iriyasn 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ṭiyr i‑sidi rbbi f‑ayt‑israyil

¹ yawn ilmma lmalak n‑sidi rbbi zġ‑gilgal s‑bukim, yini‑asn: «hati ssiwnġ‑kʷn‑d zġ‑miṣr, šškšmġ‑kʷn‑d s‑wakal‑ad lli‑f‑ggulliġ a‑t‑fkġ i‑id‑babatun, iniġ‑awn: ‹ur‑sar‑rẓiġ lɛhd lli‑illan ġ‑griyi didun.

² ula kunni a‑ur‑sar‑tskrm kra n‑lɛhd d‑imzdġn n‑wakal‑ad. h̬lwat ikʷrkar‑nsn n‑tġrṣi.› walaynni ur‑tsfldm kunni s‑wawal‑inu. matta ġayd tskrm?

³ ġilad rad‑awn‑iniġ, ur‑sul‑rad‑ṭṭayġ mddn‑an ġ‑lgddam‑nun. hati rad‑awn‑gn isnnann ġ‑tsgiw‑nun. han id‑rbbi‑nsn rad‑awn‑gn taẓqqurt.»

⁴ ġir inna lmalak n‑sidi rbbi iwaliwn‑an i‑kullu ayt‑israyil, s‑ulln ntni awal‑nsn ar‑allan.

⁵ gn ism ‹bukim› i‑udġar‑an [tga lmɛna‑ns ‹id‑bu‑imṭṭawn›]. ġrṣn gis ġakudan ġ‑umnid n‑sidi rbbi.

akutn ayt‑israyil s‑ikalln‑nsn

⁶ isafḍ ilmma yahušuɛ kullu mddn n‑ayt‑israyil, iftu kraygatt yan a‑iṭṭaf akal n‑lwrt‑ns.

⁷ zaydn ayt‑israyil ar‑tqasan sidi rbbi kullu ussan n‑yahušuɛ, ula kullu ussan n‑imġarn lli‑iqaman ddrn tigira n‑yahušuɛ, gn willi ẓranin kullu iskkirn mqqurnin lli‑iskr sidi rbbi f‑ssibt n‑ayt‑israyil.

⁸ immt ilmma yahušuɛ yus n‑nuwn ah̬ddam n‑sidi rbbi, ilin dars miyya d‑mraw (110) n‑usggʷas.

⁹ mḍln‑t‑in ġ‑gr iwtta n‑lwrt‑ns ġ‑timnat‑ḥaras lli‑illan ġ‑iwrar n‑afraym ġ‑tsga n‑udrar n‑gaɛaš lli‑iwalan asmmiḍ.

¹⁰ izri ma‑izrin s‑ttyattay kullu tasut‑an s‑dar id‑babatsn, tašk‑id tasut yaḍni ur‑tssin sidi rbbi, ula tssn kullu ma‑iskr f‑ssibt n‑israyil.

lḥnant n‑rbbi ula lġaḍab‑ns

¹¹ wrrin ayt‑israyil ar‑tsalan ma‑yʷh̬šnn ġ‑iẓri n‑sidi rbbi, ar‑tqasan ‹id‑baɛl›.

¹² hatni fln rbbi da‑bdda‑illan, ig rbbi n‑id‑babatsn, ig walli‑tn‑d‑issufġn zġ‑wakal n‑miṣr. ḍfurn id‑rbbi yaḍni, ar‑knnun i‑id‑rbbi n‑iqbiln lli‑asn‑isutln, ssṭiyrn‑tt i‑sidi rbbi bahra.

¹³ fln rbbi da‑illan ar‑tqasan id‑rbbi ‹baɛl› d‑‹ɛaštarut›.

¹⁴ iznd lġaḍab n‑sidi rbbi f‑ayt‑israyil, ifl‑tn i‑imh̬h̬arn lli‑išttan ayda‑nsn, ifk‑tn ġ‑ufus n‑inuwwašn‑nsn lli‑asn‑isutln. ur‑sul‑ẓḍarn ad‑biddn ġ‑umnid‑nsn.

¹⁵ ġakud nna‑ffuġn, ar‑tn‑issdullu‑ufus n‑sidi rbbi, ġmklli‑f‑asn‑iggulla ula ġmklli‑tn‑ihddid. hatni ar‑tn‑taġnt‑tguḍiwin bahra.

¹⁶ walaynni sidi rbbi ar‑asn‑d‑issnkar iriyasn, ar‑tn‑tfukkun zġ‑ifassn n‑willi‑tn‑itakʷrn.

¹⁷ walaynni ar‑sul‑tagʷin mddn ad‑sflidn s‑iriyasn‑nsn, ašku wrrin ar‑tfsadn d‑id‑rbbi yaḍni ar‑asn‑knnun. imikk a‑tkkan, s‑a‑tffuġn zġ‑uġaras n‑id‑babatsn lli‑iskarn s‑luṣiyat n‑sidi rbbi, agʷin ad‑skarn ġmkan.

¹⁸ ġakud nna‑yasn‑iskr sidi rbbi ariyas, yili sidi rbbi d‑uriyas‑an, ifukku‑tn zġ‑ufus n‑inuwwašn‑nsn kullu ussan n‑tudrt n‑uriyas‑an. ašku sidi rbbi ar‑bahra‑gisn‑itḥnnu, ġakud nna‑nddrn f‑tɛddiyt d‑trfufnt lli‑s‑tmrrtn f‑ufus n‑inuwwašn‑nsn.

¹⁹ walaynni tizi nna‑immut‑uriyas, grawln daġ ar‑tfsadn uggʷar n‑tasut lli‑izrin, wrrin ḍfurn id‑rbbi yaḍni ar‑tn‑tqasan ar‑asn‑knnun. ur‑rin ad‑fln ġaylli tsalan d‑ġaylli myurn ih̬fawn‑nsn qqurnin.

²⁰ iznd lġaḍab n‑sidi rbbi tigira f‑ayt‑israyil yini: «lliġ rẓan mddn‑ad lɛhd lli‑f‑uṣṣaġ id‑babatsn, ula da‑sflidn ntni s‑wawal‑inu,

²¹ ha‑yyi ula nkki ur‑sul‑rad‑ṭṭayġ ġ‑lgddam‑nsn ḥtta yan‑uqbil zġ‑willi‑d‑ifl yahušuɛ lliġ immut.

²² rad‑armġ ayt‑israyil s‑iqbiln‑an, f‑ad‑ẓrġ is‑rad‑rarn lɛaql ad‑bdda‑fttun ġ‑uġaras n‑rbbi siditsn ġmklli gis ftan id‑babatsn, nġd uhu.»

²³ yudja sidi rbbi iqbiln lli‑ur‑iṭṭay f‑ufus n‑yahušuɛ, qaman ntni tigira‑ns.