‑tn, isrs akal ula kullu ma‑gis‑illan. ar‑yakka unfus i‑imzdġn n‑ddunit, ar‑d‑itazn rruḥ i‑willi gis ddrnin.

⁶ isawl nttan yini: «nkkin a‑igan ġwalli bdda illan. ġriġ‑ak ġilad a‑tzzgat lḥqq, amẓġ‑ak ġ‑ufus, gablġ‑k bdda. ẓliġ‑k a‑tskrt lɛhd ġ‑griyi d‑bnadm, tgt tifawt i‑tmizar n‑ddunit.

⁷ ra‑trẓmt alln i‑ibukaḍn, tfsit‑d i‑willi‑n‑ityamaẓn ġ‑lḥbs, tssufġ‑d ġwilli‑n‑igawrn ġ‑tillas.

⁸ nkkin a‑igan ‹wad bdda illan›, ġmkan a‑iga ism‑inu. lmajd lli‑dari‑illan, ur‑ra‑t‑yamẓ wayya, ula tulġa‑nu ur‑ra‑stt‑flġ i‑laṣnam.

⁹ maylli‑f‑sawlġ ġayd izrin, hati ijra. iniġ‑awn ġilad f‑tġawsiwin n‑ljdid, sawlġ‑awn fllasnt ur‑ta‑jrint.»

asyayt amarg n‑ljdid

¹⁰ asyayt amarg n‑ljdid i‑sidi rbbi, talġm‑t ġ‑kullu tisgiw n‑ddunit, wa‑kunni lli‑issidun f‑waman dranin, ula kullu ma‑itkkan imdwan, way‑ayt‑tamiw n‑imdwan, ula kullu ma‑gisnt‑izdġn.

¹¹ allayt awal‑nun ay‑ayt‑lbur d‑tmdinin‑nun, ula kunnin ay‑ayt‑qidar d‑iduran‑nun. asyayt llġa tfrḥm a‑imzdġn n‑salaɛ, tallm awal‑nun f‑iggi n‑idrarn,

¹² ad‑kullu‑ttmjjadm sidi rbbi, ar‑ti‑ttalġm ula ġ‑tamiw n‑imdwan.