iriyasn 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

talalit n‑uriyas šamšun

¹ wrrin daġ ayt‑israyil ar‑tsalan ma‑yʷh̬šnn ġ‑iẓri n‑sidi rbbi. iluḥ‑tn‑in ġ‑ufus n‑ayt‑filisṭin kkuẓ id‑mraw (40) n‑usggʷas.

² yili yan‑urgaz ġ‑tmdint n‑ṣurɛah zġ‑tqbilt n‑dan ism‑ns manuwaḥ. tamġart‑ns ur‑tli tarwa wala jji trba.

³ yan‑wass iban‑d lmalak n‑sidi rbbi i‑tmġart‑an yini‑as: «hati ġilad, ur‑jji‑turut wala jji trbit, walaynni ra‑tffuġt ar‑trbbut tarut yan‑warraw.

⁴ rar lɛaql ġilad a‑ur‑tssat kra iktin ula kra issmlilliyn, d‑a‑ur‑tšttat aynna indsn.

⁵ ašku ra‑trbbut tarut yan‑warraw. d‑a‑ur‑sar‑ik lmus f‑wazzar‑ns. ašku aḥšmi‑an ra‑ig wad ityawẓlayn i‑rbbi zġ‑waḥlig n‑innas, iffuġ ilmma a‑ifukku ayt‑israyil zġ‑ufus n‑ayt‑filisṭin.»

⁶ tddu‑tmġart‑lli tini i‑urgaz‑ns: «yuška‑d sri yan‑uh̬ddam n‑rbbi, irwas‑iyi lmalak n‑rbbi s‑lmajd‑ns iggutn. ur‑t‑sqsaġ gu‑mani a‑iga, wala imla‑yyi ism‑ns.

⁷ inna‑yyi: ‹hati ra‑tffuġt ar‑trbbut tarut yan‑warraw. a‑ur‑tssat ma‑iktin ula ma‑issmlilliyn, wala da‑tšttat ma‑indsn, ašku arraw‑an ra‑ig wad ityawẓlayn i‑rbbi, zġ‑waḥlig n‑innas ar ass lli‑ġ‑immut.› »

⁸ iẓẓall manuwaḥ i‑sidi rbbi yini: «a‑rbbi‑nu, ġir a‑di‑taznt ah̬ddam‑nk lli‑d‑yad‑tuznt, f‑ad‑aġ‑iml ma‑ra‑nskar i‑uḥšmi‑ad ra‑d‑ilal?»

⁹ isfld rbbi i‑wawal n‑manuwaḥ, yašk‑id daġ lmalak n‑rbbi s‑tmġart d‑nttat tskiws ġ‑igr, ur‑dids‑illi‑urgaz‑ns manuwaḥ.

¹⁰ tḥarru‑tmġart tazzl tini i‑urgaz‑ns: «han iban‑d‑daġ‑sri‑urgaz‑lli n‑ġassan.»

¹¹ inkr manuwaḥ iḍfur tamġart‑ns, yašk‑id dar‑urgaz‑an isqsa‑t: «izd kiyi a‑igan argaz lli‑isawln s‑tmġart‑ad?» yini‑as‑d: «nkki a‑t‑igan.»

¹² isqsa‑t manuwaḥ: «tizi nna‑yuwfa‑wawal‑nk, ma‑s‑ra‑itnbaḍ‑uḥšmi ġ‑tudrt‑ns ula ma‑s‑ra‑ilhu?»

¹³ yini lmalak n‑sidi rbbi i‑manuwaḥ: «han kullu mad‑nniġ i‑tmġart‑nk, a‑srs‑trar lɛaql.

¹⁴ a‑ur‑tštta ma‑d‑ikkan ddilit, wala da‑tssa ma‑iktin ula ma‑issmlilliyn, wala da‑tštta kra indsn. illa fllas a‑stti‑ttawi ġ‑kullu ma‑f‑tt‑uṣṣaġ.»

¹⁵ yini manuwaḥ i‑lmalak n‑sidi rbbi: «brrk darnġ ad‑ak‑d‑njjujad yan ikru, nsrs‑t‑id ġ‑umnid‑nk.»

¹⁶ irar‑d lmalak n‑sidi rbbi i‑manuwaḥ: «wah̬h̬a gigi tumẓt, ur‑rad‑ššġ tirmt‑nk. iġ‑trit a‑tskrt tiġrṣi ijdrn, ssattuy‑tt i‑rbbi sidik.» manuwaḥ ur‑issin izd lmalak n‑sidi rbbi ayan.

¹⁷ izayd manuwaḥ isqsa lmalak n‑sidi rbbi: «ma‑iga ism‑nk baš a‑k‑nuqqr ġakud nna‑yuwfa‑wawal‑nk?»

¹⁸ irar‑as‑d lmalak n‑sidi rbbi: «mah̬ a‑tsqsat ġ‑ism‑inu? hati yattuy‑n bahra fllak.»

¹⁹ yasi‑d manuwaḥ ikru‑ns, izayd‑as tawafka n‑imndi, issattuy‑tn f‑uẓru i‑sidi rbbi lli‑iskarn lɛjayb. iqama manuwaḥ d‑tmġart‑ns ar‑gis‑tmnadn.

²⁰ lliġ‑iġli‑ufdaddu n‑lɛafiyt zġ‑uẓru n‑tġrṣi s‑ignwan, yattuy lmalak n‑sidi rbbi ġ‑ufdaddu n‑tġrṣi. ar‑gis‑itmnad manuwaḥ d‑tmġart‑ns, knun ġakudan f‑uwdm‑nsn ar akal.

²¹ lliġ ur‑sul‑a‑itban lmalak n‑sidi rbbi i‑manuwaḥ d‑tmġart‑ns, ġakudan a‑issn manuwaḥ izd lmalak n‑sidi rbbi ayan.

²² yini i‑tmġart ns: «s‑lḥqq ra‑nmmt ašku nẓra rbbi.»

²³ imma tamġart‑ns tnna‑yas: «mra is‑inuwwa sidi rbbi ad‑aġ‑inġ, lukun ur‑iqbil tiġrṣi ijdrn d‑twafka n‑imndi f‑ufus‑nġ, wala issmla‑yaġ‑d kullu tiġawsiwin‑ad ġassad, wala inna‑yaġ‑d wan iwaliwn‑ad.»

²⁴ taru‑ilmma‑tmġart yan‑warraw, tg‑as ism šamšun. yimġur‑uḥšmi, ibark‑t sidi rbbi.

²⁵ ibdu rruḥ n‑sidi rbbi ar‑t‑idḥḥi ġ‑usras n‑ayt‑dan ġ‑gr‑tmdinin n‑ṣurɛah d‑aštawul.