irmiyah 29 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tabrat n‑irmiyah i‑imsukfn

¹ iwaliwn‑ad yura‑tn nnabi irmiyah ġ‑yat‑tbrat. yazn‑tt zġ‑urušalim s‑dar imġarn lli‑iqaman ddrn ġ‑gr imsukfn, ntni d‑imsakmurn d‑lanbiya d‑kullu willi ikkis nabuh̬adnaṣr zġ‑urušalim yawi‑tn s‑babil.

² ijra tigira n‑ma‑yitti‑ugllid yakunyah [lli‑mi‑ttinin yahuyah̬in] d‑innas zġ‑urušalim, ntni d‑inmġurn n‑tgmmi‑ns d‑iriyasn n‑tmazirt n‑yahuda d‑win urušalim ula injjarn d‑imziln.

³ ġakud lliġ yuzn ṣidqiyah agllid n‑yahuda alɛasah yus n‑šafan ula gamaryah yus n‑ḥilqiyah s‑dar‑ugllid nabuh̬adnaṣr ġ‑babil, yazn didsn irmiyah tabrat, ityara‑gis‑wawal‑ad:

⁴ «ha ma‑inna rbbi n‑lmlayka da‑bdda‑illan, ig rbbi n‑ayt‑israyil, i‑kullu imsukfn lli‑kkisġ nkki zġ‑urušalim s‑babil:

⁵ ‹bnwat tigʷmma ġin, tzdġm gisnt. tẓẓum ġ‑igran ar‑tšttam zġ‑lġllt‑nsn.

⁶ tahlm ar‑ttarum ifrh̬an d‑tfrh̬in. tsigglm tislatin i‑tarwa‑nun, tfkm istitun ad‑tahlnt, f‑a‑tarunt ifrh̬an d‑tfrh̬in. zaydat ar‑ttigatm ġin, a‑ur‑tidrasm.

⁷ skarat lh̬ir i‑tmdint lli‑s‑kʷn‑usiġ, ar‑fllas‑ttḍalabm i‑rbbi da‑illan. ašku iġ‑as‑illa lh̬ir, yili‑awn ula kunni.

⁸ ha ma‑inna rbbi n‑lmlayka da‑bdda‑illan, ig rbbi n‑ayt‑israyil. a‑ur‑tadjm lanbiya d‑išuwwafn lli‑illan ġ‑gratun a‑kʷn‑jllun, wala da‑stti‑ttawim ġ‑twargiwin lli‑twargan.

⁹ ašku tikrkas a‑s‑a‑yawn‑tkašafn s‑ism‑inu. han urd nkkin a‑tn‑in‑yuznn. inna‑t rbbi da‑bdda‑illan.

¹⁰ «ašku inna‑yawn walli bdda illan: ‹ġakud nna‑kmmlġ i‑babil ssa n‑id mraw (70) n‑usggʷas‑ns, ra‑n‑srun‑aškiġ, ssafuġ‑awn awal‑inu iṣlaḥn, rarġ‑kʷn‑d s‑wakal‑ad.

¹¹ ašku ssnġ mad‑nuwwaġ f‑ssibt‑nun, qṣadġ giwn ma‑ifulkin urd ma‑yʷh̬šnn, f‑ad‑awn‑fkġ rrja iṣḥan ġ‑ma‑rad‑awn‑yili. inna‑t rbbi da‑bdda‑illan.

¹² ġakudan a‑ra‑yyi‑di‑taqram, ar‑d‑sri‑ttakmurm f‑a‑ttẓallam. ha nkki rad‑awn‑sflidġ.

¹³ ra‑yyi‑ttsiggilm tafm‑iyi. iġ‑a‑yyi‑tsiggilm zġ‑ttmi n‑uwl‑nun,

¹⁴ ra‑yyi‑tafm. inna‑t rbbi da‑bdda‑illan. rad‑awn‑d‑rarġ lh̬ir, ssmunġ‑kʷn‑d zġ‑kullu timizar ula kullu manis‑kʷn‑ṭṭayġ. sswrriġ‑kʷn‑d s‑wakal‑ad lli‑zġ‑kʷn‑kkisġ. inna‑t rbbi da‑bdda‑illan.› »