irmiyah 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tagdurt lli‑irẓan

¹ ha ma‑inna sidi rbbi: «ddu tsġt‑d yat‑tgdurt zġ‑dar bu‑idqqi. tawit ilmma kra ġ‑imġarn n‑uqbil d‑kra ġ‑imġarn n‑imsakmurn,

² tffuġm s‑talat n‑yus n‑hinnum, ġ‑tama n‑imi n‑tmdint lli‑mi‑ttinin ‹imi n‑izgʷyan›. all awal‑nk tbrrḥt ġin s‑iwaliwn‑ad rad‑ak‑mlġ,

³ tinit‑asn: ‹sfldat i‑wawal n‑rbbi da‑illan a‑igldan n‑yahuda d‑imzdġn n‑urušalim. ġmkad a‑s‑inna sidi rbbi n‑lmlayka da‑igan rbbi n‑ayt‑israyil. ra‑n‑zzugzġ tammara išqan bahra f‑tmazirt‑ad ard a‑jjhijjiyn imzgan i‑kullu wanna fllas isfldn.

⁴ ašku fln‑iyi mddn‑ad, ndsn adġar‑ad amẓlay s‑tġrṣiw lli‑jddrn i‑id‑rbbi iġribn, wah̬h̬a‑sttin‑kkan ur‑akkʷ‑ssinn id‑rbbi‑an, ula ssnn‑tn imzwura‑nsn ula igldan n‑yahuda. ɛmmrn adġar‑ad s‑idammn ġusnin n‑bnadm.

⁵ bnun ikʷrkar ġ‑iggi n‑iwrar ma‑f‑a‑jddrn tarwa‑nsn mẓẓinin s‑lɛafiyt, ar‑tn‑in‑ssakmurn i‑‹baɛl›. ur‑jjid nkkin a‑tn‑yuṣṣan ula umrġ‑tn ad‑skarn ġayan, ula akkʷ swangmġ gis.

⁶ walaynni han rad‑d‑aškin‑uwssan ur‑sul‑ra‑ttinim i‑udġar‑ad ‹tufat› nġd ‹talat n‑yus n‑hinnum› walaynni rad‑as‑ttinim ‹talat n‑tnaġa›. inna‑t rbbi da‑bdda‑illan.›

⁷ «adġar‑ad a‑ġ‑rad‑ssḍrġ ġaylli nuwwan ayt‑urušalim d‑ayt‑yahuda, adjġ‑tn ad‑mmtn s‑uwzzal n‑inuwwašn‑nsn, tthlkn f‑ifassn n‑willi iran a‑tn‑nġn. flġ ddat‑nsn a‑stt‑šttan igḍaḍ n‑ignwan d‑luḥuš n‑wakal.

⁸ rad‑rarġ tamdint‑ad a‑tg uh̬rib, rad‑fllas‑kkatn mddn s‑unfus. wanna fllas izrin ra‑tqd tasa‑ns, d‑wanna‑n‑yuggʷan aggasn‑ns ra‑yut s‑unfus.

⁹ ra‑tn‑adjġ ard wrrin ar‑šttan tifiyi n‑tarwa‑nsn d‑istitsn, išš kud yan tifiyi n‑wadjar‑ns, ġakud lliġ‑tn‑glin inuwwašn‑nsn ar‑tn‑ssnukmun ar‑tn‑ssrfufunn willi iran a‑tn‑nġn.

¹⁰ «zayd ġilad trẓt tagdurt‑nk ġ‑umnid n‑willi dik imunn,

¹¹ tinit‑asn: ‹ha ma‑inna rbbi n‑lmlayka da‑bdda‑illan. ġmkad a‑s‑rad‑rẓġ mddn‑ad d‑tmdint‑ad, ġmklli irẓẓa‑uruku n‑idqqi, ur‑ra‑yiẓḍar yan a‑t‑irar s‑ġmklli‑sttin‑ikka iga. rad‑mḍln inaġan‑nsn ġ‑talat n‑‹tufat› ard ur‑sul‑iqama maniġ a‑tn‑mṭṭln.

¹² ha ma‑inna rbbi da‑illan. ġmkad a‑rad‑skrġ i‑udġar‑ad d‑imzdġn‑ns. rad‑rarġ tamdint‑ad zund ‹tufat›.

¹³ tigʷmma n‑urušalim ula tin igldan n‑yahuda, kullu tigʷmma lli‑ġ‑a‑tbh̬h̬arn f‑iggi‑nsnt i‑tifawin n‑ignwan ar‑n‑tffin tissi i‑id‑rbbi iġribn, hatnti rad‑kullu‑ndsnt zund talat n‑tufat.› »

¹⁴ iwrri‑d irmiyah ġakudan zġ‑‹tufat› lli‑s‑t‑yuzn sidi rbbi a‑gis‑ibrrḥ s‑wawal‑ns. ibidd ġ‑usarag n‑tgmmi n‑sidi rbbi, isawl s‑mddn kullutn yini‑asn:

¹⁵ «ha ma‑inna rbbi n‑lmlayka da‑bdda‑illan, ig rbbi n‑ayt‑israyil: ‹han rad‑zzugzġ f‑tmdint‑ad ula f‑kullu iduran‑ns tagat‑an kullutt lli‑fllasn‑nniġ. ašku hatni ssqqurn ih̬fawn‑nsn, agʷin ad‑sflidn s‑wawal‑inu.› »