irmiyah 42 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

a‑ur‑trwlm s‑miṣr

¹ izri ma‑izrin munn‑d iriyasn n‑iɛskriyn [n‑ayt‑yahuda] ġ‑dar nnabi irmiyah. illa gisn yuḥanan yus n‑qariḥ, d‑yazanyah yus n‑hušaɛyah, d‑wiyyaḍ kullutn zġ‑willi mẓẓinin ar willi mqqurnin.

² inin‑as: «ġir a‑tsfldt i‑ma‑zġ‑gik‑nḍalb. ẓẓall i‑sidi rbbi da‑igan rbbi‑nk, tḍalbt‑t f‑ssibt‑nġ nkkʷni ula f‑kullu ġwid iqaman ġ‑tmazirt. ašku ġmkad tmnadt, hati idrus ma‑ginġ‑iqaman zġ‑willi yadlli ggutnin.

³ ḍalb sidi rbbi da‑igan rbbi‑nk ad‑aġ‑iml aġaras a‑t‑nḍfur, issbayyn‑aġ ma‑fllanġ‑illan a‑t‑nskr.»

⁴ isawl‑d nnabi irmiyah yini‑asn: «ha‑yyi sfldġ‑awn. rad‑ḍalbġ sidi rbbi da‑igan rbbi‑nun, ġmklli‑s‑tnnam, iniġ‑awn kullu ma‑yyi‑d‑imala. ur‑rad‑fllawn‑ssntlġ yat.»

⁵ inin ntni i‑irmiyah: «a‑ig sidi rbbi inigi iṣḥan, izzga fllanġ lḥqq, iġ‑ur‑nskir kullu s‑iwaliwn nna‑ra‑yk‑d‑iml sidi rbbi‑nk f‑ssibt‑nġ.

⁶ ig‑iyt lh̬ir ula ššrr, ha‑yaġ ra‑nsfld s‑wawal n‑sidi rbbi da‑igan rbbi‑nġ. ha‑yaġ nuzn‑k s‑dars a‑ginġ‑iskr afulki ašku ra‑nskr s‑wawal‑ns.»

⁷ zrin mraw‑uwssan s‑d‑yuška‑wawal n‑sidi rbbi i‑irmiyah.

⁸ iġr‑d nttan i‑yuḥanan yus n‑qariḥ, d‑iriyasn n‑iɛskriyn lli‑kullu‑dids‑illan, d‑wiyyaḍ kullutn zġ‑willi mẓẓinin ar willi mqqurnin.

⁹ yini‑asn: «ha ma‑inna rbbi da‑illan ig rbbi n‑israyil lli‑s‑iyi‑tuznm a‑t‑sqsaġ f‑maylli‑zġ‑gis‑tḍalbm.

¹⁰ inna‑yawn: ‹iġ‑tqamam ġ‑wakal‑ad, han ra‑kʷn‑bnuġ, ur‑ra‑kʷn‑h̬luġ. ra‑kʷn‑ẓẓuġ, ur‑ra‑kʷn‑ssukfġ. ašku ṭiyr‑iyi f‑tagat lli‑n‑fllawn‑zzugzġ.

¹¹ ad‑ur‑tiksaḍm agllid n‑babil lli‑kʷn‑issiwidn. iniġ‑awn: a‑ur‑zġ‑gis‑tiksaḍm, ašku ha‑yyi lliġ didun f‑a‑kʷn‑jjnjmġ, fukkuġ‑kʷn zġ‑ufus‑ns.

¹² ra‑giwn‑ḥnnuġ, rarġ‑t ula nttan a‑giwn‑iḥnnu, yadj‑kʷn a‑tzdġm ġ‑wakal‑ad‑nun.

¹³ walaynni iġ‑tnnam: ur‑nri a‑nqama ġ‑wakal‑ad, tagʷim a‑tsfldm s‑wawal n‑wad bdda illan ig rbbi‑nun,

¹⁴ tinim: uhu, ra‑nddu s‑wakal n‑miṣr, ašku ur‑ra‑gis‑ntmnad imiġ ula da‑nsflid i‑nnffar ula da‑yaġ‑gis‑tlaḥ aġrum, ġin a‑ġ‑ra‑nzdġ,

¹⁵ iġ‑tnnam ġmkan, a‑willi‑d‑iqaman zġ‑ayt‑yahuda, sfldat i‑wawal n‑wad bdda illan. ha ma‑inna rbbi n‑lmlayka da‑bdda‑illan ig rbbi n‑ayt‑israyil. iġ‑trurm udmawn‑nun s‑miṣr, tskrm f‑a‑tddum a‑n‑gis‑tzugm,

¹⁶ han ġ‑tmazirt n‑miṣr a‑ġ‑ra‑n‑fllawn‑ih̬lḍ‑uwzzal lli‑zġ‑tksuḍm, iẓẓu‑giwn‑uġʷni lli‑kʷn‑issiwidn, tmmtm‑n ġ‑wakal n‑miṣr.

¹⁷ han s‑ṣṣaḥt kullu winna iskrn ad‑ddun s‑miṣr a‑n‑gis‑zugn, rad‑mmtn ntni s‑uwzzal d‑uġʷni d‑waṭṭan. ur‑ra‑gisn‑iqama yan injmn i‑tagat lli‑ra‑n‑fllasn‑zzugzġ.› »