išaɛyah 41 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑k‑asiġ s‑ufus‑inu itjhhdn

¹ [yini sidi rbbi:] «fssayt ġ‑umnid‑inu ay‑ayt‑tmizar lli‑n‑illan ġ‑tamiw n‑imdwan. zɛmat a‑iqbiln n‑ddunit, takmurm‑d sri f‑a‑di‑trarm awal. rwaḥat a‑nmun nzzga lḥqq.

² «manwa‑d‑giwn‑yiwin ġwad‑d‑yuškan zġ‑usġlay n‑tafukt, inru kullu mad‑as‑ibiddn ġ‑uġaras? manwa isllmn iqbiln ġ‑ddu‑ufus‑ns, aylliġ a‑itaḍḍr igldan ġ‑ddu iḍarn‑ns, imzi‑tn s‑uwzzal aylliġ‑zġ‑gisn‑iskr agdrur, izuzzr‑tn s‑iẓḍkan aylliġ gan zund alim,

³ iẓẓu gisn ġ‑iġarasn lli‑ur‑jji‑ikki, izri ilmma ġ‑laman.

⁴ manwa iqṣadn mayad issafu‑t? manwa yaqran i‑tasutin zġ‑isizwur? nkkin a‑t‑igan, gġ rbbi da‑bdda‑illan. gġ amzwaru, iliġ sul d‑walli iggʷran.

⁵ «ẓran‑t‑in ayt‑tmizar lli‑n‑illan ġ‑tamiw n‑imdwan, iksaḍn. ar‑trgigiyn iqbiln aggugnin n‑ddunit. ar‑kullu‑tmunun ad‑mɛawann i‑ngratsn.

⁶ kud yan izzɛam adjar‑ns, yini i‑gʷmas: ‹g‑n tiqqi‑nk.›

⁷ amzil ar‑izzɛam aṣiyyaġ. ġwalli issngaddan s‑lmṭirqa ar‑izzɛam walli ikkatn s‑imgd. ar‑ttinin i‑bab n‑llḥam: ‹ifulki mayad.› ar‑zzgan laṣnam‑nsn s‑imsmarn a‑ur‑tndudiyn.

⁸ «imma kiyi a‑israyil ah̬ddam‑inu, kiyi a‑yaɛqub lli‑ẓliġ, amud n‑ibrahim amddakkʷl‑inu,

⁹ kiyi ad‑d‑iwiġ zġ‑ttmi n‑ddunit, ġrġ‑ak‑n ġ‑tuggugt iniġ‑ak: ‹ah̬ddam‑inu a‑tgit. ẓliġ‑k, ur‑k‑filġ.›

¹⁰ ad‑ur‑tiksaḍt, ašku nkki ad‑dik‑illan. ad‑ur‑thuwwlt, ašku nkkin a‑igan rbbi‑nk. ra‑k‑ssdusġ ɛawnġ‑k asiġ‑k s‑ufus‑inu itjhhdn.

¹¹ han ġwilli‑k‑ikurhan, rad‑rẓn ḍrn. han ġwilli fllak yusin tanuwwašt, ra‑tn‑hlkġ fnuġ‑tn.

¹² iġ‑tsigglt s‑willi dik immaġn, ur‑sul‑ra‑tn‑taft. ašku ġwilli dik issnkarn imiġ, hatni laḥ‑tn ġ‑ddunit.

¹³ «nkki‑ad igan rbbi sidik, ha‑yyi umẓġ‑ak ġ‑ufus afasi iniġ‑ak: ‹ad‑ur‑tiksaḍt. ra‑k‑ɛawnġ.›

¹⁴ ad‑ur‑tiksaḍt a‑tawkka n‑yaɛqub, wala tiksaḍm a‑igllinn n‑ayt‑israyil. inna‑yawn ġwalli bdda illan: ‹ra‑kʷn‑ɛawnġ.› ašku ġwalli‑kʷn‑d‑ifran, iga‑t rbbi amẓlay n‑ayt‑israyil.

¹⁵ ra‑kʷn‑rarġ a‑tgm zund lluḥ n‑rrwa lli‑mi‑msidn‑uwh̬ṣan‑ns, f‑a‑tsrwatm idrarn tmzim‑tn, tskrm zġ‑iwrar zund alim inġdn.

¹⁶ ra‑tn‑tzuzzrm, yasi‑tn‑waḍu, tssukt‑tn‑tmziwit, tfrḥm kunni s‑rbbi da‑illan, tɛnnam s‑rbbi amẓlay n‑israyil.

¹⁷ «iġ‑ddan igllinn d‑imẓlaḍ ar‑siggiln s‑waman ur‑tn‑ufin, iqqur ils‑nsn s‑irifi, rad‑asn‑jawbġ nkki da‑igan rbbi siditsn. ur‑ra‑tn‑flġ nkki da‑igan rbbi n‑israyil.

¹⁸ rad‑d‑rẓmġ i‑isaffn ġ‑gr iẓran n‑idrarn, rẓmġ‑d i‑iġbula ġ‑wammas n‑talatin, rarġ lh̬la a‑ig timdwin n‑waman, ḥyuġ‑d akal iqqurn s‑talɛinin.

¹⁹ ġ‑lh̬la a‑ġ‑rad‑ẓẓuġ idgl, ssmġiġ‑d ikiḍu d‑rriḥan d‑iṣġarn n‑zzit. ġ‑lbur a‑ġ‑rad‑ssnkrġ tayda, ssmġiġ‑d tasaft d‑lbnz.

²⁰ f‑ad‑ẓrn mddn issann ar‑kullu‑swingimn, fhmn izd afus n‑rbbi da‑illan a‑iskrn ġmkan, issafu‑t rbbi amẓlay n‑ayt‑israyil.»