iriyasn 16 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ iddu šamšun s‑ġazza iẓr yat‑tmggant ikšm dars.

² sfldn ayt‑ġazza i‑wawal: «yuška‑d šamšun s‑darnġ.» lulliyn i‑tgmmi, mdin‑as iḍ kullut ġ‑imi n‑tmdint. fssan kra illa‑iyḍ inin: «a‑nql ard ifaw‑wass nnġ‑t.»

³ imma šamšun ign ar tuẓẓunt n‑iyḍ, inkr ġakudan yamẓ ġ‑iflwan n‑imi n‑tmdint zġ‑iġʷmran‑nsn, issukf‑tn ntni d‑ifggagn‑nsn. ig‑tn f‑tġʷraḍ‑ns yasi‑tn s‑iggi n‑uwrir lli‑iwalan ḥabrun.

šamšun ġ‑tgmmi n‑dalila

⁴ tigira n‑mayan iḥubbu yat‑tmġart ġ‑talat n‑suraq, ism‑ns dalila.

⁵ awnn iriyasn n‑ayt‑filisṭin s‑dar‑tmġart‑an inin‑as: «ssfjjij‑t ard‑aġ‑d‑zġ‑gis‑tldit mani‑d‑srs‑ttkka lquwwa‑yan itjhhdn, tissant mamnk a‑ra‑fllas‑nssayk a‑t‑nkrf nssdullu‑t. kud yan ginġ rad‑am‑ifk alf d‑miyya (1100) n‑nnʷqrt.»

⁶ tddu dalila tini i‑šamšun: «ġir ini‑yyi mani‑d‑srk‑ttkka lquwwa‑yad itjhhdn, tmlt‑iyi mamnk a‑ra‑k‑ikrf yan iran a‑k‑issdullu.»

⁷ irar‑as šamšun: «iġ‑iyi‑krfn s‑ssa n‑tssuyma n‑ilm izgzawn ur‑ta‑qqurnt, rad‑ḍɛfġ, gġ ġmklli iga bnadm.»

⁸ awin‑d iriyasn n‑ayt‑filisṭin ssa n‑tssuyma n‑ilm izgzawn ur‑ta‑qqurnt, tkrf‑t nttat srsnt.

⁹ rgsn dars kra n‑irgazn ġ‑ugʷns n‑tgmmi. tini‑as: «ha srk ayt‑filisṭin a‑šamšun.» imma ntta ibbi tissuyma zund ġmklli ifsi ifili n‑lkttan iġ‑ikʷḍa lɛafiyt. gammin ad‑issann mani‑d‑srs‑ttkka lquwwa‑ns itjhhdn.

¹⁰ tini ilmma dalila i‑šamšun: «hati ṭṭnẓt gigi, tsskarkst flla. ġir ini‑yyi ġilad mamnk a‑s‑ra‑ttyawkrraft?»

¹¹ irar‑as: «iġ‑iyi‑krfn s‑izakarn n‑ljdid lli‑ur‑jji‑ityawlddayn ġ‑kra, rad‑ḍɛfġ, gġ ġmklli iga bnadm.»

¹² tasi‑d dalila izakarn n‑ljdid, tkrf‑t srsn, tini‑as: «ha srk ayt‑filisṭin a‑šamšun.» ilin daġ kra n‑irgazn rgsn ġ‑ugʷns n‑tgmmi. imma ntta ibbi izakarn f‑iġalln‑ns zund kra n‑ifili.

¹³ tini daġ dalila i‑šamšun: «han kiyi sul a‑gigi‑ṭṭnaẓt, ar‑flla‑tsskirkist. ini‑yyi ġilad mamnk a‑s‑ra‑ttyawkrraft?» irar‑as: «iġ‑tẓḍat ssa n‑tʷkyaḍ n‑wazzar‑inu s‑ifalan n‑idd, tqqnt‑tnt ġ‑tgust, rad‑ḍɛfġ, gġ ġmklli iga bnadm.»

¹⁴ lliġ iṭṭas, tẓḍa ssa n‑tʷkyaḍ n‑wazzar‑ns s‑ifalan n‑idd, tqqn‑tnt ġ‑yat‑tgust tini‑as: «ha srk ayt‑filisṭin a‑šamšun.» imma ntta ifaq‑d zġ‑iyṭs, issukf tagust d‑uṣṭṭa n‑idd lli‑gis‑illan.

¹⁵ tini‑as ilmma: «mamnk a‑ttinit ‹ḥubbiġ‑km› d‑uwl‑nk ur‑didi‑illi? kraṭṭ‑twal ayd gigi ṭṭnaẓt, d‑ur‑ta‑yyi‑tnnit mani‑d‑srk‑ttkka lquwwa‑nk itjhhdn.»

¹⁶ tzayd tẓiyyr‑t ar‑gis‑tqqaz ass f‑wass s‑wawal‑ns, aylliġ iḥaša tudrt‑ns yiri a‑immt.

