irmiyah 18 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aruku lli‑ih̬ṣrn i‑bu‑idqqi

¹ awal lli‑d‑yuškan zġ‑sidi rbbi i‑nnabi irmiyah inna:

² «nkr thuwwdt s‑tgmmi n‑bu‑idqqi. ġin a‑ġ‑rad‑ak‑mlġ awal‑inu.»

³ dduġ ġakudan huwwdġ s‑tgmmi n‑bu‑idqqi, afġ‑t‑in ġ‑dar llulb ar‑iskar yan‑uruku zġ‑tallaġt.

⁴ imil ih̬ṣr‑as‑uruku‑an ġ‑gr ifassn‑ns. izayd bu‑idqqi iɛdl zġ‑gis aruku yaḍni, iskr zġ‑gis ġmklli ira ntta a‑t‑ig.

⁵ ġakudan a‑yyi‑d‑yuška‑wawal n‑sidi rbbi yini:

⁶ «way‑ayt‑israyil, is‑ur‑ẓḍarġ a‑zġ‑giwn‑skrġ zund bu‑idqqi? zund tallaġt ġ‑ufus n‑bu‑idqqi a‑tgam ġ‑gr ifassn‑inu, ay‑ayt‑israyil.

⁷ ġakud nna‑ɛlmġ kra n‑uqbil nġd kra n‑tgldit, iniġ‑as is‑ra‑t‑ssukfġ nġd ra‑t‑ssknukiġ nġd ra‑t‑hlkġ,

⁸ iġ‑sri‑isfld‑uqbil lli‑ɛlmġ, iwrri f‑iskkirn‑ns ʷh̬šnnin, ha‑yyi rad‑wrriġ ula nkki f‑tagat lli‑fllas‑qṣadġ.

⁹ ġakud nna‑ɛlmġ kra n‑uqbil nġd kra n‑tgldit, iniġ‑as is‑ra‑t‑ẓẓuġ nġd ra‑t‑bnuġ,

¹⁰ iġ‑iwrri‑uqbil‑an ar‑ityʷh̬šan ġ‑iẓri‑nu yagʷi a‑sri‑isflid, ha‑yyi rad‑wrriġ ula nkki f‑ufulki lli‑fllas‑qṣadġ.

¹¹ zayd ġilad tsawlt s‑ayt‑yahuda d‑imzdġn n‑urušalim tinit‑asn: ‹sfldat i‑mayd inna rbbi da‑bdda‑illan. hati qṣadġ fllawn tagat, jjujadġ‑awn ššrr. wrryat‑d ġilad, ifl‑n kud yan giwn aġaras‑ns yʷh̬šnn, ibddl ma‑inuwwa ula ma‑itsala.› »

¹² imma ntni rurn‑d awal inin: «urd yat ayan. ra‑nskar ma‑nra nkkʷni, izayd kud yan f‑mknna imyur s‑uwl‑ns iqqurn yʷh̬šnn.»