irmiyah 39 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tamdint n‑urušalim th̬ʷla

¹ asggʷas wis ṭẓa ġ‑tgldit n‑ṣidqiyah agllid n‑yahuda, ġ‑wayyur wis mraw, a‑d‑iffuġ nabuh̬adnaṣr agllid n‑babil d‑lɛskr‑ns, lkmn‑d urušalim glin‑tt.

² asggʷas wis yan d‑mraw ġ‑tgldit n‑ṣidqiyah, ġ‑wayyur wis kkuẓ, ġ‑wass wis tẓa, ad‑ssḍrn agadir n‑tmdint.

³ kšmn iriyasn n‑ugllid n‑babil, gawrn kullu ġ‑imi n‑tuẓẓunt. yili gisn nargal‑šaraṣar gu‑samgar, d‑nabu‑sarsah̬im ariyas n‑ingabaln zuzlnin, d‑nargal‑šaraṣar ariyas n‑imajusiyn, ntni d‑kullu iriyasn yaḍni n‑ugllid n‑babil.

⁴ lliġ‑tn‑iẓra ṣidqiyah agllid n‑yahuda, ntta d‑iɛskriyn‑ns kullutn, rwln ffuġn tamdint ġ‑iyḍ zġ‑imi n‑gr igudar ġ‑tġurdin n‑talɛrṣt n‑ugllid. amẓn aġaras lli‑itawin s‑wasif n‑urdun.

⁵ iẓẓu gisn kra ġ‑lɛskr n‑ayt‑kaldan, amẓn ṣidqiyah ġ‑uzaġar n‑ariḥa. awin‑t ssġlin‑t s‑dar nabuh̬adnaṣr agllid n‑babil ġ‑tmdint n‑ribla ġ‑wakal n‑ḥamat. ġakudan a‑fllas‑iḥkam‑ugllid n‑babil.

⁶ inġ tarwa n‑ṣidqiyah ġ‑ribla ġ‑lgddam n‑walln‑ns, inġ ula kullu inmġurn n‑yahuda.

⁷ issbukḍ alln n‑ṣidqiyah ġakudan, ikrf‑t s‑ssnasl a‑t‑yawi s‑babil.

⁸ jdrn ayt‑kaldan tigmmi n‑ugllid ula tin ayt‑tmdint, h̬lun igudar n‑urušalim.

⁹ iddu nabuzaradan ariyas n‑waḍafn n‑ayt‑kaldan, issmun kullu ayt‑tmdint, gn‑iyt willi izawgn ġ‑urgaz‑an wala willi‑n‑iqaman ġ‑tmdint, yawi‑tn s‑babil.

¹⁰ walaynni kra ġ‑imẓlaḍ lli‑ur‑iṭṭafn yat, ifl‑tn ġ‑wakal n‑yahuda, izayd ilmma ifk‑asn igran n‑waḍil d‑uwrtan.

awal n‑irmiyah i‑gu‑ḥabaš

¹¹ imma irmiyah, yuṣṣa‑fllas‑ugllid n‑babil nabuh̬adnaṣr, yini i‑nabuzaradan ariyas n‑waḍafn:

¹² «awi‑t tgablt‑t ġ‑laman. ad‑ur‑fllas‑tšqut walaynni skr‑as aynna‑f‑k‑iḍalb.»

¹³ inkr nabuzaradan ariyas n‑waḍafn d‑nabušazban ariyas n‑izuzaln d‑nargal‑šaraṣar ariyas n‑imajusiyn d‑iriyasn n‑ugllid n‑babil kullutn,

¹⁴ aznn ma‑d‑itawin irmiyah zġ‑usarag n‑waḍafn. fkn‑t i‑gadalyah yus n‑aḥiqam lli‑igan yus n‑šafan a‑t‑yawi s‑tgmmi‑ns. izdġ ġmkan ġ‑gr mddn.

¹⁵ lliġ sul illa irmiyah ġ‑usarag n‑waḍafn, yašk‑as‑d‑wawal n‑sidi rbbi yini:

¹⁶ «zayd tsawlt s‑ɛabd‑malik gu‑ḥabaš tinit‑as: ‹ha ma‑inna rbbi n‑lmlayka da‑bdda‑illan, ig rbbi n‑ayt‑israyil. imikk rad‑ssafuġ iwaliwn lli‑s‑sawlġ f‑tmdint‑ad, nniġ rad‑as‑yili ššrr urd lh̬ir. rad‑nnit‑ijru ġ‑lgddam n‑walln‑nk.

¹⁷ imma kiyi ra‑k‑fukkuġ ġassan. ur‑ra‑tḍrt ġ‑ifassn n‑mddn lli‑zġ‑tksuḍt. inna‑t rbbi da‑bdda‑illan.

¹⁸ s‑ṣṣaḥt ra‑k‑fukkuġ, ur‑ra‑tmmtt s‑uwzzal. ra‑tnjm tudrt‑nk, ašku tumnt gigi. inna‑t walli bdda illan.› »