iriyasn 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iqbiln lli‑iqaman ġ‑wakal

¹ yudja sidi rbbi iqbiln‑an baš ad‑srsn‑itarm mddn n‑ayt‑israyil lli‑ur‑izzrin ussan n‑imiġ ġ‑kanɛan.

² yiri a‑iml i‑kullu tasutin n‑ayt‑israyil mamnk a‑iga imiġ, f‑ad‑issann willi ur‑ta‑izzrin imiġ mamnk a‑iga.

³ ha mad‑gan iqbiln lli‑yudja. smmus iriyasn n‑ayt‑filisṭin ula kullu mddn n‑ayt‑kanɛan, ntni d‑ayt‑ṣidun, d‑ayt‑ḥiwi lli‑izdġn ġ‑idrarn n‑lubnan zġ‑udrar n‑baɛl‑ḥarmun ar tizi n‑ḥamat.

⁴ yudja‑tn sidi rbbi ad‑srsn‑itarm ayt‑israyil, f‑a‑iẓr is‑rad‑skarn ayt‑israyil s‑luṣiyat‑ns lli‑f‑yuṣṣa imzwura‑nsn f‑ufus n‑musa.

⁵ ġmkan a‑s‑zdġn ayt‑israyil ġ‑gr ayt‑kanɛan d‑ayt‑ḥit d‑ayt‑amur d‑ayt‑fariz d‑ayt‑ḥiwi d‑ayt‑yabus.

⁶ awin‑d istitsn s‑littihal, fkn ula ntni istitsn i‑tarwa‑nsn, wrrin ar‑tqasan id‑rbbi‑nsn.

ariyqas ɛutniyal

⁷ ar‑tsalan ayt‑israyil ma‑yʷh̬šnn ġ‑iẓri n‑sidi rbbi. ttun rbbi da‑bdda‑illan ig rbbi‑nsn, ar‑tqasan id‑rbbi ‹baɛl› d‑‹ɛaštarut›.

⁸ iznd lġaḍab n‑sidi rbbi f‑ayt‑israyil, ig‑tn ġ‑ufus n‑kušan‑rišɛatayim agllid n‑tmazirt n‑aram lli‑illan ġ‑gr isaffn mqqurnin. wrrin ayt‑israyil gn imqasan ġ‑ddu‑ufus‑ns tam isggʷasn.

⁹ walaynni lliġ a‑aqran ayt‑israyil i‑sidi rbbi, issnkr‑d sidi rbbi yan‑unjjam i‑ayt‑israyil, a‑t‑igan d‑ɛutniyal yus n‑qanaz lli‑igan gʷmas imẓẓin n‑kalab. inkr nttan ijjnjm‑tn.

¹⁰ yili fllas rruḥ n‑sidi rbbi, iḥkam f‑ayt‑israyil, iffuġ ilmma s‑imiġ. ig sidi rbbi ġ‑ufus‑ns kušan‑rišɛatayim agllid n‑aram, itjhhd fllas inru‑t.

¹¹ tsunfu‑ilmma‑tmazirt kkuẓ id‑mraw (40) n‑usggʷas, aylliġ immut ɛutniyal yus n‑qanaz.

ariyas ayhud

¹² wrrin daġ ayt‑israyil ar‑tsalan ma‑yʷh̬šnn ġ‑iẓri n‑sidi rbbi. tizi‑an issdus sidi rbbi ɛiglun agllid n‑muwab a‑inkr s‑ayt‑israyil, ašku salan ma‑yʷh̬šnn ġ‑iẓri‑ns.

¹³ ɛiglun issmun‑d ayt‑ɛammun d‑ayt‑ɛamaliq s‑dars, ddun kullu akʷin f‑ayt‑israyil, amẓn tamdint n‑tayniwin.

¹⁴ wrrin ayt‑israyil gn imqasan ġ‑ddu‑ufus n‑ɛiglun agllid n‑muwab tam d‑mraw (18) n‑usggʷas.

