iriyasn 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ariyas gidɛun

¹ wrrin ayt‑israyil ar‑tsalan ma‑yʷh̬šnn ġ‑iẓri n‑sidi rbbi, ig‑tn sidi rbbi ġ‑ufus n‑ayt‑midyan ssa n‑isggʷasn.

² itjhhd‑ufus n‑ayt‑midyan f‑ayt‑israyil, aylliġ skrn i‑ih̬f‑nsn maniġ a‑tntaln f‑ayt‑midyan ġ‑ifran d‑ijarifn d‑idrarn.

³ ġakud nna‑krzn, ar‑d‑srsn‑tawnn ayt‑midyan d‑ayt‑ɛamaliq d‑ayt‑tmizar lli‑iwalan asġlay n‑tafukt.

⁴ ssbiddn‑d ih̬iyyamn ġ‑ikalln‑nsn, ššn‑asn kullu lġllat n‑wakal‑nsn ar iwtta n‑ġazza. ur‑a‑ffaln ma‑iddrn i‑ayt‑israyil, la ulli ula imugayn ula iġʷyal.

⁵ ašku ar‑di‑tawnn zund tamurġi s‑tugtt n‑lksibt‑nsn d‑ih̬iyyamn‑nsn. ġakud nna‑d‑kšmn s‑tmazirt ar‑tt‑h̬llun. ur‑iẓḍar yan a‑iḥasb mddn‑nsn ula irɛman‑nsn.

⁶ wrrin hršn ayt‑israyil bahra f‑ssibt n‑ayt‑midyan. ar‑aqran ayt‑israyil ġakudan s‑sidi rbbi a‑tn‑iɛawn.

⁷ lliġ a‑aqran ayt‑israyil s‑sidi rbbi f‑ssibt n‑ayt‑midyan,

⁸ yazn‑asn‑d sidi rbbi yan nnabi yini‑asn: «ha ma inna wad bdda illan ig rbbi n‑israyil: ‹nkki a‑kʷn‑d‑issiwnn zġ‑miṣr, ssufġġ‑kʷn‑d zġ‑tmazirt n‑tsmugit.

⁹ fukkuġ‑kʷn zġ‑ufus n‑ayt‑miṣr, d‑ufus n‑kullu willi srun issnukman. ṭṭayġ‑tn ġ‑lgddam‑nun, fkġ‑awn akal‑nsn.

¹⁰ iniġ awn, nkkin a‑igan rbbi da‑illan, gġ rbbi‑nun. ad‑ur‑ttiksaḍm id‑rbbi n‑ayt‑amur lli‑mi‑tzdġm ġ‑wakal‑nsn. walaynni kunni ur‑tsfldm s‑wawal‑inu.› »

¹¹ yašk‑id lmalak n‑sidi rbbi s‑uduwwar n‑ɛafrah, igawr ġ‑ddu‑uṣġar n‑igg lli‑igan win yuwaš gu‑abiɛazar. tizi‑an illa gidɛun lli‑igan yus n‑yuwaš ar‑issrwat irdn ġ‑lmɛṣṣrt n‑waḍil, baš a‑tn‑iḥḍu f‑ayt‑midyan.

¹² iban‑as‑d lmalak n‑sidi rbbi yini‑as: «sidi rbbi illa dik, ay‑amdwas iḥaršn.»

¹³ isawl‑d gidɛun yini‑as: «ġir a‑sidi, iġ‑illa sidi rbbi didnġ, mah̬ ad‑aġ‑ijra kullu ġayad? mah̬ aylliġ ur‑sul‑a‑ttilint lɛjayb lli‑f‑aġ‑sawln id‑babatnġ ar‑ttinin: ‹issiwn‑aġ‑d sidi rbbi zġ‑miṣr›? hati ġilad ifl‑aġ, iluḥ‑aġ‑n ġ‑ufus n‑ayt‑midyan.»

¹⁴ imnad gis sidi rbbi ġakudan yini‑as: «ddu s‑jjhd lli‑dark‑illan, tjjnjmt ayt‑israyil zġ‑ufus n‑ayt‑midyan. is‑urd nkki a‑k‑yuznn?»

