irmiyah 20 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rad‑akufn ayt‑yahuda s‑babil

¹ lliġ a‑isawal irmiyah f‑tġawsiwin lli‑as‑d‑imla sidi rbbi, isfld‑as‑umsakmur fašḥur yus n‑immir lli‑igan angabal imqqurn f‑tgmmi n‑rbbi.

² yamr fašḥur ad‑ššġuršn irmiyah, yawi‑t ikrf‑t ġ‑gr ifggign ġ‑dar imi n‑tgmmi n‑sidi rbbi lli‑mi‑ttinin ‹imi n‑bnyamin n‑uflla›.

³ ndid azkka irẓm‑as‑d fašḥur zġ‑ifggign. isawl srs irmiyah yini‑as: «ism‑nk ġ‑dar sidi rbbi ur‑sul‑igi ‹fašḥur›. iga‑yak ism ‹magur‑missabib› [tga lmɛna‑ns tawda ġ‑kraygatt tasga].

⁴ ha ma‑inna sidi rbbi: ‹ra‑k‑gġ d‑tawda i‑ih̬f‑nk ula kullu imddukkʷal‑nk, tẓrt‑tn ar‑tmmtatn s‑uwzzal n‑inuwwašn‑nsn. rad‑fkġ kullu ayt‑yahuda ġ‑ufus n‑ugllid n‑babil. ra‑tn‑ikrf yawi‑tn s‑babil, inġ kra gisn s‑uwzzal.

⁵ ġakudan a‑rad‑fkġ kullu timih̬ar n‑tmdint d‑wayda‑ns d‑tarika‑ns ula kullu lknuz n‑igldan n‑ayt‑yahuda ġ‑ufus n‑inuwwašn‑nsn. ra‑tn‑akʷrn amẓn‑tn asin‑tn s‑babil.

⁶ ula kiyi a‑fašḥur d‑ayt‑tgmmi‑nk kullutn, ra‑kʷn‑amẓn awin‑kʷn s‑babil. ġin a‑ġ‑ra‑n‑tmmtm, d‑ġin a‑ġ‑ra‑n‑ttyawmḍalm, kiyi d‑kullu imddukkʷal‑nk lli‑mi‑ttkašaft s‑tkrkas.› »