¹⁵ walaynni lliġ a‑aqran ayt‑israyil i‑sidi rbbi, issnkr‑d sidi rbbi yan‑unjjam i‑ayt‑israyil, ism‑ns ayhud, iga yus n‑gira zġ‑tqbilt n‑bnyamin, ig bu‑uẓlmaḍ. aznn‑t ayt‑israyil a‑yawi ḍḍabiyt i‑ɛiglun agllid n‑muwab.

¹⁶ iɛdl ayhud yat‑tuzzalt ilan sin imawn, tġzzif s‑iġil. ikrs‑tt ġ‑ddu‑uslham‑ns f‑umṣaḍ‑ns afasi.

¹⁷ iddu ikšm s‑dar ɛiglun agllid n‑muwab ad‑as‑n‑isrs ḍḍabiyt. iga ɛiglun yan‑urgaz bahra iḍnin.

¹⁸ lliġ‑as‑n‑isrs ayhud ḍḍabiyt kullutt, iffuġ ntta d‑willi‑stt‑id‑dids‑yusin.

¹⁹ walaynni lliġ ilkm dar iẓran nqšnin ġ‑tama n‑gilgal, iwrri waḥdut s‑dar‑ugllid yini‑as: «dari yan‑wawal intln ay‑agllid, riġ ad‑ak‑t‑iniġ.» yamr‑ugllid imqasan‑ns yini‑asn: «fssayt» s‑ffuġn kullu zġ‑dars.

²⁰ yakmur‑n srs ayhud ġ‑tmṣriyt lli‑ġ‑a‑itzzuzwu waḥdut, yini‑as: «dari yan‑wawal zġ‑rbbi i‑kiyi ay‑agllid.» inkr‑ugllid f‑lkursi‑ns.

²¹ ig‑n ayhud afus‑ns aẓlmaḍ, ildi‑d tuzzalt zġ‑umṣaḍ‑ns afasi, yut‑t ġ‑waḥlig.

²² tkšm gis tuzzalt, ikšm‑ula‑ufus n‑tuzzalt, tmun‑d‑fllas tadunt, ašku ur‑d‑issukf tuzzalt zġ‑waḥlig‑ns. iffi‑d‑umazir‑ns.

²³ imma ayhud iffuġ ġakudan zġ‑imi n‑tmṣriyt, irar‑d tiflwin irgl‑tnt.

²⁴ lliġ idda, aškin‑d imqasan n‑ugllid afn‑in tiflwin n‑tmṣriyt rglnt, swangmn d‑ih̬f‑nsn: «hatin ġir idl iḍarn‑ns ġ‑uzuzwu n‑tmṣriyt?»

²⁵ qln aylliġ usin lhmm. lliġ‑ur‑asn‑irẓim tiflwin n‑tmṣriyt, gn‑in tasarut rẓmn‑tt, afn‑in siditsn immut iḍr s‑wakal.

²⁶ lliġ maṭln ntni, injm zġ‑gisn ayhud. izri iẓran lli‑nqšnin, iruḥ s‑tmdint n‑saɛira.

²⁷ lliġ‑n‑ilkm, ar‑ikkat nnffar ġ‑iwrar n‑afraym. huwwdn ilmma dids ayt‑israyil zġ‑iwrar izwur‑asn,

²⁸ yini‑asn: «ḍfurat‑iyi ašku sidi rbbi iga‑yawn inuwwašn‑nun n‑ayt‑muwab ġ‑ufus‑nun.» huwwdn dids, qqnn isukkay n‑wasif n‑urdun f‑ayt‑muwab, ur‑sul‑udjn yan a‑ibbi ġmk ula ġmk.

²⁹ utn ilmma ma‑itggan mraw id‑walf (10 000) ġ‑ayt‑muwab, gn kullu irgazn dusnin ḥaršnin, ur‑gisn‑injm yan.

³⁰ knun ayt‑muwab ġassan ġ‑ddu‑ufus n‑ayt‑israyil, tsunfu‑tmazirt tam id‑mraw (80) n‑usggʷas.

ariyas šamgar

³¹ tigira n‑ayhud illa šamgar yus n‑ɛanat. inġ sḍis id‑miyya (600) n‑urgaz ġ‑ayt‑filisṭin s‑usggʷi n‑imugayn. ula nttan ijjnjm ayt‑israyil.