irmiyah 32 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ityamaẓ irmiyah ġ‑lḥbs

¹ awal lli‑d‑yuškan zġ‑sidi rbbi i‑nnabi irmiyah, ġ‑usggʷas wis mraw (10) n‑tgldit n‑ṣidqiyah agllid n‑yahuda, iga asggʷas wis tam d‑mraw (18) n‑tgldit n‑nabuh̬adnaṣr.

² ġ‑uwssan‑an a‑ġ‑d‑yuška lɛskr n‑ugllid n‑babil, igli urušalim. imma nnabi irmiyah, ityamaẓ nttan ġ‑usarag n‑waḍafn n‑tgmmi n‑ugllid n‑yahuda.

³ ašku ṣidqiyah agllid n‑yahuda iga‑t‑in ġ‑lḥbs. yini‑as: «mah̬ a‑ttkašaft ar‑ttinit: ‹ha ma‑inna sidi rbbi. rad‑fkġ tamdint‑ad ġ‑ufus n‑ugllid n‑babil a‑stt‑yamẓ,

⁴ d‑ur‑ra‑injm ṣidqiyah agllid n‑yahuda zġ‑ufus n‑ayt‑kaldan. ra‑iḍr ġ‑ufus n‑ugllid n‑babil, isawl dids udm s‑uwdm, iẓr‑t ṭiṭṭ s‑ṭiṭṭ.

⁵ ra‑yitti ṣidqiyah ġakudan s‑babil, iqama ġin ard immt. inna‑t rbbi da‑bdda‑illan. ašku iġ‑tmmaġm d‑ayt‑kaldan, ur‑ra‑tn‑tnrum›?»

igr lli‑isġa irmiyah ġ‑tizi‑an

⁶ imma irmiyah inna: «yuška‑yyi‑d‑wawal n‑sidi rbbi yini‑yyi‑d nkki:

⁷ ‹han ra‑n‑dark‑yašk ḥanamil yus n‑ɛmmik šallum yini‑ak: sġ dari igr lli‑illan ġ‑ɛanatut, ašku kiyi a‑dar lḥqq amzwaru a‑ti‑tsġt tfrut‑t.›

⁸ yašk‑id dari ḥanamil yus n‑ɛmmi ġ‑tasaɛt‑an s‑usarag n‑waḍafn, ġmklli inna sidi rbbi, yini‑yyi: ‹sġ dari igr lli‑illan ġ‑ɛanatut ġ‑wakal n‑bnyamin, ašku kiyi a‑dar lḥqq amzwaru a‑ti‑tfrut teṭṭaft‑t. nkr ġilad tsġt‑t i‑ih̬f‑nk.› issanġ ġakudan izd awal n‑sidi rbbi ayan.

⁹ «ġmkan a‑s‑wrriġ ṭṭafġ igr lli‑illan ġ‑ɛanatut, sġiġ‑t dar ḥanamil yus n‑ɛmmi. ɛbbrġ‑as atig‑ns s‑ssa d‑mraw (17) n‑uqarid n‑nnʷqrt.

¹⁰ ɛllmġ arra n‑tmsaġt s‑ufus ula s‑tmatart‑inu, skrġ‑as inagan, ɛbbrġ‑as nnʷqrt s‑lmizan.

¹¹ asiġ‑d arra lli‑iqqnn s‑tmatart, tili gis luṣiyt d‑ššruḍ, asiġ‑d ula arra yaḍni zund nttan irẓm.

¹² fkġ arratn i‑baruh̬ yus n‑niriyah lli‑igan yus n‑maḥsiyah ġ‑umnid n‑ḥanamil yus n‑ɛmmi, d‑umnid n‑inagan lli‑iɛllmn arra, ula ġ‑umnid n‑kullu ayt‑yahuda lli‑igawrn ġ‑usarag n‑waḍafn.

¹³ uṣṣaġ baruh̬ ġ‑lgddam‑nsn iniġ‑as:

¹⁴ ‹ha ma‑inna rbbi n‑lmlayka da‑bdda‑illan ig rbbi n‑ayt‑israyil. asi sin‑warratn‑ad, a‑tn‑igan d‑warra n‑tmsaġt lli‑iqqnn s‑tmatart ula wayyaḍ lli‑irẓmn, tgt‑tn ġ‑yat‑tbʷqqalt n‑idqqi, a‑gis‑qaman isggʷasn ggutnin.

