iriyasn 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

gidɛun inra ayt‑midyan

¹ zikk ṣbaḥ inkr yarubbaɛl lli‑mi ism‑ns gidɛun, ntta d‑kullu willi dids illan, ddun srsn ġ‑dar talɛint n‑ḥarud. imma asras n‑ayt‑midyan illa ġ‑uzaġar ġ‑tsga n‑uwrir n‑mura lli‑iwalan asmmiḍ.

² isawl sidi rbbi s‑gidɛun yini‑as: «hay‑asmun‑nk iggut bahra. ur‑ufiġ a‑n‑gġ ayt‑midyan ġ‑ufus‑nsn, a‑ur‑ssfurrugn ayt‑israyil ar‑ttinin: ‹jjhd‑nġ ad‑aġ‑ijjnjmn.›

³ nkr tbrrḥt i‑mddn‑an tinit‑asn: ‹wanna iksuḍn d‑wanna itrgigiyn, a‑iḥarru iwrri zġ‑iwrar‑ad n‑gilɛad iddu s‑dars.› » wrrin ġakudan sin id‑mraw d‑sin n‑walf (22 000) ġ‑mddn‑an. qaman mraw id‑walf (10 000).

⁴ yini sidi rbbi i‑gidɛun: «hatin sul ggutn mddn‑an. awi‑tn thuwwdm kullu s‑tama n‑waman. ġin a‑ġ‑rad‑ak‑tn‑armġ. wanna‑f‑ak‑nniġ ‹ġwad ra‑dik‑imun›, imun dik. wanna‑f‑ak‑nniġ ‹ġwad ur‑ra‑dik‑imun›, ad‑ur‑dik‑imun.

⁵ izayd gidɛun isshuwwd mddn‑ns s‑dar‑waman. yini sidi rbbi i‑gidɛun: «winna itllġn aman s‑ils‑nsn ġmklli issa‑widi, ẓli‑tn zġ‑willi yutšn f‑ifaddn ad‑sun.»

⁶ kraḍ id‑miyya (300) n‑urgaz ad‑gan willi itllġn aman lli‑d‑usin ifassn‑nsn ar imi, imma wiyyaḍ kullutn utšn f‑ifaddn knun ar‑ssan.

⁷ yini sidi rbbi i‑gidɛun: «han kraḍ id‑miyya lli‑itllġn aman, ntni a‑s‑ra‑kʷn‑jjnjmġ, gġ ayt‑midyan ġ‑ufus‑nk. adj mddn‑an yaḍni ad‑ddun kud yan s‑dars.»

⁸ isafḍ mddn‑an n‑ayt‑israyil kud yan s‑illiġ izdġ, fln‑as lmunt‑nsn ula nnffarat‑nsn. ġaman sul dids kraḍ id‑miyya. han asras n‑ayt‑midyan illa ġ‑iyzdar‑nsn ġ‑uzaġar.

⁹ ġ‑iḍ‑an a‑inna sidi rbbi i‑gidɛun: «nkr thuwwdt s‑usras‑nsn, ašku giġ‑tn ġ‑ufus‑nk.

¹⁰ iġ‑tksuḍt a‑srsn‑thuwwdt, zayd s‑darsn s‑tntla kiyi d‑umqasa‑nk fura,

¹¹ ard tsfldt i‑ma‑ttinin i‑ngratsn, s‑rad‑fllasn‑tjhhdn ifassn‑nk baš a‑takʷit f‑usras‑nsn.» ihuwwd gidɛun d‑umqasa‑ns fura, akmurn‑in s‑dar inmmaġn lli‑iḍufn ġ‑tsgiw n‑usras.

¹² ggutn bahra ayt‑midyan d‑ayt‑ɛamaliq d‑kullu ayt‑tmizar lli‑iwalan asġlay n‑tafukt, ɛmmrn azaġar kullut zund tamurġi. irɛman‑nsn gan zund amlal n‑tama n‑umda, ur‑iẓḍar yan a‑tn‑iḥasb.

¹³ lliġ‑tn‑in‑ilkm gidɛun, isfld i‑yan‑urgaz ar‑isawal i‑umddakkʷl‑ns f‑yat‑twargit, yini: «hati ẓriġ ġ‑twargit‑inu yat‑tngult n‑ṭmẓin tḥnkuri‑d s‑usras n‑midyan, tlkm‑d yan‑uh̬iyyam, tut‑t tssknuki‑t trar‑as aflla s‑iyzdar, iḍr‑uh̬iyyam‑an s‑wakal.»

