išaɛyah 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tijli n‑ayt‑yahuda

¹ maylli‑n‑iẓra išaɛyah yus n‑amuṣ, iban‑as‑d ġ‑uwssan n‑ɛuzziyah d‑yutam d‑aḥaz d‑ḥizqiyah lli‑ganin igldan n‑ayt‑yahuda. iẓra ma‑ra‑ijru i‑tmazirt n‑yahuda ula tamdint n‑urušalim.

² sfldayt a‑ignwan, tgt‑n amẓẓuġ ay‑akal, ašku sidi rbbi ayd isawln: «rbbaġ tarwa ssimġurġ‑tn, imma ntni hatni ɛṣan‑iyi.

³ azgr issn bab‑ns, ula aġyul issn asds n‑sidis, walaynni ayt‑israyil ur‑ssinn, mddn‑inu ur‑fhimn.»

⁴ taguḍi a‑ġ‑tllam, ay‑aqbil ijlan. taguḍi a‑ġ‑tllam, a‑lqum iẓẓayn s‑ddnub, amud n‑lh̬ʷšant, tarwa n‑lhalak. fln rbbi da‑bdda‑illan, ḥgrn amẓlay n‑ayt‑israyil, gllbn ntni wrrin tiġurdin.

⁵ is‑sul‑tram akuray aylliġ sul tġuwwġm? ihrš ih̬f‑nun bahra, d‑uwl kullut itġaša.

⁶ zġ‑ttmi n‑uḍar ar iggi n‑ih̬f, laḥ‑asn ṣṣaḥt. gan kullu ibrrayn d‑iḥbba, msln ula s‑idammn n‑tiggas. ur‑illi ma‑tn‑isiridn ula iqqn‑asn tiggas ula ma‑tn‑issilwiġn s‑zzit.

⁷ tamazirt‑nun th̬wa, jdrnt‑tmdinin s‑lɛafiyt. ar‑šttan ibrraniyn ikalln‑nun ġ‑lgddam n‑walln‑nun. th̬wu‑tmazirt, hlkn‑tt iġribn.

⁸ han tamdint n‑ṣiyun [urušalim] tbidd waḥdutt, zund taḥšušt iqaman ġ‑igr n‑waḍil, zund aɛriš iqaman ġ‑uwrti n‑lmnun, zund tamdint lli‑mi‑sutln ikabarn n‑iɛskriyn.

⁹ mra is‑urd sidi rbbi n‑lmlayka a‑ginġ‑ifln yan imikk iddrn, lukun nfna ġmklli tfna‑tmdint n‑sadum ula tamdint n‑ɛamura.

¹⁰ sfldayt i‑wawal n‑rbbi da‑bdda‑illan, a‑imġarn‑ad lli‑igan zund win sadum. sfldayt i‑ulmmud n‑rbbi‑nġ, ay‑ayt‑tmdint‑ad lli‑igan zund ayt‑ɛamura.

¹¹ inna‑yawn sidi rbbi: «mad‑iyi‑illan ġ‑tugtt n‑tġrṣiw‑ad lli‑yyi‑takkam? yuwda‑yyi zġ‑isakmurn n‑izamarn jdrnin ula zġ‑tadunt n‑lbhaym jjinin. ur‑a‑yyi‑ssfraḥn idammn n‑izgarn d‑ilqqaġn d‑ibukirn.

¹² «ma‑kʷn‑iḍalbn a‑di‑ttakʷlm ġ‑isaragn n‑tgmmi‑nu, ġakud nna‑di‑tkšmm a‑d‑sri‑takmurm?

¹³ ur‑giwn‑riġ a‑di‑ttawim tiwafkiw n‑lbaḍl. han ula lbh̬ur‑nun, ḥašaġ‑t. ula tamunt f‑tlalit n‑wayyur d‑uwssan n‑usunfu d‑imnaggarn n‑tṣbiḥ, ur‑ḥmilġ lɛibada n‑willi ʷh̬šnnin.

¹⁴ tamunt f‑tlalit n‑iyrn ula lɛyad lli‑f‑a‑ttḥiyyalm, ula ntni iḥaša‑tn‑uwl‑inu. iẓẓay kullu ġayan flla. issrmi‑yyi‑uẓaẓu‑an usiġ.