¹⁵ ašku ha ma‑inna rbbi n‑lmlayka da‑bdda‑illan ig rbbi n‑ayt‑israyil. rad‑daġ‑saġn mddn tigʷmma d‑urtan d‑igran n‑waḍil ġ‑tmazirt‑ad.›

¹⁶ «tigira n‑mad‑fkiġ arra n‑tmsaġt i‑baruh̬ yus n‑niriyah, ẓẓallġ i‑sidi rbbi iniġ:

¹⁷ wa sidi rbbi‑nu, kiyi a‑iskrn ignwan d‑wakal s‑tḥkimt‑nk itjhhdn ula s‑ufus‑nk iġzzifn. hati ur‑fllak‑išqi yat.

¹⁸ ar‑di‑tssbayyant lḥnant‑nk izgan i‑wafḍan n‑mddn, walaynni ar‑ttrarat i‑tarwa f‑lɛib lli‑skrn lajdud‑nsn. wa rbbi imqqurn itjhhdn, ism‑nk iga rbbi n‑lmlayka da‑bdda‑illan.

¹⁹ tfhmt kraygatt kra, ar‑tskart lɛjayb. ar‑tmnadt kullu iskkirn n‑bnadm, ar‑ttrarat i‑kraygatt yan f‑ma‑iqṣad ula lġllat lli‑iskar.

²⁰ ġayd izrin tssbayynt lɛjayb ula timitar ġ‑wakal n‑miṣr, ar‑tnt‑tssbayyant sul s‑ġassad dar ayt‑israyil d‑ayt‑tmizar n‑ddunit, aylliġ iwrri ism‑nk ityawssan bahra.

²¹ s‑tmitar mqqurnin d‑lɛjayb a‑s‑di‑tssufġt mddn‑nk n‑ayt‑israyil zġ‑tmazirt n‑miṣr, tssġuwḍt inuwwašn‑nsn s‑ufus iġzzifn d‑tġruṭṭ itjhhdn.

²² tfkt‑asn akal‑ad lli‑f‑tggullit i‑id‑babatsn ad‑asn‑ti‑tfkt, ig akal lli‑ġ‑ingi‑ugʷfay d‑tammnt.

²³ aškin‑d ntni ɛmmrn‑t ṭṭafn‑t. walaynni ur‑a‑sflidn s‑wawal‑nk ula da‑skarn s‑ulmmud‑nk. ur‑qasan maylli‑f‑tn‑tuṣṣat. ġayan a‑f‑d‑fllasn‑tzzugzt kullu tagat‑ad išqan.

²⁴ hay‑ayt‑kaldan ġilad ar‑d‑ssgudin akal, lkmn‑d igudar, sutln‑d i‑tmdint a‑stt‑amẓn. imikk ra‑tḍr ġ‑ufus‑nsn s‑uwzzal d‑uġʷni d‑waṭṭan. kullu ġaylli‑s‑aġ‑tnnit, hati ġilad tẓrit‑t ijra.

²⁵ walaynni tnnit‑iyi‑d a‑sidi rbbi: ‹sġ igr‑ad s‑nnʷqrt, tskrt‑as inagan›, wah̬h̬a ttyawfka‑tmdint ġ‑ufus n‑ayt‑kaldan.»

tagat lli‑d‑izzugz rbbi f‑mddn‑ns

²⁶ yašk‑id‑wawal n‑sidi rbbi i‑irmiyah yini:

²⁷ «ha‑yyi giġ wad bdda illan, gġ rbbi n‑kullu bnadm. is‑illa kra flla išqan?

²⁸ ġmkan a‑s‑inna walli bdda illan. rad‑fkġ tamdint‑ad ġ‑ufus n‑ayt‑kaldan d‑ufus n‑ugllid‑nsn nabuh̬adnaṣr n‑babil. ra‑stt‑yamẓ nttan,

²⁹ kšmn‑d ayt‑kaldan lli‑immaġn d‑tmdint‑ad, jdrn‑tt s‑lɛafiyt. rad‑jdrn tigʷmma lli‑ġ‑a‑tbh̬h̬arn mddn f‑iggi‑nsnt i‑‹baɛl› ar‑n‑tffin tissi i‑id‑rbbi iġribn, ssṭiyrn‑iyi‑tt bahra.

³⁰ ašku ayt‑israyil d‑ayt‑yahuda zġ‑mẓẓiy‑nsn, ur‑a‑skarn abla ma‑yʷh̬šnn ġ‑iẓri‑nu. ur‑a‑skarn ayt‑israyil abla a‑yyi‑stt‑ssṭiyarn s‑iskkirn n‑ifassn‑nsn. inna‑t rbbi da‑bdda‑illan.

