iriyasn 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ariyas iftaḥ

¹ iftaḥ gu‑gilɛad iga amdwas iḥaršn. gilɛad a‑igan babas, walaynni innas tga tamggant.

² ha tamġart n‑gilɛad twrri ula nttat turu kra n‑tarwa. lliġ mqqurn ntni, ssmsrn iftaḥ inin‑as: «ur‑ra‑didnġ‑twrtt ġ‑tgmmi n‑babatnġ, ašku tgit yus n‑tmġart yaḍni.»

³ irwl iftaḥ zġ‑aytmas, iddu iqama‑n ġ‑wakal n‑ṭub, ar‑n‑dars‑tmununn kra n‑id‑bu‑ijrman ar‑dids‑tlulliyn.

⁴ izri ma‑izrin s‑nkrn ayt‑ɛammun ad‑mmaġn d‑ayt‑israyil.

⁵ lliġ skrn ayt‑ɛammun f‑imiġ d‑ayt‑israyil, ddun imġarn n‑gilɛad ad‑d‑awin iftaḥ zġ‑wakal n‑ṭub.

⁶ inin‑as: «ašk‑id tgt ariyas‑nġ a‑nmmaġ d‑ayt‑ɛammun.»

⁷ irar iftaḥ i‑imġarn n‑gilɛad: «is‑urd kunni a‑yyi‑ikurhan, tssmsrm‑iyi‑d zġ‑tgmmi n‑baba? mah̬ a‑d‑sri‑tuškam ġilad ġ‑tllam ġ‑tnukmut?»

⁸ inin imġarn n‑gilɛad i‑iftaḥ: «mayan a‑yġ‑d‑dark‑yiwin ġilad, baš ad‑didnġ‑tmunt a‑nmmaġ d‑ayt‑ɛammun, tgt kiyi ih̬f f‑kullu imzdġn n‑gilɛad.»

⁹ irar iftaḥ i‑imġarn n‑gilɛad yini‑asn: «iġ‑iyi‑daġ‑tšškšmm s‑darun f‑ad‑mmaġġ d‑ayt‑ɛammun, d‑iġ‑iyi‑tn‑d‑isrs sidi rbbi ġ‑umnid‑inu, s‑ṣṣaḥt rad‑fllawn‑gġ ih̬f.»

¹⁰ inin imġarn n‑gilɛad i‑iftaḥ: «sidi rbbi a‑igan inigi ġ‑gratnġ iġ‑ur‑nskir ġmklli‑s‑tnnit.»

¹¹ iddu iftaḥ imun d‑imġarn n‑gilɛad, rḍun srs mddn a‑ig ih̬f d‑uriyas fllasn. lliġ lkmn miṣfah, iɛawd iftaḥ i‑iwaliwn‑ns ġ‑umnid n‑sidi rbbi.

¹² yazn iftaḥ irqqasn s‑ugllid n‑ayt‑ɛammun yini‑as: «ma‑illan ġ‑griyi dik aylliġ‑d‑dari‑tuškit a‑didi‑tmmaġt f‑wakal‑inu?»

¹³ irar‑d‑ugllid n‑ayt‑ɛammun i‑irqqasn n‑iftaḥ yini: «ašku ayt‑israyil, ġakud lli‑ġ‑d‑iwnn zġ‑miṣr, kksn‑iyi akal lli‑igan winu zġ‑isaffn n‑arnun d‑yabbuq ar asif n‑urdun. rarat‑iyi‑t‑id ġilad s‑sslamt.»

¹⁴ yazn daġ iftaḥ irqqasn i‑ugllid n‑ayt‑ɛammun

¹⁵ yini‑as: «ha mad‑ak‑inna iftaḥ. ayt‑israyil ur‑umẓn akal n‑ayt‑muwab wala win ayt‑ɛammun,

¹⁶ ašku lliġ‑d‑iwnn ayt‑israyil zġ‑miṣr, kn‑d lh̬la d‑umda azggʷaġ aylliġ lkmn qadaš.

¹⁷ aznn ilmma ayt‑israyil irqqasn s‑ugllid n‑adum inin‑as: ‹ġir adj‑aġ a‑nzri zġ‑wakal‑nk.› yagʷi‑ugllid n‑adum ad‑asn‑isfld. aznn ġmkan s‑ugllid n‑muwab, yagʷi ula nttan a‑tn‑yadj. biddn ayt‑israyil gawrn ġ‑qadaš.

¹⁸ «muddun ilmma ġ‑lh̬la, sutln‑d i‑wakal n‑adum d‑win muwab, lkmn awttu n‑muwab lli‑iwalan asġlay n‑tafukt, srsn ġ‑tsga yaḍni n‑wasif n‑arnun. walaynni ur‑kšimn s‑tmazirt n‑muwab, ašku asif n‑arnun a‑igan awttu‑ns.

¹⁹ aznn ilmma ayt‑israyil irqqasn s‑siḥun agllid n‑ayt‑amur lli‑iḥkamn ġ‑ḥašbun, inin‑as: ‹ġir adj‑aġ a‑nzri zġ‑tmazirt‑nk s‑wakal‑nġ.›

²⁰ walaynni siḥun ur‑yumin is‑rad‑zrin ayt‑israyil ġmkan zġ‑tmazirt‑ns. inkr siḥun issmun‑d kullu mddn‑ns, srsn ġ‑yahaṣ, mmaġn ġakudan d‑ayt‑israyil.

²¹ imma rbbi da‑bdda‑illan ig rbbi n‑ayt‑israyil isrs‑n siḥun d‑kullu inmmaġn‑ns ġ‑ufus n‑ayt‑israyil, nrun‑tn. wrrin ṭṭafn kullu tamazirt n‑ayt‑amur lli‑igan imzdġn n‑wakal‑an.

