išaɛyah 25 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑issitti lmut isfiḍ imṭṭawn

¹ wa sidi rbbi kiyi a‑igan rbbi‑nu, ra‑k‑tmjjadġ ar‑ttalġġ ism‑nk. hati tskrt lɛjayb lli‑tnuwwat zġ‑isizwur, tssafut maylli yad tqṣadt.

² trurt timdinin gnt uh̬ribn, trart iġʷrman dusnin gn igudiyn n‑iẓran. th̬lut lbruj ġ‑tmdinin n‑iġribn, ur‑ra‑sar‑ttbnun.

³ ra‑k‑tmjjadn iqbiln tjhhdnin, iksaḍn zġ‑gik ayt‑tmdinin mqqurnin n‑tmizar qjrnin.

⁴ hati tgit adġar n‑laman i‑imẓlaḍ, tgt ula adġar n‑laman i‑willi illan ġ‑tnukmut, tgt antal ġ‑lfrtunt, tgt ula amalu ġ‑trġi n‑tafukt. han aṣwaḍ n‑willi qjrnin iga zund ḍḍrbat n‑ijawan ġ‑uġʷrab,

⁵ ig zund tiqiqt n‑tafukt ġ‑wakal iqqurn. imma kiyi ar‑tssfssat ijjijn n‑iġribn. ġmklli ttzuzwu‑trġi iġ‑fllas‑tzri‑tmdlut, ġmkan a‑s‑a‑ttbbit isfurrugn n‑willi qjrnin.

⁶ f‑uwrir‑ad [n‑urušalim] a‑f‑ra‑iskr sidi rbbi n‑lmlayka imnsi imqqurn i‑ayt‑tmizar n‑kullu ddunit, ar‑šttan kullu ma‑ifulkin, ar‑ssan aman n‑waḍil imimn, ar‑šttan ma‑ifulkin iḍni, ar‑ssan aman n‑waḍil išwan.

⁷ ġ‑uwrir‑ad a‑ġ‑ra‑ikks lkʷfn lli‑ilulliyn i‑kullu ddunit, issitti lh̬amiya lli‑idln kullu timizar.

⁸ ra‑issitti lmut, d‑ur‑sar‑sul‑tlli. isfiḍ rbbi siditnġ imṭṭawn zġ‑kullu udmawn, ikks lɛar f‑mddn‑ns ġ‑ddunit kullutt. hati sidi rbbi ayd isawln.

⁹ ġassan a‑ra‑ttinin: «ẓrat, rbbi‑nġ ayad. nkka‑ttin nrja‑n gis ad‑aġ‑ijjnjm. sidi rbbi ayad, nkka‑ttin nrja‑n gis. imma ġilad, yuška‑d‑unjjam‑ns. nfrḥ s‑lfrḥ iggutn.»

¹⁰ f‑uwrir‑ad a‑f‑ra‑isrs sidi rbbi afus‑ns, yaḍr anuwwaš‑ns ġmklli ityaḍar‑walim ġ‑umazir.

¹¹ ra‑ifsr ifassn ġ‑umdduz ar‑itẓalla, ġmklli‑tn‑ifsr‑uɛwwam ġ‑waman. imma sidi rbbi ra‑n‑iluḥ isfurrugn‑ns ula ššṭart n‑ifassn‑ns,

¹² issknuki igudar attuynin n‑tmdinin‑ns, iluḥ‑tn s‑wakal, ifl‑tn ġ‑ugdrur.