išaɛyah 30 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aggjdi ġ‑uflla n‑uwrir

¹⁵ ha ma‑inna rbbi siditnġ, ig rbbi amẓlay n‑israyil: «wrryat‑d tzgam, s‑tnjmm. amnat tfssam, s‑tnram.» walaynni kunni ur‑trim,

¹⁶ tinim: «uhu, ra‑nrwl s‑iysan.» tʷġẓanm is‑ra‑trwlm. tnnam: «ra‑nazzl s‑iysan fssusnin.» walaynni rad‑fllawn‑ifsasn willi giwn ẓẓanin.

¹⁷ alf giwn a‑ra‑irwl iġ‑d‑fllawn‑yukʷi yan. rad‑kullu‑trwlm iġ‑d‑fllawn‑ukʷin smmus. ur‑ra‑giwn‑iqama abla yan, ig zund aggjdi ġ‑uflla n‑uwrir, d‑zund aɛmud n‑rraya ġ‑iggi n‑tuwrirt.

¹⁸ ašku sidi rbbi iql sul a‑giwn‑iḥnnu, inkr a‑kʷn‑irḥm. iga wad itḥkamn s‑lḥqq. imbarkiyn ad‑gan willi‑n‑gis‑rjanin.

¹⁹ rad‑zdġn mddn‑ns ġ‑ṣiyun, ur‑sul‑ra‑tallam ġ‑urušalim. iġ‑fllas‑tssmummʷim, s‑ṣṣaḥt ra‑giwn‑iḥnnu. ġakud nna‑yawn‑isfld, s‑lḥqq rad‑awn‑ijawb.

²⁰ wah̬h̬a‑yawn‑iššuša siditun tanukmut, issu‑yawn tarfufnt, hay‑amslmd‑nun ur‑sul‑ra‑n‑iḥḍu ih̬f‑ns. ra‑t‑ẓrnt‑walln‑nun,

²¹ sfldn imzgan‑nun i‑wawal zġ‑tġurdin, ġakud nna‑tgrawlm s‑ufasi nġd aẓlmaḍ, yini: «hay‑aġaras, ftwat gis.»