išaɛyah 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lḥukm n‑rbbi f‑ugllid n‑aššur

¹² ġakud nna ikmml siditnġ kullu ma‑ra‑iskr ġ‑uwrir n‑ṣiyun ula tamdint n‑urušalim, ra‑yut lḥukm f‑ugllid n‑aššur lli‑ittalġn ih̬f‑ns ar‑issimġur agayu‑ns.

¹³ ašku ar‑ittini: «nkki a‑stt‑iskrn s‑lquwwa n‑ufus‑inu d‑tḥkimt n‑ih̬f‑inu, ašku giġ nkki afhim. ssittiġ iwtta i‑iqbiln n‑ddunit, kksġ‑asn‑d ma‑illan ġ‑lh̬zin‑nsn. zund azgr itjhhdn a‑s‑ssknukiġ ayt‑lɛrš.

¹⁴ mdiġ‑n afus‑inu s‑ugdf, afġ‑n gis lknuz n‑tmizar. ġmklli usin mddn tiglay lli‑fln igḍaḍ, ġmkan a‑s‑d‑kkisġ timih̬ar n‑ddunit. ur‑illi ma‑issussn ifrawn‑ns, ula ma‑irẓmn aqabbu‑ns ar‑issġuyyu.»

¹⁵ walaynni is‑ra‑itfššiš‑ušaqqur f‑walli srs itbbin? nġd is‑ra‑issfurrug lmnšar f‑walli‑t‑yusin? izd aɛmud a‑issmussun walli‑t‑ittalln? nġd aɛkkaz a‑itamẓn ġ‑ġwalli ur‑igin akššuḍ?

¹⁶ han siditnġ rbbi n‑lmlayka ra‑yazn aṭṭan ma‑iššhrašn iɛskriyn‑ns dusnin, issrġ lɛafiyt ġ‑wammas n‑tmuġra‑ns zund tasafut ijddrn.

¹⁷ tifawt n‑israyil a‑ra‑ig asafu, ig‑umẓlay‑ns afdaddu n‑lɛafiyt. ġ‑yan‑wass a‑ġ‑ra‑tjddr isnnann‑ns, tšš ula taskra‑ns.

¹⁸ tagant ijjin d‑wakal ibuġlan, sidi rbbi a‑ra‑ihlk kullu ma‑gisn‑illan, ġmklli tmddu ṣṣaḥt n‑wanna yuḍn ard immt.

¹⁹ ra‑yidras ma‑iqaman ġ‑tṣġarin n‑tagant, ard‑tnt‑iḥasb‑uḥšmi imẓẓin yara‑tnt.

²⁰ ġ‑uwssan‑an ha ġwilli qamanin ddrn ġ‑ayt‑israyil, d‑willi njmnin ġ‑ayt‑yaɛqub, ur‑sul‑rad‑ttkln f‑walli‑tn‑ikkatn, ašku rad‑ttkln s‑nniyt f‑sidi rbbi amẓlay n‑ayt‑israyil.

²¹ imikk‑an iqaman zġ‑ayt‑yaɛqub, imikk‑an iqaman a‑ra‑d‑iwrri s‑dar rbbi itjhhdn.

²² wah̬h̬a da‑ttigatn ayt‑israyil zund amlal ġ‑tama n‑umda, ur‑ra‑d‑zġ‑gisn‑iwrri abla ma‑idrusn. lhalak a‑fllasn‑ityaran, d‑lḥqq a‑ra‑tn‑isfiḍ.

²³ han siditnġ rbbi n‑lmlayka ra‑ihlk kullu ma‑illan ġ‑tmazirt‑ad, ašku ġayan a‑fllas‑ityaran.

²⁴ ha ma‑inna siditnġ rbbi n‑lmlayka: «wa mddn‑inu n‑ayt‑ṣiyun, ad‑ur‑tiksaḍm zġ‑ayt‑aššur. wah̬h̬a da‑kʷn‑kkatn s‑uṣllab, asin srun akuray, ġmklli‑awn‑skrn ayt‑miṣr ġayd izrin,

²⁵ yan imikk ra‑ikmml h̬ziyt‑inu fllawn, iwrri yut‑tn ntni ard kullu tthlkn.»