iriyasn 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iẓẓa gidɛun ġ‑igldan n‑midyan

¹ imma irgazn n‑ayt‑afraym sqsan gidɛun: «matta ġmkad‑aġ‑tskrt? mah̬ aylliġ ur‑aġ‑di‑tġrit lliġ tffuġt a‑tmmaġt d‑ayt‑midyan?» zaydn ar‑t‑bahra‑tẓin.

² irar‑asn: «mad‑skrġ nkki ġ‑lgddam n‑maylli tskrm kunni? tigri n‑waḍil ġ‑dar ayt‑afraym tugʷr tamgra n‑waḍil ġ‑dar ayt‑abiɛazar.

³ han afus‑nun a‑ġ‑n‑iluḥ rbbi ɛurab d‑zib iriyasn n‑midyan. ma‑mi‑ẓḍarġ nkki a‑ingadda d‑maylli tskrm?» hddnn ġakudan lliġ sfldn i‑ma‑inna.

⁴ yašk‑id gidɛun s‑wasif n‑urdun, ibbi‑t‑id ntta d‑usmun‑ns s‑kraḍ id‑miyya (300). hatni wah̬h̬a tġašan, sul gisn ẓẓan.

⁵ yini ġakudan i‑ayt‑tmdint n‑ṣukkut: «ġir fkat kra n‑tngwal n‑uġrum i‑ġwid‑iyi‑d‑iḍfarn f‑uḍar ašku tġašan, d‑nkki sul ẓẓiġ ġ‑zabaḥ d‑ṣalmunnaɛ igldan n‑midyan.»

⁶ rarn‑as‑d iriyasn n‑ṣukkut: «is‑dark tidikal n‑zabaḥ d‑ṣalmunnaɛ ġ‑ufus‑nk aylliġ ra‑nfk aġrum i‑inmmaġn‑nk?»

⁷ yini‑asn gidɛun: «wah̬h̬a. ġakud nna‑iga sidi rbbi zabaḥ d‑ṣalmunnaɛ ġ‑ufus‑inu, rad‑srutġ tifiyi‑nun s‑tskra ula s‑isnnann n‑lh̬la.»

⁸ iddu zġ‑ġin, yawn s‑tmdint n‑fanwil, iḍalb i‑imzdġn‑ns kra n‑uġrum, rarn‑as‑d ayt‑fanwil zund ayt‑ṣukkut.

⁹ yini ġakudan i‑ayt‑fanwil: «ġakud nna‑d‑wrriġ s‑sslamt, rad‑h̬luġ lbrj‑ad.»

¹⁰ illa zabaḥ d‑ṣalmunnaɛ ġ‑lh̬la n‑qarqur, ntni d‑inmmaġn‑nsn s‑ma‑itggan smmus d‑mraw n‑walf (15 000). ġunškan a‑iqaman ġ‑inmmaġn n‑ayt‑tmizar lli‑iwalan asġlay n‑tafukt, ašku id‑bu‑uwzzal lli‑gisn‑immutn gan miyya d‑sin id‑mraw n‑walf (120 000).

¹¹ yawn gidɛun ik aġaras n‑ikssabn, izri f‑nubaḥ d‑yujbaha ġ‑tsgiw n‑usġlay. yakʷi‑n f‑inmmaġn n‑midyan ġ‑yat tasaɛt lli‑ur‑ġaln.

¹² irwl zabaḥ d‑ṣalmunnaɛ igldan n‑midyan, iẓẓu gisn yamẓ zabaḥ d‑ṣalmunnaɛ, ijlu kullu akabar‑nsn.

¹³ iwrri‑d ilmma gidɛun yus n‑yuwaš zġ‑imiġ, ik‑d agsar n‑ḥaras.

¹⁴ yamẓ yan‑uɛzri gu‑ṣukkut isqsa‑t f‑iriyasn d‑imġarn n‑ṣukkut, yara‑yas ismawn‑nsn s‑ssa n‑id‑mraw d‑ssa (77).

¹⁵ iddu gidɛun ġakudan s‑dar ayt‑ṣukkut yini‑asn: «ha zabaḥ d‑ṣalmunnaɛ lli‑s‑gigi‑ṭṭnẓm lliġ‑iyi‑tnnam: ‹is‑dark tidikal n‑zabaḥ d‑ṣalmunnaɛ ġ‑ufus‑nk aylliġ ra‑nfk aġrum i‑irgazn‑nk lli‑itġašan?› »

¹⁶ yamẓ imġarn n‑tmdint, yasi‑d taskra d‑isnnann n‑lh̬la, isslmd srsn ayt‑ṣukkut.

¹⁷ ih̬lu ula lbrj n‑fanwil, inġ irgazn n‑tmdint‑an.