¹⁵ ġakud nna‑d‑sri‑tullm ifassn‑nun, ssanfġ‑awn alln‑inu. wah̬h̬a da‑ttẓallam bahra, ur‑rad‑awn‑sfldġ, ašku ɛmmrn ifassn‑nun s‑idammn n‑bnadm.

¹⁶ sirdat zwar ulawn‑nun tġusm, tkksm zġ‑iẓri‑nu lh̬ʷšanat lli‑ttsalam. tbbim iskkirn‑nun ʷh̬šnnin,

¹⁷ tlmdm a‑tskarm afulki, tzzgam lḥqq, tjjnjmm ula wanna iḍrn ġ‑ḍḍulm, tssntlm igigiln, tbiddm d‑thjjalin.»

¹⁸ inna‑yawn rbbi da‑bdda‑illan: «aškayt‑d a‑nmšawar i‑ngratnġ. wah̬h̬a bahra zggʷaġn ddnub‑nun, ra‑tgm umliln zund adfl. wah̬h̬a tġʷmam s‑uzggʷaġ, ra‑tṣfum zund taḍut.

¹⁹ iġ‑tnuwwam a‑sri‑tsflidm, ra‑tšttam zġ‑tmih̬ar n‑wakal.

²⁰ walaynni iġ‑tagʷim, nġd tqamam tɛṣam, han uzzal a‑ra‑kʷn‑imgr. rbbi da‑illan ayd isawln.»

asmammi f‑urušalim

²¹ ẓrat tamdint lli‑sttin‑ikkan tga tamġart n‑laman, hatti twrri tga tamggant. tazdġt n‑mddn ɛdlnin, hatti tɛmmr s‑willi nqqanin.

²² nnʷqrt‑nm twrri tga asttif. aman n‑waḍil‑nm wrrin lmusn.

²³ han inmġurn‑nm wrrin ɛṣan gn imddukkʷal n‑imh̬h̬arn. tɛzza darsn tikki, ar‑tḍfurn tismġurin. ur‑a‑ssntaln igigiln ula da‑sflidn i‑uṣraḍ n‑thjjalin.

²⁴ ġayan a‑f‑inna siditnġ rbbi n‑lmlayka, igan rbbi itjhhdn n‑ayt‑israyil: «ha‑yyi rad‑thnnuġ zġ‑inuwwašn‑inu, rarġ i‑imḍaḍḍn‑inu f‑mad‑iyi‑skrn,

²⁵ allġ fllawn afus‑inu, jdrġ giwn irkan lli‑kʷn‑imsln, ssittiġ zġ‑giwn kullu ma‑igan asttif.

²⁶ rad‑awn‑fkġ lḥukkam fulkinin zund imzwura, rarġ‑awn‑d imšawarn zund willi zrinin. rad‑awn‑ttinin mddn «ayt‑tmdint lli‑irḍan rbbi, ayt‑tmdint lli‑ġ‑illa laman.»

²⁷ ayt‑ṣiyun, s‑lḥqq a‑s‑ra‑kʷn‑ifukku sidi rbbi, d‑ufulki a‑ra‑yili i‑wanna‑d‑giwn‑iwrrin zġ‑lh̬ʷšant.

²⁸ imma imɛṣan d‑imjlan ra‑tn‑kullu‑ihlk, ifnu willi srs irurn tadawt.

²⁹ «han ra‑kʷn‑tigʷraẓ f‑iṣġarn n‑igg lli‑dar‑ttɛbadm, tḥšmm ula f‑uwrtan lli‑tẓlaym i‑larwaḥ.

³⁰ ašku ra‑tgm zund aṣġar n‑igg mi sllawn ifrawn‑ns, zund urti ġ‑ur‑llin‑waman.

³¹ han ġwilli tjhhdnin rad‑gn zund lkttan, gn iskkirn‑nsn zund amdggʷig. hatni s‑sin rad‑kullu‑jdrn, d‑ur‑illi ma‑ra‑tn‑issh̬si.»