imurign 95 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aškat‑d a‑nttirir i‑rbbi da‑illan

¹ aškat‑d a‑nttirir i‑rbbi da‑illan, nall awal nfrḥ s‑unjjam‑nġ izgan.

² nkšm s‑umnid‑ns ar‑t‑ntškar, nall awal nfrḥ s‑tallġatin n‑tulġa.

³ mnšk a‑imqqur rbbi da‑illan, ig agllid yattuyn f‑id‑rbbi n‑ddunit.

⁴ afus‑ns a‑ġ‑llan iẓuran n‑wakal, d‑wins ad‑gan ih̬fawn n‑idrarn.

⁵ amda idran iga wins ašku iskr‑t, d‑ifassn‑ns a‑issngaddan lbur.

⁶ munat‑aġ‑d a‑nknu nsjd i‑rbbi da‑illan, nutš ġ‑umnid n‑walli‑aġ‑d‑ih̬lqn.

⁷ ašku nttan a‑igan rbbi‑nġ, ng tawrut n‑ugdal‑ns d‑uwlli lli‑iksa. ġassad iġ‑tsfldm i‑wawal‑ns,

⁸ ad‑ur‑tssiqarm ul‑nun, ġmklli ijran ġ‑mariba ula ġmklli skrn ġassan ġ‑massa ġ‑lh̬la.

⁹ ašku ġin a‑ġ‑iyi‑urmn id‑babatun. wah̬h̬a ẓran kullu mad‑skrġ, ḍaḍḍan‑iyi.

¹⁰ kkuẓ id‑mraw (40) n‑usggʷas ḥašaġ tasut‑an, iniġ: «mddn‑an ar‑bdda‑ijllu‑uwl‑nsn, ur‑jji‑rin ad‑munn d‑iġarasn‑inu.»

¹¹ s‑lġaḍab a‑s‑fllasn‑nniġ awal‑ad izgan: «ntni ur‑sar‑rad‑kšmn s‑usunfu‑inu.»