¹⁸ yini ilmma gidɛun i‑zabaḥ d‑ṣalmunnaɛ: «ma‑tnnam f‑irgazn lli‑tnġam ġ‑tabur?» inin‑as: «ġmklli tgit ad‑gan. kud yan iga zund yus n‑igldan.»

¹⁹ yini‑asn: «aytma ad‑gan, tarwa n‑inna. f‑tudrt n‑sidi rbbi, mra is‑tḥṣarm f‑tudrt‑nsn, ur‑ra‑kʷn‑nġġ.»

²⁰ yini ġakudan i‑yatar yus ifh̬ddi: «nkr, nġ‑tn.» imma aɛzri‑an ur‑d‑ildi tuzzalt‑ns, iksuḍ ašku sul iga aɛzri.

²¹ yini‑as zabaḥ d‑ṣalmunnaɛ: «nkr kiyi tutt‑aġ. ašku jjhd a‑s‑a‑ityawssan‑urgaz.» inkr gidɛun ġakudan inġ zabaḥ d‑ṣalmunnaɛ, yasi timayyurin ġʷlanin lli‑ityagaln i‑imggraḍ n‑irɛman‑nsn.

isggʷasn ggʷranin n‑gidɛun

²² inin ilmma irgazn n‑ayt‑israyil i‑gidɛun: «ftu, a‑tgt agllid fllanġ, kiyi d‑yuk d‑yus n‑yuk, ašku tjjnjmt‑aġ zġ‑ufus n‑ayt‑midyan.»

²³ irar‑asn gidɛun: «ur‑rad‑fllawn‑gġ agllid, ula iga‑t‑fllawn‑yiwi. sidi rbbi a‑fllawn‑igan agllid.»

²⁴ izayd yini‑asn: «ġir yat‑tġawsa a‑ra‑giwn‑ḍalbġ. ad‑iyi‑d‑ifk kraygatt yan giwn tih̬urṣin zġ‑maylli yumẓ ġ‑imiġ.» ašku willi nran gan ayt‑ismaɛil, ar‑tggan tih̬urṣin n‑uwrġ ġ‑imẓgan‑nsn.

²⁵ inin‑as: «s‑lfrḥ a‑s‑rad‑ak‑tnt‑nfk.» ssun yan‑uslham f‑wakal, yašk‑id kud yan iluḥ‑n fllas tih̬urṣin zġ‑maylli yumẓ ġ‑imiġ.

²⁶ sin id‑mraw (20) n‑kilu ad‑uwznnt‑th̬urṣin n‑uwrġ lli‑zġ‑darsn‑yumẓ, ilint‑ula‑tmayyurin d‑tzrar d‑islhamn zggʷaġnin n‑igldan n‑midyan, ilint‑tšrar lli‑tggan i‑imggraḍ n‑irɛman‑nsn.

²⁷ iddu gidɛun iskr zġ‑uwrġ‑an yan‑ubannka ma‑zġ‑a‑d‑lddin snat‑tkššuḍin, issbidd‑t ġ‑tmdint‑ns n‑ɛafrah. wrrin ayt‑israyil ar‑tġḍarn rbbi s‑ubannka‑yan ar‑as‑knnun, iwrri ig taẓqqurt i‑gidɛun d‑ayt‑dars.

²⁸ imma ayt‑midyan kʷnan ġ‑ddu‑ufus n‑ayt‑israyil. ur‑sul‑ẓḍarn ad‑alln ih̬f‑nsn. tsunfu‑tmazirt kkuẓ id‑mraw (40) n‑usggʷas ġ‑uwssan n‑gidɛun.

²⁹ iwrri yarubbaɛl yus n‑yuwaš s‑tgmmi‑ns igawr.

³⁰ ilin dars ssa n‑id‑mraw (70) n‑warraw, ašku ggutnt‑tmġarin lli‑itahl gidɛun.

³¹ ula tismgt‑ns lli‑itahl ġ‑šakim turu‑as yan‑warraw, ig‑as ism abimalik.

³² immt gidɛun yus n‑yuwaš lliġ yuwssr bahra. mḍln‑t‑in ġ‑umḍḍal n‑babas yuwaš ġ‑tmdint n‑ɛafrah ġ‑wakal n‑ayt‑abiɛazar.

³³ ġir immut gidɛun s‑wrrin daġ ayt‑israyil ar‑tfsadn d‑‹id‑baɛl›, gn baɛl‑barit d‑rbbi‑nsn.

³⁴ mddn‑an n‑ayt‑israyil ur‑sul‑a‑d‑swingimn rbbi siditsn da‑bdda‑illan lli‑tn‑ijjnjamn ġayd izrin zġ‑ufus n‑kullu inuwwašn lli‑asn‑isutln.

³⁵ ur‑sul‑a‑tuqqarn tarwa n‑yarubbaɛl lli‑mi‑ism‑ns gidɛun, ula da‑ysn‑traran f‑ufulki iggutn lli‑iskr babatsn ġ‑israyil.