irmiyah 31 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ra‑d‑wrrin ayt‑israyil s‑wakal‑nsn

¹ inna sidi rbbi: «ġ‑uwssan‑an rad‑gġ rbbi n‑kullu tagʷmatin n‑ayt‑israyil, gn ntni mddn‑inu.»

² ha ma‑inna rbbi da‑illan: «willi injmn i‑uwzzal, hatni ufan rrḥmt ġ‑lh̬la. lliġ ẓuẓḍn ayt‑israyil asunfu,

³ ha wad bdda illan iban‑asn‑d zġ‑tuggugt. ḥnnuġ giwn s‑lḥnant idumn, ssafuġ‑awn tayri‑nu izgan.

⁴ ra‑kʷn‑daġ‑bnuġ ay‑ayt‑israyil, ttbnut zġ‑ljdid [a‑urušalim]. tgt zund taɛyyalt iṣfan, ar‑ttflujju tbrz s‑tilluna, tffuġ s‑gr ayt‑uḥwaš tfjjij.

⁵ ra‑n‑daġ‑tgm aḍil ġ‑iwrar n‑samira, ẓẓun‑tn ifllaḥn ar‑tšbaɛn lġllt.

⁶ ašku ra‑d‑yašk‑wass ġ‑a‑tbrraḥn‑waḍafn ġ‑iwrar n‑afraym ar‑ttinin: ‹nkrat a‑nawn s‑ṣiyun s‑dar wad bdda illan ig rbbi‑nġ.› »

⁷ ašku ha ma‑inna sidi rbbi: «frḥat ar‑ttirirm f‑ma‑ra‑yili i‑ayt‑yaɛqub, tallm awal‑nun f‑uqbil‑ad izwurn i‑wiyyaḍ. brrḥat ar‑ttsbbaḥm ar‑ttinim: ‹wa sidi rbbi jjnjm mddn‑nk lli‑iqaman ddrn ġ‑ayt‑israyil.›

⁸ hati ra‑tn‑d‑awiġ zġ‑tsgiw n‑ššamal, ssmunġ‑tn‑d zġ‑tuggʷag n‑ddunit. ra‑gisn‑yili‑ubukaḍ d‑ubiḍar, tili gisn tad irbbun ula tad itarun. han akabar iggutn a‑ra‑d‑iwrri,

⁹ zwurġ‑asn‑d ar‑allan ar‑ssmummuyn. awiġ‑tn‑d s‑tama n‑iġbula n‑waman ġ‑uġaras inmn lli‑ġ‑ur‑ra‑tn‑yut ifikš. ašku giġ ih̬f‑inu d‑babas n‑israyil, skrġ ġ‑afraym iwi ifh̬ddi.

¹⁰ «sfldat a‑iqbiln n‑ddunit, i‑wawal n‑wad bdda illan. tbrrḥm srs ġ‑tamiw n‑imdwan aggugnin tinim: ‹han rbbi lli‑issuktn ayt‑israyil a‑ra‑tn‑d‑daġ‑issmun, igabl‑tn ġmklli itgabal‑umksa tawrut‑ns.›

¹¹ ašku rbbi da‑illan, hati ifra‑d ayt‑yaɛqub, ifukku‑tn‑d zġ‑ifassn n‑willi fllasn itjhhdn.

¹² ra‑d‑aškin ar‑ttirirn ġ‑uwrir n‑ṣiyun, frḥn bahra s‑ufulki n‑walli bdda illan. rad‑frḥn s‑irdn d‑zzit ula aman n‑waḍil, frḥn ula s‑tarwa n‑uwlli d‑win imugayn. ra‑tg tudrt‑nsn zund talɛrṣt issan, ur‑sar‑sul‑tġašan.

¹³ rad‑fjjijnt‑tɛyyalin ḥušnt, frḥn ula iɛyyaln d‑ifqqirn. rad‑rarġ tandra‑nsn ad‑kullu‑tg taḍṣa, ssfjjijġ fllasn, gġ taguḍi‑nsn d‑lfrḥ.

