irmiyah 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

mddn‑inu rẓan lɛhd‑inu

⁶ yini‑yyi sidi rbbi: «brrḥ s‑kullu iwaliwn‑ad ġ‑tmdinin n‑yahuda ula tiswak n‑urušalim, tinit‑asn: ‹sfldayt i‑iwaliwn n‑lɛhd‑ad, ar‑srsn‑tskarm.

⁷ ašku s‑lmɛqul a‑s‑ɛlmġ imzwura n‑mddn‑nun ġakud lliġ‑tn‑d‑ssiwnġ zġ‑tmazirt n‑miṣr, ar‑tn‑tɛlamġ sul s‑ġassad, ar‑tn‑tuṣṣaġ ad‑skarn s‑mad‑asn‑ttiniġ.

⁸ walaynni ur‑a‑srs‑skarn ntni ula da‑sri‑sflidn. kraygatt yan ar‑iskar aynna‑yas‑imla‑uwl‑ns iqqurn yʷh̬šnn. ġayan a‑f‑d‑fllasn‑zzugzġ kullu ma‑ityaran ġ‑lɛhd ġ‑griyi didsn, ašku uṣṣaġ‑tn a‑srs‑skarn, d‑ntni ur‑srs‑skirn.› »

⁹ yini‑yyi daġ sidi rbbi: «han ayt‑yahuda d‑imzdġn n‑urušalim mšaškan‑d,

¹⁰ wrrin s‑lɛyub n‑imzwura‑nsn lli‑yagʷin ad‑sflidn s‑iwaliwn‑inu, ḍfurn id‑rbbi iġribn ar‑tn‑tqasan. han ayt‑israyil d‑ayt‑yahuda rẓan lɛhd lli‑skrġ d‑imzwura‑nsn lli‑zrinin.

¹¹ ġayan a‑f‑inna rbbi da‑illan: ‹ra‑n‑fllasn‑zzugzġ yat tagat, d‑ur‑ra‑zġ‑gis‑njmn. wah̬h̬a da‑sri‑aqran, ur‑rad‑asn‑sfldġ.›

¹² rad‑ddun ayt‑tmdinin n‑yahuda d‑ayt‑urušalim ar‑aqran s‑id‑rbbi lli‑mi‑tbh̬h̬arn, walaynni ur‑rad‑iẓḍarn id‑rbbi‑nsn a‑tn‑fukkun ġ‑tizi n‑tagat‑an.

¹³ way‑ayt‑yahuda, ġunšk lli‑gant‑tmdinin‑nun ad‑gan id‑rbbi‑nun. ġunšk lli‑gant‑tswak n‑urušalim ad‑gan ikʷrkar n‑lɛar lli‑tbnam a‑fllasn‑ttbh̬h̬arm i‑‹baɛl›.

¹⁴ «ad‑ur‑tẓẓallt kiyi f‑mddn‑ad, ula a‑tḍalbt ula ad‑iyi‑tġrt f‑ssibt‑nsn. ašku iġ‑a‑sri‑aqran ġ‑tizi n‑tagat, ur‑rad‑asn‑sfldġ.

¹⁵ is‑izri a‑di‑tkšm talli ḥubbiġ s‑tgmmi‑nu, d‑nttat ar‑sul‑tskar taḥramiyt? izd tiġrṣiw a‑ra‑fllawn‑issanf tagat? is‑ra‑ttalġm ih̬fawn‑nun f‑lh̬ʷšant lli‑tskarm?

¹⁶ ġayd izrin iga‑yam rbbi sidim ism ‹tazitunt izgzawn ifulkin s‑lġllt bahra išwan›, imma ġilad ra‑km‑ijdr s‑ijawan tjhhdnin n‑ifdudda n‑lɛafiyt lli‑ra‑išš kullu iṣṭṭwan‑nm.

¹⁷ sidim rbbi n‑lmlayka lli‑km‑iẓẓan, hati yura fllam ššrr. ašku han ayt‑israyil d‑ayt‑yahuda salan iskkirn bahra ʷh̬šnnin, ssṭiyrn‑iyi‑tt bahra s‑tġrṣiw lli‑jddrn i‑‹baɛl›.»