irmiyah 43 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yakuf irmiyah s‑miṣr

¹ isslkm irmiyah i‑mddn‑an kullu iwaliwn lli‑as‑d‑imla rbbi siditsn, yini‑asn kullu ma‑f‑tn‑yuṣṣa rbbi siditsn.

² inkr‑d ilmma ɛzaryah yus n‑hušaɛyah d‑yuḥanan yus n‑qariḥ, d‑wiyyaḍ mqqurnin dar ih̬f‑nsn, inin i‑irmiyah: «kiyi bu‑tkrkas a‑tgit. urd rbbi siditnġ a‑k‑yuṣṣan a‑ttinit: ‹ad‑ur‑tddum s‑miṣr a‑n‑gis‑tzugm.›

³ awal‑an, han baruh̬ yus n‑niriyah ad‑ak‑t‑innan, baš ad‑aġ‑n‑tluḥt ġ‑ufus n‑ayt‑kaldan f‑ad‑aġ‑nġn nġd a‑yġ‑ssittin s‑babil.»

⁴ ur‑iri yuḥanan yus n‑qariḥ d‑iriyasn n‑iɛskriyn d‑wiyyaḍ kullutn ad‑sfldn s‑wawal n‑sidi rbbi, agʷin ad‑qaman ġ‑wakal n‑yahuda.

⁵ iddu yuḥanan yus n‑qariḥ d‑iriyasn n‑iɛskriyn kullutn, awin kullu willi‑d‑iqaman zġ‑ayt‑yahuda d‑willi‑d‑iwrrin zġ‑tmizar yaḍni lli‑s‑akutn.

⁶ awin irgazn d‑tmġarin d‑tarwa, awin istis n‑ugllid ula kullu willi ifl nabuzaradan ariyas n‑waḍafn ġ‑ddu‑ufus n‑gadalyah yus n‑aḥiqam yus n‑šafan. awin ula nnabi irmiyah d‑baruh̬ yus n‑niriyah.

⁷ ddun s‑tmazirt n‑miṣr ašku agʷin ad‑sfldn s‑wawal n‑sidi rbbi, lkmn tamdint n‑taḥfanḥis.