¹⁴ rad‑ššbaɛġ imsakmurn s‑tadunt, ssqnɛuġ mddn‑inu s‑tugtt n‑lh̬ir. inna‑t rbbi da‑bdda‑illan.»

ra‑iḥnnu sidi rbbi f‑mddn‑ns

¹⁵ ha ma‑inna sidi rbbi: «taġuyit a‑mi‑n‑nsfld ġ‑tmdint n‑rama. ar‑ssġuyyun ar‑tnuwwaḥn. ar‑talla raḥil f‑tarwa‑ns, ur‑tẓḍar a‑tṣbr f‑tarwa‑ns ašku ur‑sul‑llin.»

¹⁶ ha ma‑inna sidi rbbi: «kkisat tiġuya zġ‑ils‑nun, tbbim‑n imṭṭawn f‑walln‑nun. ašku rad‑awn‑rarġ atig f‑twuri‑nun. inna‑t rbbi da‑bdda‑illan. rad‑d‑wrrin tarwa‑nun zġ‑wakal n‑inuwwašn‑nsn.

¹⁷ hati fkiġ‑awn rrja iṣḥan f‑ma‑rad‑awn‑yili. rad‑d‑wrrin ntni s‑tmazirt‑nsn. inna‑t rbbi da‑bdda‑illan.

¹⁸ «hati sfldġ i‑afraym ar‑itrgigiy yini: ‹tsslmdt‑iyi s‑ukuray zund igiz ur‑irbban. rar‑iyi‑d s‑uġaras‑nk a‑gis‑fttuġ, ašku tgit walli bdda illan, tgt rbbi‑nu.

¹⁹ lliġ‑k‑flġ, tʷgraẓ‑iyi bahra. lliġ‑iyi‑tssfhmt, ar‑kkatġ ġ‑imṣaḍn‑inu. ḥšmġ f‑lɛib lli‑yyi‑indsn. ašku usiġ kullu lɛar n‑mẓẓiy‑inu.› »

²⁰ ijawb ġakudan walli bdda illan yini: «is‑ur‑igi afraym iwi iɛzzan? is‑ur‑igi azzan lli‑s‑frḥġ? ġakud nna‑ti‑tẓiġ, nttan iɛzza dari. ibbi ġ‑tasa‑nu. rrḥmt‑inu a‑s‑ra‑t‑rḥmġ.

²¹ «ssbidd ikʷrkar ma‑s‑a‑tissant aġaras‑nk, tskrt timitar ma‑yk‑imalan manis a‑ttidut. rar lɛaql s‑uġaras lli‑tumẓt, tissant mani‑di‑tkkit. grawl‑d s‑dari a‑israyil zund taɛyyalt iṣfan, twrrit‑d s‑tmdinin‑nm.

²² mnšk a‑rad‑sul‑ttlulliyt zund tafruh̬t ijlan? ašku illa kra n‑ljdid ġ‑ddunit, iskr‑t wad bdda illan. hati tawtmt a‑ra‑d‑izwur i‑umdwas.»

²³ ha ma‑inna rbbi n‑lmlayka da‑bdda‑illan, ig rbbi n‑israyil: «ġ‑uwssan ġ‑rad‑asn‑d‑rarġ lh̬ir, rad‑daġ‑ttinin iwaliwn‑ad ġ‑tmazirt n‑yahuda ula timdinin‑ns: ‹a‑km‑ibark sidi rbbi, a‑tazdġt n‑ufulki, ay‑awrir amẓlay.›

²⁴ rad‑d‑kullu‑mšaškan imkrazn n‑igran d‑imksawn n‑uwlli ġ‑tmazirt n‑yahuda ula timdinin‑ns.

²⁵ ašku rad‑fkġ asunfu i‑uwl nna‑irmin, ssdusġ ul nna‑itġašan,

²⁶ ard inin: ‹gnġ nkrġ‑d, imim iṭs‑inu.› »

²⁷ yini sidi rbbi: «hati rad‑d‑aškin‑uwssan ġ‑rad‑ssigtġ amud n‑bnadm ula win lbhaym ġ‑dar ayt‑israyil d‑ayt‑yahuda.

²⁸ ġayd izrin gablġ‑tn a‑tn‑ssukufġ ar‑tn‑tbbiġ ar‑tn‑ssknukiġ ar‑tn‑in‑tluḥġ ad‑hlkn. imma ġilad ra‑tn‑gablġ a‑tn‑tẓẓuġ ar‑tn‑bnnuġ. inna‑t rbbi da‑bdda‑illan.