¹⁵ irar‑as‑d gidɛun: «wa sidi, ma‑s‑rad‑jjnjmġ ayt‑israyil? ha‑tagʷmat‑nġ ad‑kullu‑iḍɛfn ġ‑tqbilt n‑manaššah, d‑nkki ad‑kullu‑imẓẓin ġ‑tgmmi n‑baba.»

¹⁶ yini‑as‑d sidi rbbi: «ha‑yyi ra‑dik‑iliġ. ra‑tutt ayt‑midyan yat‑twal ḍrn.»

¹⁷ yini‑as gidɛun: «iġ‑ufiġ rrḍa ġ‑iẓri‑nk, ml‑iyi‑d kra n‑tmatart ma‑s‑a‑tissanġ izd kiyi ayd‑sri‑isawaln.

¹⁸ ġir a‑ur‑tddut. qama ġi ard‑ak‑d‑awiġ tawafka‑inu, srsġ‑tt‑in ġ‑umnid‑nk.» yini‑as: «ha‑yyi rad‑qamaġ ġi ard‑di‑twrrit.»

¹⁹ ikšm gidɛun ijjujad yan ikru, iskr arh̬ṣiṣ s‑yat lɛbrt n‑uggʷrn [22 litru]. ig tifiyi‑ns ġ‑yat‑tryalt, ig aman n‑tfiyi ġ‑yat‑tkint, yawi‑as‑tn‑d s‑ddu‑uṣġar n‑igg, isrs‑tn‑in ġ‑umnid‑ns.

²⁰ yini‑as lmalak n‑sidi rbbi: «asi tifiyi d‑urh̬ṣiṣ tgt‑tn‑in f‑uẓru‑an, tffit fllasn aman n‑tfiyi.» iskr gidɛun ġmkan.

²¹ imdi‑n lmalak n‑sidi rbbi ih̬f n‑uɛmud lli‑illan ġ‑ufus‑ns, iggr‑n srs i‑tfiyi d‑urh̬ṣiṣ, s‑tukʷi lɛafiyt f‑uẓru, tjdr‑tfiyi d‑urh̬ṣiṣ, laḥ ilmma lmalak n‑sidi rbbi i‑iẓri‑ns.

²² ġakudan a‑issn gidɛun izd lmalak n‑sidi rbbi ayan. yini gidɛun: «aḥḥ‑inu a‑sidi rbbi‑nu, ašku ẓriġ lmalak n‑sidi rbbi udm s‑uwdm.»

²³ irar‑as‑d sidi rbbi: «sslamt fllak. ad‑ur‑tiksaḍt. han ur‑ra‑tmmtt.»

²⁴ ibnu gidɛun ġin yan‑ukrkur n‑tġrṣi i‑sidi rbbi, ig‑as ism ‹sidi rbbi iga sslamt›. yili‑ukrkur‑an sul s‑ġassad ġ‑ɛafrah lli‑igan tin ayt‑abiɛazar.

²⁵ isawl‑as‑d sidi rbbi ġ‑iḍ‑an yini‑as: «awi‑d amugay zġ‑tuwrut n‑babak, a‑ig wis sin lli‑dar ssa n‑isggʷasn. th̬lut akrkur n‑‹baɛl› lli‑iskr babak, tbbit taggjdit n‑‹ašrah› lli‑illan ġ‑tama‑ns.

²⁶ tbnut yan‑ukrkur i‑rbbi sidik ġ‑iggi n‑ujarif‑ad n‑laman, tssngaddat iẓran‑ns. tawit‑d amugay‑an wis sin, tssakmurt‑t‑in s‑tġrṣi ijdrn f‑ukššuḍ n‑‹ašrah› lli‑tbbit.»

²⁷ yawi gidɛun ġakudan mraw irgazn zġ‑imqasan‑ns, iskr ġmklli‑s‑as‑d‑inna sidi rbbi. walaynni iksuḍ zġ‑ayt‑tgmmi d‑ayt‑tmdint aylliġ ur‑iẓḍar a‑t‑iskr ġ‑uzal, iskr‑t d‑iyḍ.

