iriyasn 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imiġ d‑ayt‑kanɛan

¹ lliġ immut yahušuɛ, ddun ayt‑israyil sqsan sidi rbbi: «manwi ginġ a‑ra‑izwur ad‑awnn utn ayt‑kanɛan?»

² isawl‑d sidi rbbi yini: «ayt‑yahuda a‑ra‑yawn. hati giġ akal‑an ġ‑ufus‑nsn.»

³ inin ilmma ayt‑yahuda i‑aytmatsn ayt‑šimɛun: «munat‑d didnġ s‑taġamt‑nġ a‑gis‑nut ayt‑kanɛan, nmun didun ula kunni tigira s‑taġamt‑nun.» nkrn ayt‑šimɛun munn didsn.

⁴ awnn ayt‑yahuda ġakudan, ig sidi rbbi ayt‑kanɛan d‑ayt‑fariz ġ‑ufus‑nsn, nrun mraw id‑walf (10 000) ġ‑tmdint n‑bazaq.

⁵ afn‑in agllid aduni‑bazaq ġ‑tmdint n‑bazaq, mmaġn dids, nrun mddn‑an n‑ayt‑kanɛan d‑ayt‑fariz.

⁶ imma aduni‑bazaq irwl‑asn. ḍfurn‑t amẓn‑t, bbin‑as ikmzn d‑tfdnin mqqurnin.

⁷ yini aduni‑bazaq: «ssa n‑id‑mraw (70) n‑ugllid a‑mi‑bbiġ ikmzn d‑tfdnin mqqurnin, ar‑grrun ibruzziyn n‑uġrum ġ‑ddu lmida‑inu. ġaylli‑asn‑skrġ, irur‑iyi‑t rbbi.» awin‑t ilmma s‑urušalim, immt gis.

kšmn ayt‑yahuda s‑lwrt‑nsn

⁸ akʷin‑in ayt‑yahuda f‑tmdint n‑urušalim, amẓn‑tt utn‑tt s‑uwzzal imsidn, jdrn‑tt s‑lɛafiyt.

⁹ huwwdn ilmma irgazn n‑yahuda ad‑mmaġn d‑ayt‑kanɛan lli‑izdġn ġ‑iwrar ula ġ‑lh̬la n‑nagab ula ġ‑igsarn lli‑iwalan amda.

¹⁰ akʷin‑in ayt‑yahuda f‑ayt‑kanɛan imzdġn n‑tmdint n‑ḥabrun, lli‑mi‑ttinin ‹qiryat‑arbaɛ› ġayd izrin, nrun šišay d‑ah̬iman d‑talmay.

¹¹ zaydn zġ‑ġin akʷin f‑imzdġn n‑tmdint n‑dabir, lli‑mi‑ttinin qiryat‑sifr ġayd izrin.

¹² yini kalab tizi‑an: «wanna yutn qiryat‑sifr yamẓ‑tt, rad‑as‑fkġ illi ɛah̬sa a‑tg tamġart‑ns.»

¹³ iddu ɛutniyal yus n‑qanaz lli‑igan gʷmas imẓẓin n‑kalab, yamẓ tamdint‑an. ifk‑as kalab illis ɛah̬sa a‑tg tamġart‑ns.

¹⁴ lliġ tkšm dar‑urgaz‑ns, iẓiyyr‑tt a‑tḍalb zġ‑babas kalab a‑ifk yan igr i‑illis. lliġ tgguz nttat f‑uġyul‑ns, isqsa‑tt kalab: «ma‑km‑ih̬ṣṣan?»

¹⁵ tini‑as: «fk‑iyi yat lbaraka. lliġ‑iyi‑n‑tgit ġ‑lh̬la n‑nagab, fk‑iyi dids talɛinin n‑waman.» izayd ifk‑as talɛinin n‑uflla d‑tin izdar.

¹⁶ imma ayt‑qin lli‑igan tarwa n‑uḍggʷal n‑musa, iwnn ula ntni d‑ayt‑yahuda zġ‑tmdint n‑tayniwin s‑lh̬la n‑yahuda lli‑illan ġ‑nagab ġ‑tama n‑ɛarad, munn didsn zdġn ġin ġ‑gratsn.

¹⁷ ddun ayt‑yahuda d‑aytmatsn ayt‑šimɛun, nrun ayt‑kanɛan imzdġn n‑tmdint n‑ṣafat, fnun‑tn kullutn. gn ilmma ism ‹ḥurma› i‑tmdint‑an.

¹⁸ zaydn ayt‑yahuda amẓn tamdint n‑ġazza d‑iduran‑ns, ula ašqalun d‑iduran‑ns, ula ɛaqrun d‑iduran‑ns.

