išaɛyah 40 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tabrraḥt n‑lh̬bar ifulkin

¹ «ssfjjijayt f‑mddn‑inu, tssfjjijm fllasn. inna‑t rbbi‑nun.

² sawlayt s‑urušalim s‑wawal n‑lḥnant, tġrm‑as tinim: ‹han ttmma lɛqubit lli‑fllam‑illan. iṣamḥ sidi rbbi i‑lɛyub‑nm. irur‑am kullu mad‑am‑igan f‑ddnub‑nm.›

³ ha yan‑wawal ar‑itbrraḥ ar‑ittini: ‹jjujadayt aġaras i‑sidi rbbi ġ‑lh̬la, tssnmm abrid yusɛan i‑rbbi‑nġ ġ‑lbur.›

⁴ ra‑tngadda kraygatt talat, yasstwa kraygatt adrar d‑uwrir, inm‑ugsar ula asawn, wrrin ijarifn gn azaġar.

⁵ ġakudan a‑ra‑d‑iban lmajd n‑sidi rbbi, ẓrn‑t kullu mddn.» hati sidi rbbi a‑t‑innan.

⁶ ha yan‑wawal inna: «brrḥ.» sqsaġ‑t: «ma s‑rad‑brrḥġ?» «bnadm kullut zund tuga a‑iga. tzri lhibt‑ns zund ajddig n‑lh̬la.

⁷ imil isuḍ gis rruḥ n‑sidi rbbi, s‑tsllaw tuga yasus‑ujddig‑ns. s‑ṣṣaḥt bnadm tuga ka‑iga.

⁸ tsllaw tuga yasus‑ujddig‑ns, imma awal n‑rbbi‑nġ izga bdda.»

⁹ awnat s‑udrar yattuyn, ay‑ayt‑ṣiyun, a‑ibrraḥn n‑lh̬bar ifulkin, tallm awal‑nun s‑jjhd, ay‑ayt‑urušalim, a‑ibrraḥn n‑lh̬bar ifulkin. tallm awal bla tksuḍm, tinim i‑tmdinin n‑yahuda: «ha rbbi‑nun yuška‑d.»

¹⁰ ha rbbi siditnġ yuška‑d s‑lquwwa, d‑ufus‑ns a‑ra‑iḥkam. yawi‑d dids willi ijjnjm, issmun‑d willi ganin wins.

¹¹ ra‑iks tawrut‑ns zund amksa, yasi‑d ilqqaġn ġ‑gr ifassn‑ns. ra‑tn‑yamẓ f‑idmarn‑ns, issrh̬u aġaras i‑tilli ssngaynin.

timuġra n‑rbbi da‑illan

¹² ma‑iẓḍarn a‑iɛbbr imdwan s‑uraw‑ns, issġl ignwan s‑tardazin n‑ufus? ma‑iẓḍarn a‑d‑issmun agdrur n‑ddunit ġ‑yat lɛbrt, yuwzn idrarn d‑iwrar s‑lmizan?

¹³ ma‑iẓḍarn a‑yissan rruḥ n‑sidi rbbi? ma‑igan amšawar‑ns, iml‑as ma‑iskar?

¹⁴ nttan, ma‑iḍalb ad‑as‑issfhm lmɛni? ma‑t‑isslmdn a‑iḥkam s‑lḥqq? mad‑as‑d‑issbayynn kra ur‑issin? mad‑as‑imlan a‑iskar s‑lmɛqul?

¹⁵ han iqbiln gan zund timqit iḍrn zġ‑ddlu, fssusn f‑ugdrur ittrsn f‑lmizan. yusi nttan igzirn ġ‑tuggugt n‑imdwan zund tiẓratin n‑umlal.

¹⁶ tagant n‑lubnan ur‑tqadda i‑ujddar, ula lbhaym‑ns i‑tġrṣi ijdrn.

¹⁷ kullu timizar n‑ddunit mẓẓint ġ‑iẓri‑ns. iġ‑tnt‑akkʷ‑iḥasb, ur‑rad‑dars‑gnt yat.

¹⁸ ma‑s‑ra‑tssrwasm rbbi? is‑tẓḍarm a‑tskrm ṣṣurt‑ns?

¹⁹ han yan laṣnam, lmɛllm ka‑t‑iɛdln, d‑uṣiyyaġ kad‑as‑iġʷman urġ, iskr‑as ula ssnasl zġ‑nnʷqrt.

²⁰ amẓluḍ ur‑dars ma‑yakka abla takššuṭṭ ur‑ta‑iršin, isiggl s‑lmɛllm iḥaršn ad‑as‑zġ‑gis‑iɛdl laṣnam ur‑iṭarn.

²¹ is‑ur‑tssinm? is‑ur‑tsfldm? is‑ur‑awn‑ityawnna zġ‑isizwur? is‑ur‑tfhimm mamnk ttyawskar ddunit?

²² illa yan igawrn f‑uflla n‑tkurt n‑wakal. han imzdġn‑ns gan dars zund ibršan, ifsr fllasn ignwan zund aḥayk, idl‑tn zund ah̬iyyam, ntaln mddn ġ‑ddawas.

²³ ar‑issṭar igldan, ar‑issitti ula lḥukkam n‑ddunit.

²⁴ hatni krzn amud‑nsn, ẓẓun aṣġar‑nsn, utn s‑iẓuran, imil iṣuḍ fllasn, sllawn. awin‑tn ijawan ġmklli tawin alim.

²⁵ inna rbbi amẓlay: «ma‑s‑ra‑yyi‑tssrwasm? is‑illa kra zund nkki?»

²⁶ allayt alln‑nun s‑ignwan ar‑tmnadm. manwa iskrn mayd gisn illan? ġwalli‑d‑issufuġn itran zund lɛskr, iḥṣu kraygatt yan s‑nnmra‑ns, iġr i‑kraygatt yan s‑ism‑ns, ašku iggut jjhd‑ns, tmqqur lquwwa‑ns. ur‑gisn‑laḥ yan.

²⁷ way‑ayt‑yaɛqub mah̬ a‑tsawalm? way‑ayt‑israyil mah̬ a‑ttinim: «sidi rbbi ur‑a‑iẓrra ma‑yġ‑ijrrun, d‑ur‑a‑yġ‑yakka lḥqq‑nġ.»?

²⁸ is‑ur‑tsfldm wala tssnm izd sidi rbbi a‑igan wad bdda idumn? nttan a‑iskrn ddunit ula kullu ma‑gis‑illan. ur‑a‑itrmay ula da‑itġaša. lɛaql‑ns, ur‑iẓḍar yan a‑ilkm ttmi‑ns.

²⁹ ar‑izzɛam wanna itġašan, ar‑issdus wanna iḍɛfn.

³⁰ ula iɛyyaln da‑trmayn ar‑tġašan, ula igʷilaln da‑tn‑ikkat ifikš.

³¹ imma willi‑n‑rjanin ġ‑sidi rbbi, rad‑asn‑d‑irar afud‑nsn. ra‑taylaln s‑ifrawn zund igadrn, ar‑tazzaln ur‑rmin, ftun bla tġašan.