iriyasn 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ariyas tulaɛ

¹ lliġ immut abimalik inkr‑d tulaɛ lli‑igan yus n‑fuwa lli‑igan yus n‑dudu a‑ifukku ayt‑israyil. ig nttan zġ‑tqbilt n‑yassakar, izdġ ġ‑tmdint n‑šamir ġ‑iwrar n‑afraym.

² iḥkam f‑ayt‑israyil sin id‑mraw d‑kraḍ (23) n‑usggʷas, immt ilmma ityawmḍal ġ‑šamir.

ariyas yayir

³ tigira‑ns inkr‑d yayir gu‑gilɛad, iḥkam f‑ayt‑israyil sin id‑mraw d‑sin (22) n‑usggʷas.

⁴ llan dars kraḍ id‑mraw (30) n‑warraw ar‑ssidun kraḍ id‑mraw (30) n‑uġyul, ṭṭafn kraṭṭ id‑mrawt (30) n‑tmdint lli‑mi‑ttinin ḥawut‑yayir sul s‑ġassad, ilint ġ‑wakal n‑gilɛad.

⁵ immt ilmma yayir ityawmḍal ġ‑qamun.

ayt‑israyil fln rbbi‑nsn

⁶ wrrin daġ ayt‑israyil ar‑tsalan ma‑yʷh̬šnn ġ‑iẓri n‑sidi rbbi. ar‑tqasan ‹baɛl› d‑‹ɛaštarut› d‑id‑rbbi n‑tmazirt n‑aram d‑win ṣidun d‑win muwab d‑win ayt‑ɛammun d‑win ayt‑filisṭin. fln rbbi da‑illan, ur‑sul‑a‑ti‑tqasan.

⁷ iznd lġaḍab n‑sidi rbbi f‑ayt‑israyil, iluḥ‑tn‑in ġ‑ufus n‑ayt‑filisṭin d‑ayt‑ɛammun.

⁸ brin ayt‑israyil ġasggʷas‑an ẓḍan‑tn. tam d‑mraw (18) n‑usggʷas ad‑skarn ġmkan i‑kullu ayt‑israyil ġ‑tsga‑yan yaḍni n‑wasif n‑urdun, ġ‑tmazirt n‑gilɛad lli‑yadlli igan akal n‑ayt‑amur.

⁹ zaydn ayt‑ɛammun bbin asif n‑urdun a‑n‑akʷin f‑tqbilin n‑yahuda d‑bnyamin d‑afraym. han ayt‑israyil, aġnt‑tn‑tguḍiwin bahra.

¹⁰ ar‑daġ‑aqran ayt‑israyil s‑sidi rbbi inin: «nskr‑ak ma‑yʷh̬šnn bahra, ašku nfl rbbi‑nġ ar‑ntqasa ‹id‑baɛl›.»

¹¹ isawl‑d sidi rbbi i‑ayt‑israyil yini‑asn: «is‑ur‑kʷn‑d‑fukkiġ zġ‑ayt‑miṣr d‑ayt‑amur d‑ayt‑ɛammun d‑ayt‑filisṭin?

¹² lliġ srun ssnukman ayt‑ṣidun d‑ayt‑ɛamaliq d‑ayt‑maɛun, tnkrm ar‑sri‑taqram, is‑ur‑kʷn‑d‑fukkiġ zġ‑ufus‑nsn?

¹³ imma kunni, hati tflm‑iyi tddum ar‑ttqasam id‑rbbi yaḍni. ġayan a‑f‑ur‑sul‑ra‑kʷn‑fukkuġ.

¹⁴ zaydat ġilad ar‑taqram s‑id‑rbbi lli‑tstim, a‑kʷn‑fukkun ġ‑tasaɛt n‑tnukmut‑nun.»

¹⁵ inin ilmma ayt‑israyil i‑sidi rbbi: «s‑ṣṣaḥt nskr ma‑yʷh̬šnn bahra, d‑aynna igan lḥqq ġ‑iẓri‑nk, tskrt‑aġ‑t, walaynni ġir fukku‑aġ ġassad.»

¹⁶ kksn ntni id‑rbbi iġribn zġ‑darsn ġakudan, wrrin ar‑tqasan rbbi da‑bdda‑illan. ula ntta iwrri ur‑sul‑iḥmil takrrayt lli‑illan f‑ayt‑israyil.

¹⁷ tffuġ‑tbrraḥt ġ‑dar ayt‑ɛammun ad‑d‑munn, srsn ġ‑wakal n‑gilɛad. munn‑d ula ayt‑israyil, srsn ġ‑miṣfah.

¹⁸ inin iriyasn n‑ayt‑gilɛad i‑ngratsn: «wanna ginġ izwurn immaġ d‑ayt‑ɛammun, nttan a‑ra‑ig ih̬f f‑kullu imzdġn n‑gilɛad.»