irmiyah 38 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

gu‑ḥabaš ifukka irmiyah zġ‑tnudfi

¹ isfld šafaṭyah yus n‑mattan, d‑gadalyah yus n‑fašḥur, d‑yuh̬al yus n‑šalamyah, d‑fašḥur yus n‑malkiyah, i‑iwaliwn lli‑s‑a‑ittini irmiyah i‑mddn kullutn:

² «ha ma‑inna rbbi da‑illan. wanna iqaman ġ‑tmdint‑ad, ra‑immt s‑uwzzal d‑uġʷni d‑waṭṭan. imma wanna iffuġn s‑dar ayt‑kaldan, ra‑iqama iddr, ra‑sul‑iṭṭaf tudrt‑ns.

³ ha ma‑inna walli bdda illan. s‑ṣṣaḥt ra‑ttyawfka‑tmdint‑ad ġ‑ifassn n‑lɛskr n‑ugllid n‑babil, amẓn‑tt.»

⁴ nkrn iriyasn‑an ġakudan inin i‑ugllid: «argaz‑an, iqqan‑t‑id a‑immt. ašku iwaliwn‑ns ar‑rẓẓan jjhd n‑ayt‑imiġ lli‑iqaman ġ‑tmdint‑ad, ula win kullu mddn‑ad. han argaz‑an ur‑iri lh̬ir i‑mddn‑nġ. ššrr ad‑asn‑ira.»

⁵ irar‑asn‑ugllid ṣidqiyah: «hatin ġ‑ufus‑nun. nkki ur‑ẓḍarġ a‑kʷn‑ḥṣarġ.»

⁶ amẓn irmiyah ġakudan, gn‑t‑in ġ‑tnuḍfi n‑malkiyah yus n‑ugllid, tlla ġ‑usarag n‑waḍafn, zzugzn‑t s‑izakarn. tanuḍfi‑an ur‑gis aman walaynni tlla gis tallaġt. igguz irmiyah ġ‑tallaġt.

^7-8 hati illa yan gu‑ḥabaš ism‑ns ɛabd‑malik, iga angabal izuzln ġ‑tgmmi n‑ugllid. lliġ isfld ɛabd‑malik is‑n‑gan irmiyah ġ‑tnuḍfi, iddu zġ‑tgmmi n‑ugllid a‑n‑isawl d‑ugllid lli‑n‑igawrn tizi‑an ġ‑imi lli‑mi‑ttinin ‹imi n‑bnyamin›. yini‑as:

⁹ «wa sidi agllid, ġayd skrn irgazn‑ad i‑nnabi irmiyah, hati yʷh̬šn bahra. gan‑t‑in ġ‑tnuḍfi. ra‑gis‑immt s‑laẓ, ašku ur‑sul‑iqama ‑uġrum ġ‑tmdint.»

¹⁰ isawl‑d‑ugllid yamr ɛabd‑malik gu‑ḥabaš yini‑as: «awi dik kraḍ id‑mraw (30) n‑urgaz zġ‑ġid, tssġlim‑d irmiyah zġ‑tnuḍfi a‑ur‑immt.»

¹¹ iddu ɛabd‑malik yawi dids irgazn‑an, iwrri s‑tgmmi n‑ugllid. ikšm s‑yan‑uḥanu ġ‑iyzdar n‑lh̬zin, yasi‑d zġ‑gis kra n‑išrwiḍn d‑idrbaln. ig‑tn ġ‑izakarn, izzugz‑tn i‑irmiyah ġ‑tnuḍfi.

¹² yini ɛabd‑malik gu‑ḥabaš ġakudan i‑irmiyah: «g išrwiḍn d‑idrbaln f‑izakarn, tgt‑tn ġ‑ddu‑tġariwin‑nk.» iskr irmiyah ġmkan.

¹³ alln‑t‑id zġ‑tnuḍfi s‑izakarn. iqama irmiyah ġakudan ġ‑usarag n‑waḍafn.

imnaggar irmiyah d‑ugllid

¹⁴ yazn‑ilmma‑ugllid ṣidqiyah ma‑d‑itawin nnabi irmiyah s‑dars. imnaggar‑n dids ġ‑dar wis kraḍ imawn n‑tgmmi tamẓlayt n‑sidi rbbi. yini‑ugllid i‑irmiyah: «ra‑k‑sqsaġ f‑yat‑tġawsa. a‑ur‑flla‑tssntlt yat.»

¹⁵ irar‑d irmiyah i‑ṣidqiyah: «iġ‑ak‑nniġ lḥqq, mah̬ ur‑ra‑yyi‑tnġt? iġ‑ak‑mliġ ma‑yk‑iṣlaḥn, han ur‑ra‑srs‑tskrt.»

¹⁶ iggall‑as‑ugllid ġakudan ġ‑tntla yini‑as: «f‑tudrt n‑sidi rbbi lli‑ginġ‑igan rruḥ, ur‑k‑nqqaġ ula fkiġ‑k ġ‑gr ifassn n‑willi ranin a‑k‑nġn.»

¹⁷ yini irmiyah i‑ṣidqiyah: «ha ma‑inna wad bdda illan ig rbbi n‑lmlayka, ig rbbi n‑ayt‑israyil. iġ‑tfkit ih̬f‑nk i‑iriyasn n‑ugllid n‑babil, ra‑tqamat tddrt. ur‑ra‑tjdr‑tmdint s‑lɛafiyt. ha kiyi d‑ayt‑tgmmi‑nk ra‑sul‑teṭṭafm tudrt‑nun.

¹⁸ walaynni iġ‑tagʷit a‑tfkt ih̬f‑nk i‑iriyasn n‑ugllid n‑babil, ra‑ttyawfka‑tmdint ġ‑ifassn n‑ayt‑kaldan a‑stt‑jdrn s‑lɛafiyt. ula kiyi ur‑ra‑tnjmt zġ‑ifassn‑nsn.»