irmiyah 40 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iqama irmiyah ġ‑wakal n‑yahuda

¹ yašk‑id‑wawal n‑sidi rbbi i‑irmiyah ġ‑tmdint n‑rama, tigira n‑mad‑as‑irẓm nabuzaradan ariyas n‑waḍafn. ašku ġin a‑s‑yiwi irmiyah, ityawkrraf s‑ssnasl ġ‑gr kullu ayt‑urušalim d‑ayt‑yahuda lli‑issmun a‑tn‑issitti s‑babil.

² yawi‑t‑uriyas‑lli n‑waḍafn yini‑as: «rbbi‑nk lli‑igan ‹wad bdda illan› a‑iqṣadn tagat lli‑yutn tamazirt‑nun.

³ iskr‑awn‑t ‹wad bdda illan› baš a‑issafu awal lli‑s‑awn‑inna. ašku tʷh̬šnm srs, ur‑a‑tsflidm s‑ma‑ittini. ġayan a‑f‑awn‑ijra ġayad.

⁴ imma kiyi ġilad, rad‑ak‑fsiġ iskraf‑ad illan ġ‑ifassn‑nk. iġ‑ak‑iban ifulki a‑didi‑tmunt s‑babil, trwaḥt. ha‑yyi ra‑gik‑thallaġ. iġ‑ak‑iban ur‑ifulki a‑didi‑tmunt, ur‑fllak‑igi bzzez. hay‑akal kullut ġ‑umnid‑nk. inna‑yk‑iban iṣlaḥ ifulki, tddut srs.

⁵ iġ‑trit a‑tqamat, wrri s‑dar gadalyah yus n‑aḥiqam yus n‑šafan. iga nttan lḥakm lli‑iga‑ugllid n‑babil f‑tmdinin n‑ayt‑yahuda. zayd tzdġt dars ġ‑gr mddn. nġd ddu s‑inna trit.» ifk‑as‑ilmma‑uriyas n‑waḍafn lɛwin d‑yat‑tsmġurt, yadj‑t a‑iffuġ.

⁶ iddu irmiyah s‑dar gadalyah yus n‑aḥiqam ġ‑tmdint n‑miṣfah, igawr dars ġ‑gr mddn lli‑iqaman ġ‑tmazirt.