¹⁹ yili sidi rbbi d‑ayt‑yahuda, ɛmmrn timizar n‑iwrar, walaynni ur‑ẓḍarn ad‑ṭṭayn imzdġn n‑uzaġar, ašku ṭṭafn ntni lkrarṣ n‑uwzzal.

²⁰ tamdint n‑ḥabrun ttyawfka i‑kalab ġmklli‑f‑yuṣṣa musa, iṭṭay zġ‑gis tarwa n‑ɛanaq s‑kraḍ.

qaman ayt‑yabus ġ‑urušalim

²¹ imma ayt‑bnyamin ur‑ṭṭayn ayt‑yabus imzdġn n‑tmdint n‑urušalim. zdġn ayt‑yabus ġ‑gr ayt‑bnyamin ġ‑urušalim sul s‑ġassad.

kšmn ayt‑yusf s‑lwrt‑nsn

²² imma ayt‑yusf iwnn a‑n‑akʷin f‑tmdint n‑bayt‑il, yili didsn sidi rbbi.

²³ iddu kra ġ‑ayt‑yusf s‑tntla a‑n‑aggʷn bayt‑il lli‑mi‑ttinin luz ġayd izrin.

²⁴ ẓrn yan‑urgaz iffuġ‑d zġ‑tmdint. inin‑as inagan‑lli: «ml‑aġ manizġ ra‑nkšm s‑tmdint, s‑gik‑nskr lh̬ir.»

²⁵ iml‑asn manizġ‑a‑kššmn. utn ilmma tamdint‑an s‑uwzzal imsidn. aznn argaz‑an d‑ayt‑dars ġ‑laman.

²⁶ iddu nttan s‑tmazirt n‑ayt‑ḥit, ibnu gis yat‑tmdint, ig‑as ism luz. iqama ism‑an sul s‑ġassad.

qaman ayt‑kanɛan ġ‑wakal

²⁷ imma ayt‑manaššah ur‑ṭṭayn imzdġn n‑bayt‑šan d‑iduran‑ns, ula imzdġn n‑taɛnak d‑iduran‑ns, ula imzdġn n‑dur d‑iduran‑ns, ula imzdġn n‑yablaɛam d‑iduran‑ns, ula imzdġn n‑magiddu d‑iduran‑ns. ašku ayt‑kanɛan umẓn ġ‑tmizar‑an.

²⁸ qaman ntni ġin, aylliġ wrrin ayt‑israyil tjhhdn fllasn ar‑tn‑ssh̬damn s‑twizi, walaynni ur‑tn‑kullu‑ssufġn.

²⁹ ula ayt‑afraym ur‑ṭṭayn ayt‑kanɛan imzdġn n‑gazar. sul qaman ayt‑kanɛan‑an zdġn ġ‑gratsn.

³⁰ ula ayt‑zabulun ur‑ṭṭayn imzdġn n‑qiṭrun d‑imzdġn n‑nahlul. sul qaman ayt‑kanɛan‑an zdġn ġ‑gratsn, ar‑tn‑ssh̬damn s‑twizi.

³¹ ula ayt‑ašir ur‑ṭṭayn imzdġn n‑ɛakku, ula imzdġn n‑ṣidun, ula imzdġn n‑ḥalab, ula imzdġn n‑akzib, ula imzdġn n‑ḥalba, ula imzdġn n‑afaq, ula imzdġn n‑raḥub.

³² zdġn ayt‑ašir ġ‑gr ayt‑kanɛan lli‑igan ayt‑tmazirt‑an, ašku ur‑tn‑ṭṭayn.

³³ ula ayt‑naftali ur‑ṭṭayn imzdġn n‑bayt‑šams ula imzdġn n‑bayt‑ɛanat. zdġn ġ‑gr ayt‑kanɛan lli‑igan ayt‑tmazirt‑an. walaynni imzdġn n‑bayt‑šams d‑bayt‑ɛanat wrrin ar‑th̬damn s‑twizi.

³⁴ imma ayt‑dan, nkrn srsn ayt‑amur, dḥin‑tn s‑iwrar, ur‑tn‑udjn ad‑huwwdn s‑uzaġar.

³⁵ zdġn sul ayt‑amur‑an ġ‑uwrir n‑ḥaras ula ġ‑ayalun d‑šaɛlbim. qaman aylliġ wrrin ayt‑yusf tjhhdn fllasn ar‑tn‑ssh̬damn s‑twizi.

³⁶ illa‑uwttu n‑ayt‑amur ġ‑tizi n‑ɛaqrabbim, zġ‑salaɛ s‑uflla.