¹⁷ iml‑as ġakudan kullu ma‑illan ġ‑ih̬f‑ns yini: «ur‑jji‑ikki lmus ih̬f‑inu, ašku giġ wad ityawẓlayn s‑rbbi zġ‑waḥlig n‑inna. iġ‑iyi‑ityawkkas‑wazzar, ra‑yyi‑tfl lquwwa‑nu, wrriġ ḍɛfġ, gġ ġmklli iga bnadm.»

¹⁸ lliġ tssn dalila is‑as‑imla kullu ma‑illan ġ‑ih̬f‑ns, tazn ma‑d‑yaqran i‑iriyasn n‑ayt‑filisṭin tini‑asn: «aškat‑d daġ, ašku imla‑yyi kullu ma‑illan ġ‑ih̬f‑ns.» aškin‑d dars iriyasn, awin‑as‑d nnʷqrt ġ‑ifassn‑nsn.

¹⁹ tssgn‑t f‑ifaddn‑ns nttat aylliġ‑t‑yiwi‑yiṭs, tġr‑d i‑ma‑ys‑issmakkrḍn ssa n‑tʷkyaḍ n‑wazzar‑ns. tbdu ar‑ti‑tssdullu, d‑ntta hati laḥ‑as lquwwa‑ns.

²⁰ tini‑as: «ha srk ayt‑filisṭin a‑šamšun.» ifaq‑d zġ‑iyṭs yini d‑ih̬f‑ns: «rad‑ffuġġ ġmklli bdda, ssussġ ih̬f‑inu dduġ.» ntta ur‑issin is‑t‑ifl sidi rbbi.

²¹ amẓn‑t ayt‑filisṭin ssukfn‑d alln‑ns, sshuwwdn‑t s‑ġazza. krfn‑t s‑ssnasl n‑wanas, rarn‑t a‑iẓẓaḍ imndi ġ‑lḥbs.

²² walaynni azzar n‑ih̬f‑ns lli‑ssmakkrḍn, ar‑d‑itmġay.

lmut n‑šamšun

²³ izri ma‑izrin s‑d‑munn iriyasn n‑ayt‑filisṭin ad‑ġrṣn i‑yat‑tġrṣi ihiyyan ġ‑umnid n‑rbbi‑nsn dagun. zaydn frḥn i‑ngratsn ar‑ttinin: «rbbi‑nġ, hati isrs‑aġ‑d šamšun anuwwaš‑nġ ġ‑ufus‑nġ.»

²⁴ lliġ‑t‑ẓran kullu mddn n‑ayt‑filisṭin, ar‑ttalġn rbbi‑nsn ar‑ttinin: «ha rbbi‑nġ isrs‑aġ‑d šamšun anuwwaš‑nġ, ig walli ih̬ʷlan tamazirt‑nġ, inġ ginġ ma‑iggutn.»

²⁵ lliġ kullu fjjijn f‑uwlawn‑nsn inin: «awyat‑d šamšun ad‑aġ‑ilɛb.» awin‑d šamšun zġ‑lḥbs, ilɛb ġ‑umnid‑nsn. ssbiddn‑t ġ‑gr tannalin.

²⁶ yini šamšun i‑uɛyyal lli‑as‑yumẓn afus: «adj‑iyi ad‑ggrġ i‑tannalin lli‑yusin tigmmi, ad‑fllasnt‑snndġ.»

²⁷ tigmmi‑an tɛmmr s‑irgazn d‑tmġarin, ilin gis kullu iriyasn n‑ayt‑filisṭin. yili ġ‑ukʷfaf ma‑itggan kraḍ id‑walf (3000) n‑urgaz d‑tmġart ar‑di‑tfrrajn ġ‑šamšun ar‑itlɛab.

²⁸ iġr šamšun ġakudan i‑sidi rbbi yini: «wa sidi rbbi, ġir swangm‑iyi‑d, tfkt‑iyi daġ lquwwa ġir tawala‑yad, f‑ad‑rarġ i‑ayt‑filisṭin f‑walln‑inu.»

²⁹ yamẓ šamšun ġ‑snat tannalin n‑tuẓẓunt lli‑yusin tigmmi, yat ġ‑ufasi‑ns d‑yat ġ‑uẓlmaḍ‑ns, isnnd fllasnt.

³⁰ yini: «ad‑mmtġ nkki d‑ayt‑filisṭin.» idḥi tannalin s‑kullu lquwwa‑ns, tḍr‑d‑tgmmi f‑iriyasn ula kullu mddn lli‑gis‑illan. han willi inġa s‑lmut‑ns utin willi inġa ġ‑tudrt‑ns.

³¹ huwwdn‑d ilmma aytmas d‑ayt‑dars kullutn, asin‑t ssawnn‑t‑id, mḍln‑t ġ‑usmḍal n‑babas manuwaḥ ġ‑gr ṣurɛah d‑aštawul. sin id‑mraw (20) n‑usggʷas a‑iḥkam šamšun f‑ayt‑israyil.