iriyasn 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑dabura i‑umġar baraq

¹ tigira n‑ma‑immut ayhud, wrrin daġ ayt‑israyil ar‑tsalan ma‑yʷh̬šnn ġ‑iẓri n‑sidi rbbi.

² iluḥ‑tn sidi rbbi ġ‑ufus n‑yabin agllid n‑kanɛan lli‑iḥkamn ġ‑tmdint n‑ḥaṣur. ariyas n‑inmmaġn‑ns, iga ism‑ns sisra, izdġ ġ‑ḥarušat‑hagwim.

³ ilint dars ṭẓa n‑id‑miyya (900) n‑lkurriṣa n‑uwzzal, ar‑itɛdda f‑ayt‑israyil ar‑fllasn‑itšqu sin id‑mraw (20) n‑usggʷas. nkrn ayt‑israyil ar‑aqran s‑sidi rbbi a‑tn‑zġ‑gis‑ifukku.

⁴ ussan‑an ar‑ttḥkam dabura tamġart n‑lafidut f‑ayt‑israyil, ar‑tsawal s‑wawal n‑rbbi.

⁵ ar‑ttskiwis nttat ġ‑ddu‑tayniwt n‑dabura lli‑illan ġ‑gr rama d‑bayt‑il ġ‑iwrar n‑afraym, ar‑d‑dars‑ttaškin ayt‑israyil a‑tn‑tssnfaṣal.

⁶ yan‑wass tsafḍ tġr‑d i‑baraq yus n‑abinuɛam s‑dars zġ‑qadaš‑naftali, tini‑as: «is‑ur‑k‑yuṣṣa rbbi sidis n‑israyil yini‑ak: ‹zayd tssmunt irgazn‑nk, tawit mraw id‑walf (10 000) zġ‑ayt‑naftali d‑ayt‑zabulun s‑dar‑udrar n‑tabur.

⁷ ra‑n‑dark‑ldiġ sisra ariyas n‑inmmaġn n‑yabin a‑n‑dik‑imnaggar ġ‑dar‑wasif n‑qišun, nttan d‑lkrarṣ d‑ikabarn‑ns, luḥġ‑t‑in ġ‑ufus‑nk›?»

⁸ isawl‑d baraq s‑dabura yini‑as: «iġ‑didi‑tmunt, ha‑yyi rad‑dduġ. iġ‑ur‑didi‑tmunt, ur‑rad‑dduġ.»

⁹ tini‑as: «zayd, rad‑dik‑munġ, walaynni ur‑ra‑k‑alġn mddn f‑ma‑ra‑tskrt. ašku sidi rbbi ra‑iluḥ sisra ġ‑ufus n‑tmġart.» tnkr dabura tmun d‑baraq s‑qadaš.

¹⁰ issmun‑d baraq ayt‑zabulun d‑ayt‑naftali s‑qadaš, ḍfurn‑t mraw n‑id‑walf (10 000) n‑urgaz, tmun dids dabura ula nttat.

tinri f‑sisra d‑inmmaġn‑ns

¹¹ tizi‑an ikka‑ttin ḥabir gu‑qin ifl tagʷmat‑ns n‑ayt‑qin lli‑igan tarwa n‑ḥubab aḍggʷal n‑musa. yuška‑d ḥabir zġ‑tuggugt, isrs ah̬iyyam‑ns ġ‑dar‑uṣġar n‑tasaft ġ‑ṣaɛnannim lli‑illan ġ‑tama n‑qadaš.

¹² isfld sisra i‑wawal: «han baraq yus n‑abinuɛam yiwn s‑udrar n‑tabur.»

¹³ inkr sisra ġakudan issmun‑d ṭẓa n‑id‑miyya (900) n‑lkurriṣa n‑uwzzal lli‑dars, ula kullu irgazn lli‑dids‑llanin, ftun zġ‑ḥarušat‑hagwim ar asif n‑qišun.

¹⁴ tini dabura ġakudan i‑baraq: «nkr ašku ġassad a‑iluḥ sidi rbbi sisra ġ‑ufus‑nk. is‑ur‑iffuġ sidi rbbi ġ‑lgddam‑nk?» ihuwwd baraq zġ‑udrar n‑tabur, ḍfurn‑t mraw id‑walf (10 000) n‑urgaz.

¹⁵ ha sidi rbbi issduyy sisra s‑uwzzal imsidn, ntta ula lkrarṣ d‑inmmaġn‑ns ġ‑umnid n‑baraq. igguz‑d sisra zġ‑lkurriṣa‑ns, irwl ig‑as aḍar.

¹⁶ iẓẓu baraq ġakudan ġ‑lkrarṣ d‑inmmaġn ar ḥarušat‑hagwim. mmtn kullu ayt‑imiġ n‑sisra s‑uwzzal, ur‑gisn‑iqama yan.

¹⁷ imma sisra irwl f‑uḍar s‑dar‑uh̬iyyam n‑yaɛil tamġart n‑ḥabir gu‑qin, ašku yabin agllid n‑ḥaṣur iskr yadlli sslamt d‑ayt‑ḥabir gu‑qin.

¹⁸ tffuġ‑d yaɛil a‑n‑tmnaggar sisra tini‑as: «ftu‑d a‑sidi, taškit‑d s‑dari. ad‑ur‑tiksaḍt.» ikšm s‑dars ġ‑uh̬iyyam. tdl‑t s‑yan‑ufawwu.

¹⁹ yini‑as: «ġir fk‑iyi‑d imikk n‑waman ad‑suġ, ašku yaġ‑iyi irifi.» trẓm tagšult n‑ugʷfay tffi‑as‑d zġ‑gis isu‑t, tdl‑t daġ.

²⁰ yini‑as: «bidd ġ‑imi n‑uh̬iyyam. iġ‑d‑yuška kra n‑yan isqsa‑km: ‹is‑illa kra n‑yan ġid?› tinit‑as: ‹uhu›.»

²¹ walaynni lliġ ign sisra, yawi‑t‑in‑iyṭs ašku irmi bahra. tasi‑d yaɛil tamġart n‑ḥabir yat‑tgust n‑uh̬iyyam, tasi ula amayg ġ‑ufus‑ns. ar‑n‑srs‑ttlkas, tkkʷm tagust‑an ġ‑uṣafẓ n‑ih̬f‑ns aylliġ tkšm ġ‑wakal immt.

²² imma baraq sul‑n‑iẓẓa ġ‑sisra, tffuġ‑d yaɛil a‑t‑in‑tmnaggar, tini‑as: «ašk‑id ad‑ak‑mlġ ġwalli tsiggilt.» ikšm s‑uh̬iyyam‑ns yaf‑n sisra immut, tili‑tgust ġ‑uṣafẓ‑ns.

²³ ġassan a‑isskʷna rbbi yabin agllid n‑kanɛan, inru‑t ġ‑lgddam n‑ayt‑israyil.

²⁴ iwrri ar‑itjhhad‑ufus n‑ayt‑israyil f‑yabin agllid n‑kanɛan aylliġ itthlk‑ugllid yabin n‑kanɛan.