²⁸ zikk ṣbaḥ nkrn‑d ayt‑tmdint, afn‑d akrkur n‑‹baɛl› ih̬ʷla, ttyawbbay‑ula‑tggjdit n‑‹ašrah› lli‑illan ġ‑tama‑ns, ityawjdar‑ula‑umugay wis sin f‑ukrkur n‑ljdid.

²⁹ ar‑ttinin i‑ngratsn: «ma‑iskrn ġayad?» ddun ar‑sqsan ar‑ššnubbušn aylliġ wrrin ar‑ttinin: «gidɛun yus n‑yuwaš a‑t‑iskrn.»

³⁰ ddun ayt‑tmdint inin i‑yuwaš: «awi‑aġ‑d yuk. iqqan‑d a‑immt ašku ih̬ʷla akrkur n‑‹baɛl›, ibbi ula taggjdit n‑‹ašrah› lli‑illan ġ‑tama‑ns.»

³¹ irar yuwaš i‑willi‑n‑fllas‑biddnin: «is‑tram a‑tmmaġm f‑‹baɛl›, nġd tram a‑ti‑tfukkum? wanna fllas immaġn, ra‑ityawnġa, ur‑ra‑t‑id‑faw. iġ‑iga kra n‑rbbi, adjat‑t a‑immaġ f‑ih̬f‑ns ula f‑ukrkur‑ns da‑ih̬ʷlan.»

³² ġassan ad‑gan i‑gidɛun ism ‹yarubbaɛl›, ar‑ttinin: «adjat ‹baɛl› a‑t‑id‑yut iġ‑as‑ih̬ʷla akrkur‑ns.»

³³ ġ‑uwssan‑an ad‑d‑munn kullu ayt‑midyan d‑ayt‑ɛamaliq d‑ayt‑tmizar lli‑iwalan asġlay n‑tafukt, bbin‑d asif n‑urdun srsn ih̬iyyamn‑nsn ġ‑uzaġar n‑izraɛil.

³⁴ imma gidɛun, idḥi‑t rruḥ n‑sidi rbbi, yut nnffar, nkrn‑d ayt‑abiɛazar ḍfurn‑t.

³⁵ yazn irqqasn s‑kullu tamazirt n‑ayt‑manaššah, nkrn‑d ula ntni ḍfurn‑t. yazn ula s‑tmizar n‑ayt‑ašir d‑ayt‑zabulun d‑ayt‑naftali, awnn‑d kullu munn‑d darsn.

³⁶ yini ilmma gidɛun i‑rbbi: «izd s‑ṣṣaḥt ra‑tjjnjmt ayt‑israyil f‑ufus‑inu ġmklli‑s‑tnnit?

³⁷ ha‑yyi ra‑n‑ssuġ yat‑thiḍurt n‑taḍut ġ‑unrar. iġ‑di‑tḍr‑tġli f‑taḍut waḥdutt, iqama‑wakal lli‑as‑isutln iqqur, ġmkan a‑s‑rad‑issanġ is‑ra‑tjjnjmt ayt‑israyil f‑ufus‑inu ġmklli‑s‑tnnit.»

³⁸ ġmkan a‑ijran. lliġ‑d‑inkr gidɛun zikk ṣbaḥ, iddu yasi‑d tahiḍurt iẓm‑tt, ffuġn‑d zġ‑gis‑waman ggutnin, iɛmmr srsn yan‑ubuqqal.

³⁹ yini gidɛun i‑rbbi: «ad‑ur‑ak‑ṭiyr flla. adj‑iyi ad‑sul‑zġ‑gik‑ḍalbġ yat‑tġawsa. rad‑armġ tawala yaḍni s‑thiḍurt. adj tahiḍurt n‑taḍut a‑tzwu, tili‑kullu‑tġli f‑wakal.»

⁴⁰ iskr rbbi ġmkan ġ‑iḍ‑an. tqama‑thiḍurt waḥdutt a‑izwan, imma akal, tlla‑fllas‑tġli.