³¹ zġ‑wass lli‑ġ‑ttbna‑tmdint‑ad, sul s‑ġassad, ar‑d‑gigi‑tssnkar iriyn ula lġaḍab. ġayad a‑f‑ra‑stt‑kksġ zġ‑iẓri‑nu,

³² f‑ssibt n‑kullu lh̬ʷšant lli‑skarn ayt‑israyil d‑ayt‑yahuda, ntni d‑igldan‑nsn d‑iriyasn‑nsn d‑imsakmurn‑nsn d‑lanbiya‑nsn, kullu mddn n‑ayt‑yahuda d‑imzdġn n‑urušalim, ssṭiyrn‑iyi‑tt bahra.

³³ hatni rurn‑d sri tadawt‑nsn urd udmawn‑nsn. wah̬h̬a da‑tn‑tnṣaḥġ mnnawt‑twal, ur‑jji‑rin ad‑sfldn wala‑d‑issann.

³⁴ ssbiddn‑in ikʷlan‑nsn jlh̬nin, ndsn srsn tigmmi lli‑yusin ism‑inu.

³⁵ bnun ikʷrkar i‑‹baɛl› ġ‑talat n‑yus n‑hinnum, ar‑n‑dḥḥin tarwa‑nsn d‑istitsn i‑lɛafiyt f‑rbbi‑nsn ‹mulah̬›. ur‑jjid nkki a‑tn‑yuṣṣan ad‑skarn ġayan, ula akkʷ swangimġ is‑rad‑salan wan tajlh̬it‑an aylliġ a‑kullu‑jllun ayt‑yahuda.»

lbarakat lli‑rad‑asn‑iggʷru

³⁶ «walaynni ha ma‑rad‑awn‑yini walli bdda illan, ig rbbi n‑israyil, f‑tmdint lli‑f‑tnnam kunni: ‹tamdint‑ad ttyawfka ġ‑ufus n‑ugllid n‑babil a‑thlk s‑uwzzal d‑uġʷni d‑waṭṭan.›

³⁷ iniġ‑awn: ha‑yyi ra‑tn‑d‑ssmunġ zġ‑kullu timizar lli‑s‑tn‑ssuktġ s‑iriyn ula lġaḍab lli‑d‑gigi‑ssnkrn, ssṭiyrn‑iyi‑stt bahra. ra‑tn‑d‑sswrriġ s‑wakal‑ad f‑a‑gis‑zdġn ġ‑laman.

³⁸ rad‑gn mddn‑inu, gġ rbbi‑nsn,

³⁹ rarġ‑tn ad‑gn yan ġ‑mad‑swingimn ula mad‑skarn, irin a‑yyi‑bdda‑tuqqarn, yili‑asn lh̬ir ntni d‑tarwa‑nsn tigira‑nsn.

⁴⁰ rad‑didsn‑skrġ yan lɛhd bdda idumn. barkġ‑tn s‑ifulkitn ur‑sar‑tmmin, rarġ‑tn a‑yyi‑tuqqarn zġ‑ttmi n‑uwl‑nsn f‑a‑ur‑sar‑iyi‑fln.

⁴¹ rad‑frḥġ ad‑asn‑skrġ afulki, ssafuġ awal‑inu, ẓẓuġ‑tn ġ‑wakal‑ad s‑tayri n‑uwl‑inu izgan.»

⁴² ašku inna sidi rbbi: «ġmklli‑d‑zzugzġ kullu tagat‑ad išqan f‑mddn‑ad, a‑rad‑d‑fllasn‑zzugzġ ula kullu afulki lli‑s‑asn‑qawlġ.

⁴³ rad‑daġ‑saġn mddn igran ġ‑wakal‑ad lli‑f‑a‑ttinin: ‹ih̬wa, ur‑sul‑gis‑qaman la mddn ula lbhaym, ašku ityawfka ġ‑ufus n‑ayt‑kaldan.›

⁴⁴ rad‑daġ‑saġn igran s‑nnʷqrt, ar‑skarn arratn n‑tmsaġt s‑tmitar d‑inagan, ġ‑wakal n‑bnyamin d‑ikalln akmurnin s‑urušalim, ula ġ‑tmdinin n‑yahuda ula tin iwrar, ula tin‑uzaġar ula tin lh̬la n‑nagab. ašku rad‑asn‑d‑rarġ lh̬ir. inna‑t rbbi da‑bdda‑illan.»