irmiyah 44 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑rbbi i‑willi irwln s‑miṣr

¹ izri ma‑izrin yašk‑id‑wawal i‑irmiyah f‑ssibt n‑ayt‑yahuda lli‑igawrn ġ‑tmazirt n‑miṣr, ilin ġ‑tmdint n‑migdul d‑taḥfanḥis d‑mamfis ula tamazirt n‑fatrus.

² yini: «ha ma‑inna rbbi n‑lmlayka da‑bdda‑illan, ig rbbi n‑israyil. hati tẓram kullu tagat lli‑n‑zzugzġ f‑urušalim ula timdinin n‑yahuda kullutnt. hatnti ġassad h̬ʷlant, ur‑gisnt‑izdġ yan,

³ f‑ssibt n‑tugtt n‑lh̬ʷšant lli‑skrn. ssṭiyrn‑iyi‑tt bahra ašku wrrin ar‑tbh̬h̬arn ar‑tqasan id‑rbbi iġribn lli‑ur‑yad‑ssinn ntni, ula tssnm‑tn kunni ula imzwura‑nun.

⁴ ar‑awn‑in‑taznġ ġakudan kullu ih̬ddamn‑inu lanbiya, zaydġ ar‑tn‑in‑sul‑taznġ, ar‑awn‑ttiniġ: ‹a‑ur‑tskarm lh̬ʷšant‑an ijlh̬n lli‑kurhiġ bahra.›

⁵ walaynni ur‑a‑sri‑sflidn ula da‑stt‑gigi‑tawin. ur‑rin ad‑fln lh̬ʷšant lli‑salan ula bbin lbh̬ur f‑id‑rbbi yaḍni.

⁶ iznd fllasn ġakudan lġaḍab‑inu, ffin‑in iriyn‑inu f‑tmdinin n‑yahuda d‑iswak n‑urušalim, aylliġ h̬ʷlan kullu, gn ih̬rubba sul s‑ġilad.

⁷ «sfldat ġilad i‑ma‑inna rbbi n‑lmlayka da‑bdda‑illan, ig rbbi n‑ayt‑israyil. mah̬ ad‑bahra‑tsshrašm ih̬f‑nun s‑lh̬ʷšant‑an imqqurn f‑a‑thlkm irgazn d‑tmġarin d‑iḥšmiyn d‑wazzann zġ‑ayt‑yahuda, ard ur‑sul‑giwn‑iqama yan?

⁸ mah̬ a‑yyi‑stt‑sul‑tssṭiyarm s‑iskkirn n‑ifassn‑nun, ar‑daġ‑ttbh̬h̬arm i‑id‑rbbi iġribn, ula ġ‑wakal n‑miṣr lli‑s‑tddam ġilad tzugm gis. is‑tram ad‑kullu‑tfnum mddn‑nun, ar‑fllawn‑ttinin ayt‑tmizar n‑kullu ddunit: ‹lɛar ula h̬ziyt a‑tgam›?»