²² ṭṭafn kullu tamazirt n‑ayt‑amur, zġ‑wasif n‑arnun ar asif n‑yabbuq, zġ‑lh̬la ar asif n‑urdun.

²³ ġmkan a‑iskr rbbi da‑bdda‑illan ig rbbi n‑ayt‑israyil, ikks ayt‑amur zġ‑wakal‑ad, f‑a‑t‑ṭṭafn mddn‑ns n‑ayt‑israyil. mamnk a‑s‑ra‑ti‑teṭṭaft kiyi?

²⁴ is‑ur‑teṭṭaft akal lli‑ak‑ifka kamuš da‑igan rbbi‑nk, nṭṭaf ula nkkʷni akal lli‑aġ‑d‑yumẓ rbbi siditnġ a‑ig winġ?

²⁵ «is‑tuft balaq yus n‑ṣiffur agllid n‑muwab? is‑jji‑iẓi nttan d‑ayt‑israyil, nġd jji‑d‑inkr a‑didsn‑immaġ?

²⁶ kraḍ id‑miyya (300) n‑usggʷas ayd zdġn ayt‑israyil ġ‑ḥašbun d‑iduran‑ns, zdġn ġ‑ɛarɛur d‑iduran‑ns, zdġn ġ‑kullu‑tmdinin ġ‑tamiw n‑wasif n‑arnun. mah̬ aylliġ‑ur‑tnti‑tumẓm ġ‑isggʷasn‑an?

²⁷ nkki ur‑fllak‑ffuġġ aġaras, imma kiyi tʷh̬šnt sri lliġ tnuwwat ad‑didi‑tmmaġt. ha‑lḥakm iga‑t rbbi da‑illan. a‑iḥkam nttan ġassad ġ‑gr ayt‑israyil d‑ayt‑ɛammun.»

²⁸ walaynni agllid n‑ayt‑ɛammun ur‑tt‑yiwi ġ‑wawal lli‑as‑yuzn iftaḥ.

tagallit n‑iftaḥ

²⁹ igguz‑d rruḥ n‑sidi rbbi f‑iftaḥ, izri ġ‑tmazirt n‑gilɛad d‑tin manaššah, iftu s‑tmdint n‑miṣfah ġ‑gilɛad, izayd zġ‑miṣfah aylliġ ilkm dar ayt‑ɛammun.

³⁰ iggall iftaḥ i‑sidi rbbi yini: «iġ‑tgit ayt‑ɛammun ġ‑ufus‑inu,

³¹ rad‑ak‑fkġ aynna‑d‑iffuġn zġ‑imi n‑tgmmi‑nu a‑yyi‑d‑imnaggar ġ‑tizi nna‑d‑wrriġ ġ‑sslamt zġ‑dar ayt‑ɛammun. ra‑t‑ssattuyġ a‑ig tiġrṣi ijdrn i‑sidi rbbi.»

³² ibbi iftaḥ asif ġakudan s‑dar ayt‑ɛammun a‑didsn‑immaġ. ig‑tn sidi rbbi ġ‑ufus‑ns.

³³ ar‑tn‑ikkat zġ‑ɛarɛur ar tamiw n‑minnit, ih̬lu snat id‑mrawt (20) n‑tmdint, irẓ‑tn tirẓi išqan ar abal‑karamim. ġmkan a‑s‑wrrin ayt‑ɛammun knun ġ‑ddu‑ufus n‑ayt‑israyil.

³⁴ iwrri‑d ilmma iftaḥ s‑tgmmi‑ns ġ‑miṣfah, s‑ha illis tffuġ‑d a‑ti‑di‑tmnaggar s‑tilluna d‑tšṭṭaḥt. nttat waḥdutt a‑dars‑illan, ur‑iṭṭaf kra n‑ufruh̬ nġd kra n‑tfruh̬t yaḍni.

³⁵ lliġ‑tt‑iẓra, ibbi timlsit‑ns yini: «aḥḥ a‑illi, tjdrt tasa‑nu, tssaġt‑iyi taguḍi išqan. ašku ggulliġ i‑sidi rbbi, d‑ur‑ẓḍarġ ad‑wrriġ f‑tgallit‑inu.»

³⁶ tini‑as: «wa baba, iġ‑tggullit i‑sidi rbbi, skr‑iyi ma‑tnnit ġ‑tgallit‑nk, ašku ifka‑yak lḥqq‑nk ġ‑inuwwašn‑nk n‑ayt‑ɛammun.»

³⁷ tini ilmma i‑babas: «ḍalbġ‑ak ġir taġawsa‑yad. adj‑iyi sin‑iyrn a‑tlulliyġ ġ‑iwrar, nkki d‑tmddukkʷalin‑inu, ar‑allaġ f‑tarwa lli‑ur‑rad‑aruġ.»

³⁸ yini‑as: «zayd.» yadj‑tt sin‑iyrn. tddu nttat d‑tmddukkʷalin‑ns s‑iwrar ar‑talla f‑tarwa lli‑ur‑ra‑taru.

³⁹ lliġ kmmln sin‑iyrn, twrri‑d s‑dar babas, iskr‑as ġaylli‑f‑iggulla. nttat ur‑jji‑tkki dar‑urgaz. wrrin ilmma ayt‑israyil ar‑skarn ġmkad.

⁴⁰ asggʷas ar asggʷas ar‑ttidunt‑tɛyyalin ar‑n‑allant kkuẓ‑uwssan f‑illis n‑iftaḥ gu‑gilɛad.