išaɛyah 35 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑d‑wrrin willi‑d‑ifra rbbi

¹ ra‑ifrḥ lh̬la ula akal iqqurn, ifjjij lbur yut s‑ujddig.

² rad‑kullu‑buġlun zund afru, ar‑ttirirn s‑lfrḥ. ittfk‑asn lmajd zund tagant n‑lubnan, fulkin zund iwrar n‑karmal d‑šarun. ġakudan a‑rad‑ẓrn lmajd n‑rbbi da‑illan, mnadn afulki n‑rbbi‑nġ.

³ ssdusat ifassn ḍɛfnin, tzzgam ifaddn h̬wanin,

⁴ tinim i‑willi mi‑iġuwḍ‑uwl‑nsn: «zɛmat, ad‑ur‑tiksaḍm yat. ha rbbi‑nun ifta‑d a‑kʷn‑ijjnjm. ra‑yut lḥukm irar i‑kud yan f‑maylli isthlla.»

⁵ ġakudan ra‑irẓm alln n‑ibukaḍn, irẓm imzgan n‑iḍrḍar.

⁶ ra‑itakʷi‑ubiḍar zund aznkʷḍ, ar‑ittirir ula ils n‑uẓnẓum s‑lfrḥ. ha lɛyun rad‑baqqin ġ‑lbur, ftun isaffn ġ‑lh̬la.

⁷ amlal irġan ra‑ig timdwin, ig‑wakal irufan iġbula n‑waman. ġ‑illi tkkan‑uwššann, d‑illiġ a‑ttsllaw tuga, a‑ġ‑ra‑itmġay‑waẓẓmay.

⁸ ġin a‑ġ‑ra‑yili‑uġaras yusɛan, ar‑as‑ttinin ‹aġaras amẓlay›. ur‑ra‑gis‑ifttu yan indsn, yili ġir i‑willi‑t‑iran. ur‑ra‑t‑afn inafaln.

⁹ ur‑ra‑gis‑yili kra n‑izm, d‑ur‑ra‑srs‑yawn kra n‑luḥš, zund ġayan ur‑ra‑gis‑yili. imma willi‑d‑ifra rbbi, ntni a‑ra‑gis‑ifttu.

¹⁰ ašku rad‑d‑wrrin willi‑d‑ifra sidi rbbi, aškin‑d s‑ṣiyun ar‑ttirirn. rad‑asn‑yili lfrḥ ur‑sar‑itmmin. isaɛdiyn d‑imbarkiyn a‑rad‑gn, trwl‑zġ‑gisn‑tndra ula taguḍi.