irmiyah 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayt‑yahuda fln sidi rbbi

¹ yašk‑iyi‑d‑wawal n‑sidi rbbi yini‑yyi:

² «ddu ar‑ttbrraḥt i‑tmdint n‑urušalim tinit: ‹ha ma‑inna rbbi da‑illan. swangmġ‑d tayri‑nm lliġ sul tmẓẓit. trit‑iyi s‑tayri n‑tslit. tmunt didi ġ‑lh̬la ġ‑wakal lli‑ur‑tkki‑tiyrza.

³ ityawẓlay israyil a‑ig win rbbi da‑illan, ig lġllt tamzwarut n‑tmgra‑ns. wanna fllas itɛddan, iwrri‑d fllas ġayan, iggʷz‑d fllas lhalak. inna‑t rbbi da‑bdda‑illan.› »

⁴ sfldat i‑wawal n‑sidi rbbi ay‑ayt‑yaɛqub, ula kunni kullukʷn ay‑ayt‑tqbilin n‑israyil.

⁵ ha ma‑inna rbbi da‑illan: «man lɛib a‑gigi‑ufan imzwura‑nun, aylliġ‑d‑sri‑rurn tadawt, ddun ḍfurn anufl, wrrin ntni nufln?

⁶ ur‑a‑ssmqsan: ‹ma‑ginġ‑ira sidi rbbi lli‑aġ‑d‑issiwn zġ‑tmazirt n‑miṣr, ar‑aġ‑d‑izgguru ġ‑lh̬la irufan, igabl‑aġ ġ‑wakal lli‑iɛmmrn s‑iẓran d‑igʷḍyan, ġ‑wakal n‑taġart d‑tillas, ġ‑wakal lli‑ġ‑ur‑a‑izray yan ula izdġ gis yan?›

⁷ ha‑yyi iwiġ‑kʷn‑d s‑wakal iflujjan, a‑gis‑ttfraḥm s‑ṣṣabt n‑tmih̬ar‑ns. walaynni ġ‑lliġ‑di‑tkšmm s‑wakal‑inu, ha kunni tndsm‑t, trarm lwrt‑inu ijlh̬.

⁸ han imsakmurn ur‑a‑ssmqsan: ‹ma‑ginġ‑ira sidi rbbi?› d‑willi yusin almmud ur‑iyi‑ssinn. imksawn n‑tuwrut‑inu, hatni ɛṣan‑iyi. lanbiya ar‑tkašafn s‑ism n‑‹baɛl›, ar‑tḍfurn lh̬lawt ih̬wan.

⁹ ġayan a‑f‑a‑sul‑didun‑tmmaġġ, d‑ġmkan a‑rad‑sul‑mmaġġ d‑tasutin n‑tarwa‑nun. inna‑t rbbi da‑bdda‑illan.

¹⁰ «bbyat s‑igzir n‑qubruṣ tmnadm‑m, taznm s‑ṣṣaḥra n‑qadar taggʷm‑n, tsqsam is‑jji‑darsn‑ijra zund ġayd darun illan.

¹¹ is‑illa kra n‑uqbil ibddln id‑rbbi‑ns s‑wiyya, wah̬h̬a ur‑akkʷ‑llin id‑rbbi‑an? imma mddn‑inu bddln lmajd‑nsn s‑lh̬lawt ih̬wan.

¹² ʷggdat f‑ġayad ay‑ayt‑ignwan ar‑ttrgigiym, tqama giwn tawda. inna‑t rbbi da‑bdda‑illan.

¹³ ašku mddn‑inu jlan f‑snat‑twal. fln‑iyi nkki da‑igan aġbalu n‑waman ddrnin, ddun ġzan i‑ih̬f‑nsn tinuḍfiw stġnin da‑ur‑itamẓn aman.»