irmiyah 25 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ssa n‑id‑mraw n‑usggʷas

¹ asggʷas wis kkuẓ n‑tgldit n‑yahuyaqim yus n‑yušiyah, agllid n‑yahuda, iga‑t‑usggʷas amzwaru n‑tgldit n‑nabuh̬adnaṣr agllid n‑babil, yuška‑d‑wawal i‑irmiyah f‑kullu mddn n‑ayt‑yahuda.

² ibrrḥ srs nnabi irmiyah i‑ayt‑yahuda d‑imzdġn n‑urušalim kullutn yini‑asn:

³ «sin id‑mraw d‑kraḍ (23) n‑usggʷas ayd‑iyi‑di‑ttaškin iwaliwn n‑sidi rbbi, zġ‑usggʷas wis kraḍ d‑mraw (13) n‑tgldit n‑yušiyah yus n‑amun agllid n‑yahuda, sul s‑ġassad. ar‑bdda‑srun‑sawalġ, walaynni tagʷim a‑yyi‑tsfldm.

⁴ ar‑awn‑d‑itazn sidi rbbi kullu ih̬ddamn‑ns lanbiya, ur‑a‑srsn‑tsflidm ula da‑srsn‑ttraram lɛaql.

⁵ ar‑awn‑ttinin: ‹wrryat‑d ġila. illa f‑kraygatt yan giwn a‑d‑iwrri zġ‑uġaras‑ns yʷh̬šnn d‑iskkirn‑ns ʷh̬šnnin. ġmkan a‑s‑ra‑tqamam ġ‑wakal lli‑awn‑ifka sidi rbbi. ifka‑yawn‑t a‑ig winun kunni d‑imzwura‑nun ġayd izrin ula kullu mayd iftan.

⁶ a‑ur‑tḍfurm id‑rbbi yaḍni a‑tn‑tqasam ar‑asn‑tknnum, wala tssṭiyrm‑iyi‑tt s‑ġaylli tɛdlm s‑ifassn‑nun, f‑a‑ur‑srun‑šquġ.›

⁷ imma kunni ur‑a‑sri‑tsflidm. tzuydm tssṭiyrm‑iyi‑tt s‑uggʷar s‑ġaylli ɛdln ifassn‑nun, tawim‑d i‑ih̬f‑nun tagat. inna‑t rbbi da‑bdda‑illan.

⁸ «ġayan a‑f‑awn‑inna rbbi n‑lmlayka da‑bdda‑illan: ‹tagʷim a‑tsfldm s‑iwaliwn‑inu.

⁹ hatin rad‑d‑ġrġ i‑kullu ayt‑tmizar n‑ššamal, ġrġ ula i‑uh̬ddam‑inu nabuh̬adnaṣr agllid n‑babil, awiġ‑tn‑d ad‑d‑akʷin f‑wakal‑ad d‑imzdġn‑ns d‑iqbiln lli‑as‑d‑akmurnin. rad‑hlkġ timizar‑ad, gġ‑tnt d‑uh̬ribn ma‑f‑a‑kkatn mddn s‑unfus, h̬lunt ġakudan ula kullu mayd iftan.

¹⁰ s‑ṣṣaḥt ra‑gisnt‑bbiġ awal n‑taḍṣa ula win lfrḥ, laḥ gisnt taqqurt n‑usli ula tin‑tslit, laḥ tijjijt n‑uzrg ula tifawt n‑lqndil.

¹¹ akal‑ad kullut, ur‑ra‑gis‑iqama abla ih̬rubba h̬wanin. iqbiln‑ad kullutn, rad‑gn ih̬ddamn ġ‑ddu‑ufus n‑ugllid n‑babil ssa n‑id‑mraw (70) n‑usggʷas.

¹² « ‹ġakud nna‑kmmln ssa n‑id‑mraw (70) n‑usggʷas, rad‑utġ lɛqubit f‑ugllid n‑babil d‑uqbil‑ns n‑ayt‑kaldan f‑ssibt n‑kullu lh̬ʷšanat lli‑skarn, rarġ ikalln‑nsn ad‑h̬wun ġakudan ula kullu mayd iftan. inna‑t rbbi da‑bdda‑illan.

¹³ ra‑n‑zzugzġ f‑tmazirt‑an kullu ma‑fllas‑nniġ, kullu ma‑ityaran ġ‑ifr‑ad lli‑s‑ikašf irmiyah f‑iqbiln n‑ddunit.

¹⁴ ašku ayt‑kaldan rad‑wrrin gn ismgan ula ntni ġ‑ddu‑ufus n‑iqbiln tjhhdnin d‑igldan mqqurnin. rad‑asn‑rarġ nkki f‑tillay‑nsn ula f‑iskkirn n‑ifassn‑nsn.› »