²⁹ ur‑sul‑ra‑ttinin ġ‑uwssan‑an: ‹ššan lajdud wasmmum, ggurgzn‑uwh̬ṣan n‑tarwa.›

³⁰ ašku kraygatt yan ra‑immt f‑lh̬ʷšant lli‑iskr. wanna iššan wasmmum a‑mi‑rad‑ggurgzn‑uwh̬ṣan.»

lɛhd n‑ljdid ġ‑gr rbbi d‑mddn‑ns

³¹ yini sidi rbbi: «hati rad‑d‑aškin‑uwssan ġ‑rad‑skrġ yan lɛhd n‑ljdid d‑ayt‑israyil d‑ayt‑yahuda.

³² ur‑ra‑ig zund lɛhd lli‑skrġ d‑imzwura‑nsn, ġakud lliġ‑asn‑d‑umẓġ afus ssufġġ‑tn‑d zġ‑wakal n‑miṣr. lɛhd‑an, ur‑sul‑gis‑qaman. ġayan a‑f‑wrriġ flġ‑tn. inna‑t rbbi da‑bdda‑illan.

³³ ġmkad a‑iga lɛhd lli‑rad‑skrġ d‑ayt‑israyil ġ‑uwssan‑an. ra‑n‑araġ tinbaḍin‑inu f‑uwlawn‑nsn, gġ‑tnt ġ‑ih̬fawn‑nsn. rad‑asn‑gġ rbbi‑nsn, gn‑iyi mddn‑inu. inna‑t rbbi da‑bdda‑illan.

³⁴ ur‑sul‑ra‑itnṣaḥ kud yan adjar‑ns, ula da‑ittini i‑gʷmas: ‹illa fllak a‑tissant sidi rbbi›, ašku ra‑yyi‑kullu‑issann, zġ‑wad imẓẓin ar wad imqqurn. hati rad‑asn‑ṣamḥġ f‑lɛyub‑nsn, ur‑sul‑ra‑di‑kttiġ iskkirn‑nsn ʷh̬šnnin. inna‑t rbbi da‑bdda‑illan.

³⁵ «ha ma‑inna rbbi siditun lli‑itraran tafukt a‑ttisfiw ġ‑uzal, ar‑itamr ayyur d‑itran ad‑tisfiwn ġ‑iyḍ, ar‑d‑issaqlay amda ard a‑nddrnt taḍangiwin‑ns, iga ism‑inu rbbi n‑lmlayka da‑bdda‑illan.

³⁶ iniġ‑awn, iġ‑wrriġ ur‑sul‑ḥkamġ ġmkan ġ‑ddunit, han rad‑laḥ ula amud n‑ayt‑israyil a‑ur‑sul‑ig aqbil ġ‑umnid‑inu kullu mayd iftan. inna‑t rbbi da‑bdda‑illan.

³⁷ iġ‑illa ma‑iẓḍarn a‑n‑issġl tattuyt n‑ignwan, issnubbš‑n ġ‑tdrut ma‑f‑ittrs‑wakal, ra‑n‑luḥġ ula nkki kullu tasutin n‑ayt‑israyil, flġ‑tn f‑ssibt n‑ġaylli kullu skrn. inna‑t rbbi da‑bdda‑illan.»

³⁸ yini sidi rbbi: «hati rad‑d‑aškin‑uwssan ġ‑rad‑daġ‑ttbnu urušalim s‑ism n‑walli bdda illan, zġ‑lbrj n‑ḥananil ar imi n‑uġʷẓu.

³⁹ ra‑n‑zġ‑gis‑iffuġ izikr n‑usġl ard ilkm awrir n‑garib, ibrrm ar guɛat.

⁴⁰ ha talat‑an kullutt, ula ismḍal d‑iġd d‑igran lli‑gis‑illan, rad‑kullu‑ttyawẓlay i‑rbbi siditun, zġ‑talat n‑qidrun ġ‑tsga da‑iwalan asġlay n‑tafukt, ar aġʷẓu n‑imi n‑iysan. ur‑sar‑titti‑tmdint ula tḍr kullu mayd iftan.»