iriyasn 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iftaḥ immaġ d‑ayt‑afraym

¹ imma ayt‑afraym, tffuġ‑darsn‑tbrraḥt ad‑munn. bbin‑d asif s‑tmdint n‑ṣafun inin i‑iftaḥ: «mah̬ a‑n‑tbbit a‑tmmaġt d‑ayt‑ɛammun, ur‑aġ‑tɛlmt nkkʷni a‑dik‑nmun? ġilad rad‑fllak‑njdr tigmmi‑nk s‑lɛafiyt.»

² yini‑asn iftaḥ: «nkki d‑mddn‑inu, tnkr yat‑ṭaẓit išqan ġ‑gratnġ d‑ayt‑ɛammun. ɛlmġ‑kʷn‑in ġakudan walaynni ur‑iyi‑zġ‑gisn‑tfukkim.

³ lliġ‑kʷn‑ẓriġ ur‑trim a‑yyi‑zġ‑gisn‑tfukkum, ṣamḥġ ġ‑tudrt‑inu bbiġ‑n s‑dar ayt‑ɛammun. iluḥ‑tn sidi rbbi ġakudan ġ‑ufus‑inu. lliġd ġmkan a‑ijran, ma‑f‑d‑dari‑tiwnm ġassa a‑didi‑tmmaġm?»

⁴ issmun‑d iftaḥ kullu irgazn n‑gilɛad, immaġ d‑ayt‑afraym. zaydn irgazn n‑gilɛad ar‑tn‑kkatn, ašku sfldn‑asn ar‑gisn‑rggmn s‑wawal‑ad: «kunni n‑ayt‑gilɛad tgam zġ‑ayt‑afraym, trwlm zġ‑wammas n‑afraym d‑manaššah.»

⁵ amẓn ayt‑gilɛad isukkay n‑wasif n‑urdun a‑ur‑sul‑zġ‑gisn‑bbin ayt‑afraym. wanna‑d‑irwln zġ‑wakal n‑afraym iḍalb i‑ayt‑gilɛad yini: «adjat‑iyi ad‑bbiġ», ar‑t‑sqsan: «izd gu‑afraym a‑tgit?» iġ‑asn‑inna: «uhu»,

⁶ rarn‑as: «ini šibbulat», yini ntta: «sibbulat», ašku ur‑iẓḍar a‑t‑yini s‑mklli iga. amẓn‑t ġakudan nġn‑t ġ‑tama n‑isukkay n‑wasif n‑urdun. mmtn kkuẓ id‑mraw d‑sin n‑walf (42 000) ġ‑ayt‑afraym ġ‑uwssan‑an.

⁷ sḍis isggʷasn a‑iḥkam iftaḥ f‑ayt‑israyil. immt ilmma iftaḥ gu‑gilɛad ityawmḍal ġ‑tmdint‑ns ġ‑wakal n‑gilɛad.

ariyas ibṣan

⁸ tigira‑ns iḥkam ibṣan gu‑bitlaḥm f‑ayt‑israyil.

⁹ ilin dars kraḍ id‑mraw (30) n‑ufruh̬ d‑kraṭṭ id‑mrawt (30) n‑tfruh̬t. isstahl istis s‑brra n‑tagʷmat‑ns, yawi‑d kraṭṭ id‑mrawt n‑tslit i‑tarwa‑ns zġ‑brra n‑tagʷmat‑ns. ssa n‑isggʷasn a‑iḥkam ibṣan f‑ayt‑israyil.

¹⁰ immt ilmma ityawmḍal ġ‑bitlaḥm.

ariyas ilun

¹¹ tigira‑ns yili ilun gu‑zabulun, iḥkam f‑ayt‑israyil mraw isggʷasn.

¹² immt ilun gu‑zabulun, ityawmḍal ġ‑ayalun ġ‑wakal n‑zabulun.

ariyas ɛabdun

¹³ tigira‑ns yili ɛabdun lli‑igan yus n‑hillil gu‑firɛatun, iḥkam f‑ayt‑israyil.

¹⁴ ilin dars kkuẓ id‑mraw (40) n‑tarwa, d‑kraḍ id‑mraw (30) n‑tarwa n‑tarwa‑ns, ar‑ssidun ssa n‑id‑mraw (70) n‑uġyul. iḥkam f‑ayt‑israyil tam isggʷasn.

¹⁵ immt ilmma ɛabdun yus n‑hillil gu‑firɛatun, ityawmḍal ġ‑firɛatun ġ‑wakal n‑afraym, ġ‑iwrar n‑ayt‑ɛamaliq.