¹⁴ irar‑d‑umddakkʷl‑ns: «ġayan ur‑igi abla tuzzalt n‑gidɛun yus n‑yuwaš gu‑israyil. ha rbbi iga‑n ayt‑midyan d‑ukabar‑nġ kullut ġ‑ufus‑ns.»

¹⁵ lliġ isfld gidɛun i‑twargit d‑lmɛna‑ns, yalġ rbbi. iwrri‑d s‑usras n‑ayt‑israyil yini‑asn: «nkrat ašku sidi rbbi iga akabar n‑ayt‑midyan ġ‑ufus‑nun.»

¹⁶ ibḍu kraḍ id‑miyya n‑urgaz lli‑dids‑illan f‑kraṭṭ‑trubba, ifk‑asn kullutn nnffarat ġ‑ifassn‑nsn, ifk‑asn ula ibʷqqaln h̬wanin d‑isufa ġ‑ugʷns‑nsn.

¹⁷ yini‑asn: «tmnadat‑n gigi. mknna skrġ, tskrm‑t. ha‑yyi rad‑dduġ s‑yat‑tsga n‑usras‑nsn. mknna skrġ, tskrm‑t.

¹⁸ iġ‑utġ nnffar nkki d‑trabbut‑inu, tutm ula kunni nnffarat‑nun ġ‑kraygatt tasga n‑usras‑nsn, tġuwwtm tinim: ‹s‑ism n‑sidi rbbi d‑gidɛun.› »

¹⁹ tuẓẓunt n‑iyḍ iddu gidɛun d‑miyya n‑urgaz lli‑dids‑illan, lkmn tasga n‑usras ġ‑tasaɛt lli‑ġ‑a‑ssnfaln aḍafn. utn ġakudan nnffarat, rẓn ibʷqqaln lli‑illan ġ‑ifassn‑nsn.

²⁰ zaydn kraṭṭ‑trubba‑yan utn kullu nnffarat, rẓn ibʷqqaln, asin isufa ġ‑uẓlmaḍ d‑nnffarat ġ‑ufasi, ar‑ṣwaḍn ar‑tġuwwatn ar‑ttinin: «tuzzalt n‑sidi rbbi d‑gidɛun.»

²¹ biddn ġmkan sutln i‑usras. han inmmaġn n‑midyan ar‑kullu‑tazzaln ar‑ssġuyyun ar‑rggʷln.

²² izayd ijjij‑an n‑kraḍ id‑miyya n‑nnffar, s‑igllb sidi rbbi tuzzalt n‑kraygatt yan ġ‑umddakkʷl‑ns ġ‑ugʷns n‑usras kullut. rwln inmmaġn‑an ar bayt‑šiṭṭah ġ‑tsga n‑ṣararah, zaydn ar awttu n‑abal‑maḥulah ġ‑tama n‑ṭabbat.

²³ tffuġ‑tbrraḥt ġ‑wakal n‑naftali d‑ašir d‑manaššah, aškin‑d irgazn n‑ayt‑israyil ẓẓun kullu ġ‑ayt‑midyan.

²⁴ yazn gidɛun irqqasn s‑kullu iwrar n‑ayt‑afraym yini‑asn: «huwwdat‑d a‑tamẓm isukkay n‑waman f‑ayt‑midyan ar bayt‑barah ula asif n‑urdun.» tffuġ‑tbrraḥt ġakudan ad‑munn kullu irgazn n‑ayt‑afraym, amẓn isukkay ar bayt‑barah d‑wasif n‑urdun.

²⁵ ġwin ilmma sin iriyasn n‑ayt‑midyan, ɛurab d‑zib. nġn ɛurab ġ‑tama n‑uẓru n‑ɛurab, nġn zib ġ‑tama n‑lmɛṣṣrt n‑waḍil n‑zib, ẓẓun ġ‑ayt‑midyan. awin‑d ilmma ih̬fawn n‑ɛurab d‑zib i‑gidɛun ġ‑tsga yaḍni n‑wasif n‑urdun.