iriyasn 15 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

šamšun inra ayt‑filisṭin

¹ zrin kra n‑uwssan aylliġ‑d‑ilkm‑uzmz n‑tmgra n‑irdn, iddu šamšun a‑d‑iẓr tamġart‑ns. yawi dids yan ikru yini: «ra‑n‑kšmġ f‑tmġart‑inu ġ‑tḥanut‑ns.» walaynni ur‑t‑yudji babas nttat a‑n‑ikšm, yini‑as:

² «nkki ġalġ is‑tti‑tḥašat, fkġ‑tt i‑umddakkʷl‑nk. ha ulltmas imẓẓin, is‑ur‑tti‑tuf ġ‑ufulki? ġir ad‑ak‑nssnfl h̬tad s‑h̬tan.»

³ irar‑asn šamšun: «ġilad ur‑ra‑flla‑yili llum iġ‑skrġ kra yʷh̬šnn ġ‑ayt‑filisṭin.»

⁴ iddu yamẓ kraḍ id‑miyya (300) n‑ubaġuġ. kraygatt sin gisn, izdi išṭban‑nsn, ikrs gisn tasafut.

⁵ issrġ ilmma tisufa, irẓm‑asn ġ‑gr imndi n‑igran n‑ayt‑filisṭin. ijdr‑asn tadliwin ula irdn lli‑illan ġ‑igran, d‑uṣġar n‑waḍil ula win zzit.

⁶ inin ayt‑filisṭin i‑ngratsn: «manwa iskrn ġayad?» rarn‑asn: «šamšun lli‑igan aḍggʷal n‑gu‑timnah, ašku ikks‑as tamġart‑ns ifk‑tt i‑umddakkʷl‑ns.» ddun ayt‑filisṭin jdrn‑tt nttat ula babas s‑lɛafiyt.

⁷ izayd šamšun yini‑asn: «lliġ tskrm ġmkan, ur‑ra‑kʷn‑flġ ard‑giwn‑amẓġ lḥqq‑inu.»

⁸ yakʷi‑n fllasn yut‑tn s‑jjhd, irẓ‑tn zġ‑umṣaḍ d‑ufud. ihuwwd ilmma igawr ġ‑gr ijarifn n‑ɛiṭam.

⁹ awnn ilmma ayt‑filisṭin, srsn ġ‑wakal n‑ayt‑yahuda, munn‑d a‑n‑akʷin f‑uduwwar n‑laḥi.

¹⁰ inin‑asn irgazn n‑ayt‑yahuda: «mah̬ a‑d‑srnġ‑tiwnm?» rarn‑asn: «a‑nkrf šamšun nskr‑as ġmklli‑aġ‑iskr, mayan a‑f‑d‑niwn.»

¹¹ huwwdn kraḍ id‑walf (3000) n‑urgaz n‑ayt‑yahuda s‑gr ijarifn n‑ɛiṭam, inin i‑šamšun: «is‑ur‑tssint ayt‑filisṭin is‑a‑tḥkamn f‑tmazirt‑nġ? matta ġayd‑aġ‑tskrt?» irar‑asn: «mklli‑yyi‑skrn ad‑asn‑skrġ.»

¹² inin‑as: «nhuwwd‑d a‑k‑nkrf ġilad, nsrs‑k‑in ġ‑ufus n‑ayt‑filisṭin.» yini‑asn šamšun: «ggallat‑iyi is‑ur‑ra‑yyi‑tkkatm kunni.»

¹³ rarn‑as: «uhu, ur‑ra‑k‑nnġ. ġir a‑k‑nkrf nfk‑k‑in ġ‑ufus‑nsn.» krfn‑t s‑sin izakarn n‑ljdid, ssawnn‑t‑id zġ‑gr ijarifn.

¹⁴ lliġ‑n‑ilkm aduwwar n‑laḥi, aškin‑d ayt‑filisṭin a‑t‑id‑mnaggarn, utn s‑tġuya. igguz‑d fllas rruḥ n‑sidi rbbi s‑jjhd, wrrin izakarn f‑iġalln‑ns zund lkttan lli‑ifsin s‑lɛafiyt, ḍrn iskraf zġ‑ifassn‑ns.

¹⁵ iẓr ġin yat‑tqʷsmart n‑imi n‑uġyul sul tzgzaw, imdi‑n afus yasi‑tt‑id, yut srs alf n‑urgaz.

¹⁶ yini šamšun: «igudiyn f‑igudiyn s‑tqʷsmart n‑uġyul. s‑tqʷsmart n‑uġyul a‑s‑nġiġ alf n‑urgaz.»

¹⁷ ġir inna‑t, iluḥ‑n taqʷsmart zġ‑ufus‑ns. wrrin ar‑ttinin i‑udġar‑an ‹ramat‑laḥi› [tga lmɛna‑ns awrir n‑tqʷsmart].

¹⁸ yaġ‑t ilmma irifi bahra, iġr s‑sidi rbbi yini: «ġilad ġ‑tkmmlt afukku‑ad ihiyyan f‑ufus n‑uh̬ddam‑nk, is‑ra‑yyi‑tadjt ad‑mmtġ s‑irifi, ḍrġ ġ‑ifassn n‑id‑bu‑ilmš‑an?»

¹⁹ issbbaqi‑d rbbi agʷḍi iqqurn lli‑illan ġ‑laḥi, ffuġn‑d‑zġ‑gis‑waman. isu šamšun, twrri‑t‑id rruḥ n‑tudrt. mayan a‑f‑a‑ys‑ttinin ‹ɛin‑haqquri› [tga lmɛna‑ns talɛint n‑walli iġran], tili ġ‑laḥi sul s‑ġassad.

²⁰ sin id‑mraw (20) n‑usggʷas a‑iḥkam šamšun f‑ayt‑israyil ġ‑uwssan n‑ayt‑filisṭin.