išaɛyah 26 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

sslamt yuwfan ula tankra s‑tudrt

¹ ġassan a‑rad‑asin amarg‑ad ġ‑tmazirt n‑yahuda: hatti tdus‑tmdint‑nġ, ašku rbbi ad‑as‑isslulliyn igudar n‑ujnjm.

² rẓmat imawn‑ns a‑d‑ikšm‑uqbil iṣlaḥn, iga‑t wad irḍan rbbi.

³ wanna izgan ġ‑nniyt‑ns, rad‑fllas‑tḥṣart s‑sslamt yuwfan ašku yumn gik.

⁴ amnat ġ‑sidi rbbi ġilad ula bdda, ašku rbbi siditnġ iga ajarif idumn.

⁵ hati izzugz‑d ayt‑uflla, issknu‑d tamdint yattuyn. iluḥ‑tt s‑wakal, ifl‑tt ġ‑ugdrur,

⁶ aḍrn‑t iḍarn n‑imẓlaḍ d‑iwurzan n‑willi ḍɛfnin.

⁷ ar‑tssnamt aġaras i‑willi‑k‑irḍan, tssasstwat taġarast i‑willi iskarn s‑lḥqq.

⁸ ar‑nfttu ġ‑uġaras n‑tnbaḍin‑nk a‑sidi rbbi, nrju‑n gik. ur‑nri abla a‑k‑nissan kiyi, nswangm‑d ma‑tskrt.

⁹ amarg‑nk a‑itaġn‑uwl‑inu ġ‑iyḍ, zikk zikk rruḥ‑inu ar‑ki‑tsiggil. ġakud nna‑d‑bannt‑tnbaḍin‑nk ġ‑ddunit, lmdn imzdġn‑ns ma‑igan lḥqq.

¹⁰ iġ‑tskrt lh̬ir i‑bu‑lh̬ʷšant, ur‑ra‑ilmd a‑izzga lḥqq. rad‑bdda‑iskar ma‑yʷh̬šnn ġ‑wakal‑ad ifulkin, ašku ur‑a‑gis‑itmnad timuġra n‑sidi rbbi.

¹¹ afus‑nk yujad a‑yut lḥukm a‑sidi rbbi, imma willi ʷh̬šnnin ur‑a‑t‑ẓrran. ml‑asn mnšk a‑s‑dark‑ɛzzan mddn‑nk, baš ad‑ḥšmn ntni, ašku lɛafiyt a‑ra‑ihlk kullu inuwwašn‑nk.

¹² fk‑aġ sslamt a‑sidi rbbi. ašku maylli kullu nskar, kiyi a‑t‑ginġ‑iskrn.

¹³ wa sidi rbbi‑nġ, han id‑siditnġ yaḍni ḥkamn ginġ, walaynni ism‑nk waḥdut a‑ntuqqar.

¹⁴ ntni kullu mmutn, ur‑rad‑daġ‑ddrn. imula ad‑gan ġila, ur‑rad‑sul‑biddn. ašku lhalak a‑s‑tn‑tutt, ur‑sul‑a‑tn‑d‑kttin mddn.

¹⁵ hati tssmqqurt aqbil a‑sidi rbbi, hati tssmqqurt aqbil, tbayyn‑d‑gis‑tmuġra‑nk, tssusɛut tamazirt, tdḥit iwtta‑ns.

¹⁶ wa sidi rbbi, ġ‑uzmz n‑tnukmut a‑ġ‑wrrin ar‑k‑siggiln, ġakud lliġ‑tn‑tutt s‑lɛqubit, a‑k‑ḍalbn s‑nniyt.

¹⁷ zund tamġart irbbun, tlkm tizi‑ns a‑taru, ar‑ttmussu s‑ingaẓn ar‑tssġuyyu, ġmkan a‑nga ġ‑umnid‑nk a‑sidi rbbi.

¹⁸ ar‑nrbbu ar‑ntmussu s‑ungaẓ, naru ilmma aḍu. ur‑nsugir yat ġ‑wakal‑nġ, wala nuru bnadm a‑iɛmmr ddunit.

¹⁹ willi‑ak‑mmutnin rad‑wrrin ddrn, tnkr‑d ddat n‑kraygatt yan. wa imzdġn n‑wammas n‑wakal, ttfaqayt ar‑ttirirm s‑lfrḥ. ašku ġmklli‑di‑tssmġay‑tġli ijddign, ġmkan a‑ra‑d‑issufġ‑wakal willi gis ityawmḍaln.